البت القبطية الحبت صاحبنا

اسماعيل الريح بلال كتب:: ود الخليفه ابوسويط صاحبي ده لو ما تم القصه ده وقعته سوده اسكت ساكت

هههههههههههههه

هههههههههههههههههههه
طوالي كدا صاحبتو يعني بعتني خلاس
تسلم يا ملك
بالمناسبة دي انا وكلتك تتم القصة دي
نسبة للسفر وكدا

محمد بركات احمد كتب:: الحبيب عصام الحكاية شنو لينا كام يوم منتظرين ان تاخذ نفسك وتجينا صادي دا نفس شنو دا ؟

الحبيب محمد بركات كيف حالك واخبارك
معليش والله بس كنتا جايط كدا واهو يادوب في روقان شوية
المشكلة ان الانقطاع دا من المصدر
واهو مبروك عليكم البت القبطية اسلمت وزادت جمال
ولقدام حتكون التكملة مع المبدع الباشمهندس اسماعيل
كنكشو فيو قوي
واوع يتاخر
انا حنزل اخر حلقة وصلتنا
واهو الباقي على اسماعيل اصلا بنعرف المصدر سوا
لك ودي وتحياياي وتحياتي للأخ يوسف
وتسلم يا رائع

جيناكم ياحبايبنا بعد غربة وشوق00 الصراحة الصراحة والله انكم وحشتوني موت وحاتكم لوما الشديد القوي مابغيب الفترة الطويلة دي لكن الله غالب00 وانتهز هذه الفرصة لاقدم جزيل شكري لكل من عقب وتداخل معنا وان شاء الله ارد عليكم واحد واحد ....اكرر شكري وتقديري يا اعز ناس0
اها نجي لبتنا القبطية الزوله السمحه واللي زادت سماحه بعد ما اسلمت نعم اسلمت بأرادتها الحرة القوية اسلمت لما وجدته من طيبة وتعامل من ناس بسيطين تجي حاجة التاية شايله ملاح الويكة وتجي حاجة آمنة شايلة ملاح الويكاب وتجي بت الجراري شايلة مفروكة الباميه وبكل عفوية وطيبة قلب اكلي يابتي النبي فيك كما اكلتي وكلو واحدة منهن دايرة ياكلوا من طبيخها لمه حلوه قفشات وضحكات وتعليقات مرة تحت ضل النيمة ومرة في القطية ومرة في الراكوبة المفرشة بالعناقريب وحداهم زير الموية المندي وتحت الزير تلقي بطيخة كبيييييييره ومرات تكون قاعدة تجي الغنماية تلحس ليها يدها او تاكل طرف التوب وياما حصل وحصل تجي بت ابشوك الله يرحمها شايله الكركار وتقوليها كدي يابتي النمسحك عشان الباعوض مايعضيك00 كيف ماتسلم وهي شايفة حاجة نفسية تقيم الليل وتصلي الفجر حاضر00 هكذا اسلمت البنية والحمدلله علي نعمة الاسلام وحلاة الدنيا عليها وهي لابسة التوب بتصلي وابوالفراريج قاعد حاتل جنبها مافضل ليهو شئ الا يقوم يصلي معاها00 جلسنا انا والبت السمهرية وفروجة وصاحبنا حيدر نتفاكر عن الجاي حايكون شنو حيدر قال ياجماعة خير البر عاجله وقبل ماتحصل لينا اي مفآجات حقو نسرع ونعمل العرس ده سريع جدا البنية السكرية قالت ماعندها اي مانع طبعا فروجة مقهي وفاتح خشمو الكبير ده ويعاين للبت قلنا خلاص نحنا نقوم نعمل ترتيبات الزواج بسرعة جدا وفي نفس اللحظة اتصلنا علي اخونا كمال عشان يقوم بطباعة كروت الدعوة اتصلنا علي اخونا عثمان عباس لحجز الصيونات والكراسي والترابيز والساوند والفنان وباقي التفاصيل حددنا يوم الخميس الجاي هو موعد للعقد والدخله في نفس اليوم في اللحظة دي جات داخله علينا اخت فروجة وعرفت الترتيبات العملناها وحلفت يمين انها انها تقوم بتجهيز العروس من الدخان والحنة والحبسة والذي منو00 طبعا صاحبنا فروجة مامصدق انو ده كلو يحصل بالسرعة دي وقعد يوزع في البسمات يمين شمال وعندو فتحة نخرين اجاركم الله وحاتكم بس شكمان دفار الساعة اليقوم يفتح ليك نخرينو ويقول للبنية ياحياتي حياتنا اصبحت غاب قوسين او ادني خلاص ياروحي ماحانفترق ابدا الا الموت يفرقنا وردت عليهو البنية بكل حنية بعد الشر عليك ياحياتي انشاء الله انا قبلك ويقعد هو يقول ليها لا انا قبلك وقعدنا انا وحيدر نشاهد في المنظر العجيب الكان داير بين البت وفروجة والله ياجماعة الناس ديل كبوا لينا جنس ريد وحنان في اللحظة ديك مبااااااااالغة لكن وفجأه يدخلوا علينا حاجة نفيسة والتاية وهاك يازغاريد واتلموا علينا بنات الحله وجابن الدلوكة وهاك ياغنا العديل والزين انا مناي لي خالوا حسن وحسين الله يتموا لي 00 والليلة سار ياعشايا 00 وكانت لحظات فرح غير طبيعية ومن الفرحة غلبنا نمسك دموعنا حتى البنية من الفرحة لما شافت كل الناس فرحانه بتغني وترقص اجهشت بالبكاء لدرجة هستيرية واتلموا عليها كل الحاجات الكبار وختنها في حجرهن وقعدن يسكتوا فيها كأنها طفله يافعة بدللوا فيها دخل علينا عم صديق بظرافته المعهودة وقفشاته المضحكه خلي ليك البنية تقلب من بكاء الي ضحك مباااااالغة وعمت الفرحة ارجاء البيت والحلة كلها فرحانه انو اخيرا حايتم زواج فروجة والبت القبطية00 نسيت اقول ليكم لفت نظري فروجة لحظة البت كانت بتبكي وصاحبنا وحاتكم بكاء يجيب الرايح ولامؤاخذه المخاخيت ديل شئ عجيب الله بسألني بس هنيق حمار بس وبي هنا البت تبكي زي العصفورة البتغرد هههههههاي جنس محن غايتوا في الدنيا دي00 المهم في اثناء الجوطة ديك جاني تلفون من صاحبة البت من مدني وقالت لي كلام عجيب وغريب000 اححححححي يا اصبعي بس شوية كدي واجيكم صادي0

روعة ما بعدها روعة وجمال الروح في الاستمرار
لانك تحمل فكرة في غاية الجمال والروعة
_________________
عصام محمد عثمان ود الخليفة TM
إحذر التقليد

مشكور عصام

يا ود الخليفة شنو الحكاية قبيل كنا خايفين من حكاية التعليقة دى عشان كدا ما قريناها الا بعد كتبت كل الحلقات الموجودة الان لكن برضو وقعنا فى فخ الانتظار وفى انتظارك منذ الاربعاء الماضى وتحياتى لك وابقى زورنا لمن تجى الرياض تقاطع شارع ال فريان مع الغشرين وبالمناسبة عندنا مواقف كبيرة وكثيرة لسيارتك...............................

ياسر احمد بركات كتب:

مشكور عصام

هههههههههههههههههههه
طوالي انت رجل حبيب وكمان طيب
تسلم يا ملك
والبركة فيكم في وفات الاب العمدة عبدالباقي رحمه الله
_________________
عصام ود الخليفة TM
إحذر التقليد

alialmack كتب:

يا ود الخليفة شنو الحكاية قبيل كنا خايفين من حكاية التعليقة دى عشان كدا ما قريناها الا بعد كتبت كل الحلقات الموجودة الان لكن برضو وقعنا فى فخ الانتظار وفى انتظارك منذ الاربعاء الماضى وتحياتى لك وابقى زورنا لمن تجى الرياض تقاطع شارع ال فريان مع الغشرين وبالمناسبة عندنا مواقف كبيرة وكثيرة لسيارتك...............................

هههههههههههههههههههه
طوالي كدا بقيت صاحبي يعني انت خلاس قدمت لي دعوة ربك يسهل
تسلم يا ملك
بالمناسبة دي انا وكلتك تتم القصة دي
نسبة للسفر وكدا
_________________
عصام ود الخليفة TM
إحذر التقليد