البت القبطية الحبت صاحبنا

قصة الرائع/ استاذ/ منتصر محمد عبد النافع (المحامي))و سوف انشرها لكم تباعا باذن الله

طبعا صاحبنا ده لقبو فروجه وكنا بنتكلم بالتلفون صباح اليوم
واتذكرنا قصتو العجيبه مع البت القبطيه قلته ليهو انا حااسرد القصه كلها في النت قال لي شكيت محنك مالك داير تعمل لي فضيحه قال لي خلاص بس اذكر لقبي ماتذكر اسمي قلت ليهو خلاص اتفقنا رجع تاني قال لي ياخي لوداير تذكر اسمي بالكامل اذكرو ماعندي مانع قلته ليهو لا خلاص انا حااذكر لقبك بس هو الناس كلها عارفاك فروجه اسمك ده الا نحنا اصحابك المهم انو فروجه ده شخصية مثيره جدا للجدل زول مرح لابعد الحدود زول مجامل بصوره غير طبيعيه طيب جدا جدا وكان اكتر واحد في شلتنا بنعلق عليهو افظع التعليعات مابزعل ابدا يضحك وبس اشتغل معلم في المتوسطه وكان مبسوط طبعا فروجه ده ماشاء الله اخوانو كلهم تيمان الا هو الفرادي ثمانية بالجوز الا صاحبنا ماشاء الله عليهم وكلهم سمحين الا صحبي ده التقول ولدوه في الضلمه وكهربا مافي مكجم كجيم عدوكم راسو ده تحلف تقول رابطنو قلووز والنخرين ديل شكمان شاحنة الله بسالني وقول الشعر كل عشره عاملات اجتماع مع بعض سبحان الله بعد ده مكسر جنس بنات والله ماحاتصدقوا اظرف حاجه واحدة رسلت ليهو جواب قالت ليهو حبيبي ذو الشعر المموج اول ماقرا الجواب قال والله البت دي كضابه حسي انا شعري ده مموج طبعا خفة ظلو واريحيته مغطيه علي شناتو المهم صاحبنا شغال معلم وبصرف علي المليشيا الفي البيت اخوانو الكبار مغتربين في ليبيا ليهم 20 سنة وهو الوحيد ياعيني شايل هم اخوانو الباقيين وديلك لااتر ولاخبر اصلو البمشي ليبيا دي خلاص راح في خبر كان 00 المهم فروجه ده ترتيبو في البيت العاشر ماشاء الله حتى وسط اشقائه محبوب جدا وامو حاجه فاطمه الله يرحمها كان اكتر واحد في اولادها بتريدو مره قلت ليها خالتي فاطمة ولدك فروجه ده العاجبك فيهو شنو لمن تدليعهو كده طبعا الله يرحمها كانت ظريفه خلاص قالت لي حلاتو ياناس والله انا شايفهو احلا من هاني شاكر قلت ليها والله صحي القرد في عين امو غزاله 000 والعريبه انو كان مجكس احلا بت في الحي لمن تقول ليك حبيبي فروجه خلاص الكلام كمل وكان صاحبنا لما يكون عندو معاها موعد تعالوا شوفوا المسيح بالفازلين طبعا في الضلمه ماكان بنشوف الا سنونو ولما يتمسح بالفازلين ده تحلف تقول حرامي يكورك لي بي فوق للصريف طبعا نحن جيران الحيطه بالحيطه زي مابقولوا يقول لي تعال سرح لي شعري ده من ورا وكنت بسرح ليهو بالخلال ساعة ونص عشان الم شعرتين مع بعض ومشط طولو نص متر كان جنس تعب في الدنيا دي ويوم يلاقي حبيبة القلب بت الحلة اول كلمه يقولها نشيل املنا نقابل اهلنا من ما قمت فروجه ده غير المقطع ده ماحافظ حاجة استغفر الله حافظ كمان دجاجي يلقط الحبه ويجري وهو فرحانه كان قادينا بالبيت ده في المطارحه الشعريه000 احبتي سنواصل

طبعا علاقة فروجة ببت الحله كانت علاقة قوية ونحنا كلنا كنا متوقعين يتزوجها ولكن نحنا المغتربين ديل
نسوي معاهم شنو(طبعا انا واحد منهم) وحاتكم جا واحد ود عمها لزم تف خطفها ليك عرس والكويت طوالي خلي ليك صاحبنا لافي صينية نحن اسبوع كامل نرش في فروجه بالموية عشان ننزل الحرارة قلنا خلاص الزول اتلحس والذ بكا شفتو بكا فروجه جنس شنا وجنس جعير وتلاليش عدوكم بطول حسو الساعة اليقول ليك اه ياكبدي اه ياحياتي وشبكنا ليك غدار يازمن منعول ابو الحب جاتنا حاجة فاطمة قالت ولدي ده سحروه لازم نوديهو شيخ قريب الله شلنا الولد وجرينا شيخ قريب الله وحاتكم قال الزول ده مستهبل ماعندو ولا حاجة اداهو ليك حبات بخرات قلبتوا ليك شاعر ماتقولوا لي قيس ولا عنتر حكاية عجيبه وصاحبنا يردد في الشعر بكل اسى وحزن( حبيتك بكل احساس جرحني ودعمك النسناس000 شوفوا النسناس دي موقعه من الاعراب كيف حاجه عجيبه الولد ده خطر عديل كده000 وتاني قال بريدك انا اتكويت منعول ابو الكويت000 ) صاحبنا فعلا دخل في ازمة عجيبة ولكن الحمد الله عدت وحلف قال تاني مابدخل في علاقة حب وحاتكم بعد شهر ونصف زولكم جكس معلمه زميلتوا واحلف ليكم صادق ياجماعة الزول ده ماحصل حبه ليهو واحده شينة صحي يضع سرو في اضعف خلقوا مكسر ليك البنات بي صورة غير طبيعية والله نحن قلنا الزول ده امكن عندو عرق محبه ياخي زول مكجم وشو تقول تربيزة لحام قلنا ليهو ماقلته مابتحب تاني قال لينا الفراغ العاطفي ممل وروتين الوحدة قاتل وانا دخلته في العلاقة دي عشان انسى(000) المهم المعلمه دي كانت جميله شديد وحبت فروجه شديد والغريب اي علاقة دخل فيها الزول ده تحس بيهو كان جادي جدا وتحلف تقول يتزوحها بكره زول جرسة لو غابت منو يوم ساكت تلفاهو جري يسال عنها والشئ الجميل فيهو اهتمامو بالناس وتفقد احوالهم وتلقاهو ملهوف في السؤال عن شخص ما زول ديناميكي وحيوي شديد استمرت العلاقة بينه وبين المعلمه قرابة الثلاثه شهور في يوم جاتني المعلمه في بيتنا امي لمن اتهجمت قالت لي البت السمحه دي شنو ياولد قلت ليها ياحاجه دي ما اخت فلان قالت فلان انا مابعرف اخواتو اخر شئ قلت ليها ياحاجة بصراحة صراحة قلت ليها البت دي دايرها فروجه ود حاجه فاطمة امي ماكضبت قدام البت قالت لي ياولدي شان جاب الغزاله للحلوف وطوالي قالت للبت يابتي ماليك عميانه مابتشوفي ولا من قلة الرجال مالقيتي ليك زول كده سمح الا فروجه ده البت قالت ليها بحبو ياحاجة بموت فيهو امي قالت ليها حبتك دقونه يامطرطشة ياالسجمانه ماخلت للبت حاجة وانا ده من الخجله دخلت جوه اظافري وبعد شويه الحاجة صاحت لبت اختي الصغيره يارانيا جيبي ليمون بدون سكر للغبيانه دي قلت للحاجه ياحاجه ممكن تتركينا دقيقة بس مع البت دي قالت لي اي ياولدي اديها راسا قبل ماتمشي امي قالت ليها والله يابتي هو من ناحية طيبة مافي اطيب منو لكن راسو المدوغر ده توديهو وين غايتو اليوم داك انا من الحرج ماقدرت اقول حاجه للبت المهم بعد الحاجة مشت البت قالت لي انا عرفته انك اقرب واحد لفروجه وهو بسمع كلامك انا لي يومين فروجه مابتكلم معاي قلت ليها السبب شنو قالت لي قلت ليهو في واحد جاي يتقدم لي رايك شنو قالت لي قام سكت وطلع طوالي يومين مابتكلم معاي رسلت لفروجه جا بسرعه اول حاجه قابل الحاجة قالت ليهو مخير الله يافروجه بتعرف البت السمحه دي من وين يامقلقص اي ياولدي احسن تعرسا عشان تجيب ليك جنيات سمحين بس اوعه يجوا يشبهوك ضحك معاها وجانا داخل في الصالون طبعا داير يتعزز صاحبنا قال ليها انا ما مستعد ادخل في نفسيات تاني قلت ليهو يافروجه طيب اذا انت بتحب البت دي فعلا ودايرها هيا نمشي نخطبها ليك من اهلها البت قالت ماعندها اي مانع بس نحن كيف نجي نتقدم المهم اتصالحوا واتفقنا علي اساس انها تنسق مع ناس بيتم وبعد داك نحن نجي نتقدم البت طلعت مشت وقعدنا انا وفروجه وجونا اصاحبنا حيدر وكمال وخالد فروجه فال يشاور حاجه فاطمة امو ويشاور اخواتو ويدينا خبر000 قلنا ليهو يازول تشاور شنو خلينا نحسم الموضوع اول بعدين نكلم ناس بيتكم وهو كان مصر لازم يشاور ناس بيتم طلع خلانا قال ماشي البيت يكلم امو واخواتو ويجينا راجع000 ونواصل شوية كده واجيكم صادي000

والله شريتنا شرة يا باسطة

وانا شاكي انو فروجة ده انت بي لحمك ودمك

ماتخل قول الحقيقة وسرك في بير

كمل لينا القصة سريع سريع شحتفته روحنا

مصطفي دعوب كتب:: والله شريتنا شرة يا باسطة

وانا شاكي انو فروجة ده انت بي لحمك ودمك

ماتخل قول الحقيقة وسرك في بير

كمل لينا القصة سريع سريع شحتفته روحنا

مصطفي كيفك
منووووور البوست
فروجة شنو قول خير في زول بشيل حال نفسو
جاييك التقيل قداااااام بس اصبر لي
القصة طبعا بقلم الاستاذ المحامي يعني
انا موصلاتي بس
جبت الكلام بالترلا ونقلتو ليكم هنا
lol!

اولا احييك ياعصام الم اقل لك بانك سوف تكون نكهة جديدة بالمنتدى الفانيليا شنو كمان ؟
قصتك حلوة شديد وواقعية لدرجة انه يمكنك وبكل سهولة ان تتقمص شخصيتها فروجة وختى اصحابه حيدر وكمال وخالد القصة مع انها منقولة لكنها توحي بانك تجيد الاختيار واختيار موفق يابن عمو وبعدين يااخي ترلة شنو ؟؟ ادينا فكرة عن الترلة دي انا غايتو زى الاطرش في الزفة زول مبدع وقلمه يتالق ابداعا وجمالا وطرافةبهذا القدر اللماه علي الترلة ومصائبها شنو ؟ ارجو اجابة مقنعة على سؤالي دا ياودالخليفة مع شكرى وودي وتحياتي والى الان لم تجاوب على سؤالى الذى خرمت بيه في منتدى الترحيب والاجتماعيات عن صلة قرابة متاكد منها مائة بالمائة ارجو الافادة للتوضيح .

مـع اني ما بعرف عصام ـ اسـمو ما كامل و الصورة ما واضحة تقول جايبها من ترلة ـ الا انه رائع .طبعأ زاغ من كلام مصطفي و قال ناقلها, قول احقيقة ما حـنتكلم . و تسـلم يا رائع

محمد بركات احمد كتب:: اولا احييك ياعصام الم اقل لك بانك سوف تكون نكهة جديدة بالمنتدى الفانيليا شنو كمان ؟
قصتك حلوة شديد وواقعية لدرجة انه يمكنك وبكل سهولة ان تتقمص شخصيتها فروجة وختى اصحابه حيدر وكمال وخالد القصة مع انها منقولة لكنها توحي بانك تجيد الاختيار واختيار موفق يابن عمو وبعدين يااخي ترلة شنو ؟؟ ادينا فكرة عن الترلة دي انا غايتو زى الاطرش في الزفة زول مبدع وقلمه يتالق ابداعا وجمالا وطرافةبهذا القدر اللماه علي الترلة ومصائبها شنو ؟ ارجو اجابة مقنعة على سؤالي دا ياودالخليفة مع شكرى وودي وتحياتي والى الان لم تجاوب على سؤالى الذى خرمت بيه في منتدى الترحيب والاجتماعيات عن صلة قرابة متاكد منها مائة بالمائة ارجو الافادة للتوضيح .

ابن العم العزيز محمد بركات
اول شي في بوست الترحيبات لم افهم السعال وكدي (والفهم أقسام ياعوض دكام )

Smile

طيب نجيبها ليك بالناس المعانا في السعودية عمك احمد عبد الله ببقى خالي
وبرسل ليك تحاياه وان شاء الله نجيبو ليك عبر هذا الكون الفسيح
اها برضو قول زغنا واتهبرنا عشان جبنا عمك
ونعم من لا يعرف حبوبتنا وأمنا عشة بت ابو عاجبة
وتسلم كتير للاهتمام ودي عوائدك انك تشوف اهلك وتسأل عليهم وانطبقت فيك صفة من يصل من يصله ويصل من يقطعه ايضا
ثم ثانيا
انا بالجد سواق تريلا وفي السعودية كمان وكفيلي يوسف الصبحي كمان
بس كفيل زيو مافي وانا برسل اليه التحية من على هذا المنتدى (اوع تقولو كسير تلج وكدي ) وتسلم على الاطراء بس شنو يعني الابداع احتكرتو لدى المثقفين والخريجين والصحفيين فقط انتا تعلم والكل يعلم انك ممكن ان تشاهد في السودان الكمساري باشمهندس والسواق يحمل الدكتوراة وزي ما بقولو يضع سره في اضعف خلقه واهو السواقة زي ما بقولو (القيادة فن وذوق واخلاق
pirat

) وهسع سواق الترلا او الأمجاد او الركشة من الممكن ان يتساوى مع كابتن الظائرة وسواق الباخرة يعني بالعربي الفصيح كلنا زملاء وكلنا سواقيين والرابط العجيب بيناتنا الطارة او الدركسون معليش على الشرتمة والشرتمة دي طبعا اهم حاجة عندي عندما اكتب اي وضوع معليش كلامي زي ما بقولو زي ملاح الورق كلو نطيط ننط بهنا ونجي بهنا rabbit

وتسلم كتير يا محمد بركات وبصراحة تعجبني ردودك حتى اني قبل ان ارد اتمهل واقرا الرد اكثر من مرة
يعني باختصار كلك على بعضك حلو
واصبرو التقيييل قداااام مع فروجة lol!

علاءالدين حسـن الجعـلي كتب:: مـع اني ما بعرف عصام ـ اسـمو ما كامل و الصورة ما واضحة تقول جايبها من ترلة ـ الا انه رائع .طبعأ زاغ من كلام مصطفي و قال ناقلها, قول احقيقة ما حـنتكلم . و تسـلم يا رائع

علاء الدين الجعلي كيفك وتسلم للطلة الخفيفة
الصورة دي طبعا كانت يوم عرسي وانا ماشي للسيرة واهو التقطوها الصحفيين وكدي pirat

وبقى مانشيت رئيسي عصام باسطة سائق الترلة عريس
بعدين انتا ومصطفى من قبيل شابكني فروجة الله يستر لقدام ما تطلعونا
البت القبطية (وجه ضاحك)
واصبر فروجة حيمحنا محن قدااااااااام اسكتو بس
وتسلم يا علاء للمرور

سلام يا حلوين
علاء
ومحمد بركات
ومصطفى
اها جيتكم راجع

8">]
طلع فروجه وقعدنا انا وحيدر وكمال وخالد نتكلم في موضوع صاحبنا حيدر قال والله البت سمحه والظاهر عليها بت ناس وبعدين راغبه ومشتريه فروجه كمال قال انا بعرف اخوها ولد ممتاز ومؤدب جدا كان الحديث يدور حول هذا الموضوع الي ان جاء فروجه وقال كلم امو وكلم اخواتو وقالوا ليهو لازم نمشي نشوف البت و اهلها ونتعرف عليهم بقت المسأله مساله ترتيب مع البت وفعلا اتفق معاها فروجه ورتبت الامور مع ناس بيتم وتم تحديد يوم الخميس علي اساس نجي نشرب معاهم شاي المغرب حاولنا اليوم داك نعمل بعض عمليات تجميل لفروجه لكنها فشلت الزول مافي طريقة يتصلح والاظرف حيدر جاب شاكوش وقال لفروجه اديني وشك وكان جادي جدا المهم ضحكنا واتشيكنا اخر شياكه ومشينا سقنا حاجة فاطمة وثلاثة من اخواتو وانا وحيدر وكمال وخالد والعريس فروجه في السكة امو قالت لينا عليكم الله كلوا واحد فيكم يقرأ قل هو الله احد ثلاثة مرات عشان مايسحروا لي ولدي دا قلت ليها والله ياحاجة نحنا خايفين هو يسحرنا المهم وصلنا بيت ناس العروس دقينا الباب فتح لينا اخوها اتفضلوا لي جوه دخلنا لقينا ابوها ومعاهو واحد قالوا ده خالها لزم دخلوا الحريم علي النسوان بهناك ونحنا قعدنا في الديوان مع ابو البت واخوها وخالها ورحبوا بينا ترحيب حار جدا وقدموا لينا الشربات والحلاوه والتمر والله نحنا قايلنو عقد عديل كده وبدأ التعارف انت ود منو واهلك من وين وجنسك شنو الاسئلة التقليدية المتعارف عليها قام ابو البت سأل قال زميل بتي فيكم منو قام فروجه قال ليهو انا ياحاج عاين لي فروجه كده تحس بيهو الوضع ماعجبوا قام قال ليهو انت من وين في الاهل فروجه قال ليهو انا من اهلك العركيين ابو البت بسرعه قال ليهو نان العركيين ديل ماسمحين انا داير افكها ضحكة لكن حيدر قرصني المهم ابو البت طلع جعلي كلس وقال لي ولدوا امشي ياولد نادي امك وناس البيت يسلموا علي الضيوف ومشي الولد وبعد شويه جانا ليك قمر اربعاتشر في سماهو يمشي جات البت وامها واثنين من اخوات البت وحاجة فاطمه وبناتها الثلاثة يعني جلسة عائلية زي مابقولوا مابقدر اوصف ليكم جمال البنات ديل قدر شنو والله زي ماقال اللحو الجمال موجود في كل مكان لكن الجمال الاصلي في السودان ودي حقيقة وبقينا نحنا نبحلق في البنات نسينا موضوع فروجه وبقينا في مواضيعنا نحنا حيدر وخالد وكمال كبكبه وخفة دم شديدة ودارت الونسة بينا كمجموعة وحاجه فاطمة عجبتا ليك البت وكلوا شويه تعاين ليها وتقول ماشاء الله قمر ياناس الله يحفظك وبعد شويه نادتني حاجة فاطمة وسوسة لي في اضاني وقالت لي افتحوا لابو البت اضانو البت سمحه خلاص مابخلوها بسراع كلموا ابوها وانا بي هنا بكلم الام قلت ليها حاضر ياحاجة رجعته قعدت في محلي وبعد دقائق قلت لابو البت والله ياحاج نحنا سعيدين نتعرف عليكم والله انتو ناس كرم وجود واسرة الزول يتشرف بمعرفتها وبالمناسبة دي يشرفنا ان نتقدم لطلب يد حرمكم المصون لابننا الغالي فروجه الحاج قال لي ابشروا بالخير مافي عوجه الفيها خير ربنا يسويها وطالما هو راجل وبقدر يعشيها تب مافي عوجه وقال لي ياولدي الزمن ده البت والولد بجوا متفقين من بره نحنا ماعلينا الا نتم ليهم وطالما البت موافقه والولد موافق نحن كمان موافقين اهم حاجه الستره ياولدي الزمن بقي صعب قلت ليهو والله ياحاج نحنا اسئلنا عن فروجه دا ولد تمام وطيبان جدا ومن ناحية بشيلها ليك دي مافيها كلام ومافيهو اي عيب الا شناتو بس طبعا قلتها في سري المهم قرينا الفاتحة وطلعنا منهم ونحنا فرحانين وحاجة فاطمة فرحانه شديد وهاك يازغاريد والعجب فروجه يبحلق بعيونو العاملات زي عيون الكديس ديل و تحلف تقول رادار بس داير يطير من الفرح ويوزع لينا في البسمات بتلاليشو الكبار ديل وصلنا بيت ناس فروجه واخواتو فكوها ليك زغروته الحله كلها اتلمت في شنو قلنا ليهم فروجه خلاص خطب ودي منو الانتحرت دي قلنا ليهم بت عسل شديد لما تشوفوها يوم العرس بعد داك تم الاتفاق علي التفاصيل موعد العقد وموعد الزواج وخلاص الامور ماشه علي مايرام واتاري اخونا كمال خلاص وقع في حب واحده من اخوات العروس وقال في الدنيا دي ماداير اي بت الا البت دي نعود لتفاصيل كمال لاحقا ونبقي في موضوع صاحبنا فروجه بقينا نحنا طالعين و نازلين نجهز في حاجات العرس وجهزنا الشبكة والشيلة وكل مستلزمات العرس وفي يوم من الايام رسلت العروس لفروجه وقالت ليهو تعال لي باسرع وقت فروجه غشاني في البيت وقال لي البت دي رسلت لي وقالت اجيها ضروري وانا ماشي اشوف الحاصل شنو وفعلا مشي فروجه وقابل العروس في بيتم وكانت المفاجأه قالت ليهو انا ماعايزاك عديل كده مادايراك يابت الناس استهدي بالله ماليك في شنو قالت ليهو بس مادايراك وربنا يسعدك مع واحده غيري لكن انا خلاص مادايره عرس نهائي لاانت ولاغيرك حاول ان بفهم السبب شنو ماقدر سأل امها سال اخواتها كانوا مزهولين هم انفسهم من تصرف بنتهم فجاه تقول مادايره عرس بعد ماجهزنا كل حاجه فروجه ده والله داير يجن جاني في البيت يبكي وحكي لي الحاصل بسرعة ركبنا العربية معاي حاجة فاطمة ومشينا ليهم لقينا ابو البت هايج ويقول والله انا اقطع راسها بعد ما اديت كلمه للناس تجي تقول مادايره نحن بنلعب لقينا البيت ده مقلوب والام تبكي والاخوات يبكوا دخلت انا عليها وسالتها ماليك في شنو قالت لي مافي اي حاجة بس انا مادايره عرس لافروجه ولاغيروا قلت ليها لا كده ماينفع يابت الناس لازم تقنعيني انا عايش قصتكم مع بعض وعارفك كيف بتريدي فروجه لوفي اي سبب خفي قوليهو لي انا لازم اعرف السبب حلفت براس ابوها ماتوريني الحاصل شنو ومصره اصرار غير طبيعي انها خلاص شالت موضوع العرس ده بره من راسها جات حاجة فاطمة يابتي الحاصل عليك شنو قالت ليها ياحاجة كل شئ قسمة ونصيب وانا خلاص مادايره عرس حاولنا المستحيل عشان نعرف الحاصل شنو ماقدرنا رجعنا انا وحاجة فاطمة البيت ولقينا فروجه ده في حالة تانية شلناهو جرينا بيهو المستشفي رقدوه وبقينا في حالة فروجه صدقوني كان ممكن يروح فيها ولكن الله هو الاقوي جاتو حالة انهيار عصبي شديد جدا اسبوع فروجه في المستشفي رجعت انا للبت تاني قلت ممكن تكون استهدت بالله لقيتها عند موقفها اصرار في اصرار وعناد اكثر من الاول كلنا دخلنا في حالة صدمة وزهول من الحاصل ده كل الناس العارفين القصة مندهشين وكترت الاقاويل وكل واحد يفسر بطريقته بقينا ماعارفين نقول شنو ومرت الايام طلع فروجه من المستشفي بحالة افضل ولانو هو كان زول مجامل كل المدينة جات لزيارته واصبحت قصة فروجه علي كل لسان واي زول داير يعرف سبب رفض البت فجاه لشنو وكانت المفاجاه التي ازهلت كل الناس عند معرفة السبب 000
ونووااااااااااااااااااصل

[/size]

عصام وانا صغير كنت مغرم بمغارات الشياطين ال13 لكن خليتها تعرف ليه....؟
لانو كانت هناك مغامرة فى جزئين ..فتشت للجزء التانى مالقيتو...بحثت كل المكتبات مافى فايدة...من ديك حلفت اى مغامرة ابداها من الاخر .عندها نهاية ببداها ما عندها الله معاها...
اها اعمل حسابك ماتبقى عليك الحكاية وكمل القصة... Basketball

تحياتى يامبدع سلام خااااااص لاسامة.

ياعصام يارائع فروجه صــــــــــــــــــاحبك ده خفاف سعد اصله في ناس زي ديل البنت تكون بايره ليها زمن اول مااتكلم فيها باكر اظهرو لها اولاد اعم واخله خشمه ملح ملح
عندنا زميلتنا في الشغل عمره عمل 45سنه ماتدينا فروجه ده اخفف لينا سعدها ونرجعه ليكم ده لو ما اتزوج

تسلم يامبدع

اها جيتنا راجع وبرضه خليتنا مشرورين وبترجع تاني متين؟ نحن عارفين انك سائق ليك ترلة اكان قولنا ليك اسرع تصلنا بعد يومين وخليتنا زى ناس المسلسل تعرف ليه لانه القصه حلوة شديد والسرد مشوق اكثر وجعلتنا نتخيل بقية القصه كل على طريقته وهذا اروع مافيها وفي انتظارك

اها يا الأشراف
]حذر وترقب وهدوء يسبق العاصفة الكل منتظر يعرف البت دي مالا ابت الولد ده حتى اختنا نسرين الشمار كاتلة دايرة تعرف البنيه السمهريه دي حكايتها شنو، فروجه علي شانتو العليهو بقي ضعييييف المسكين شايل هم الدنيا العاكستو دي وشدة ما الهم كبرو تحلف تقول بقي مشرف تربوي وهو لسه معلم ياداب 000 فجأه نسمع ليك انو البت صحتها اتدهورت بصوره عجيبة وتصرخ من غير سبب شالوها جري علي المستشفي والتحاليل شخصت حالتها انو عندها ملاريا وتارة انيميا وتارة التهاب بالكبد طبعا مسألة الاخطاء الشائعة في التحاليل دي او الاخطاء الطبية سمعنا عنها بلاوي متلتله وياما شفنا ناس كتار راحو فيها لمجرد خطأ طبي او دايما يقولوا ليك الحالة لم تشخص صاح نسأل الله العفو والعافية 00 المهم البت اكثر من اسبوعين راقدة في المستشفي وماعارفين عندها شنو حالتها ماشه للاسوأ واصبحت حالتها شبه ميؤس منها لم نتخلى عنها وفروجه اثبت انو رجل مواقف لم ينقطع عن زيارتها يوما واحدا طلبنا من اهلها ان ننقلها الي الخرطوم وكنا علي استعداد ان نقيف معاهم لاخر لحظه وفروجة رغم الجرح الاليم الذي لم يندمل رايت في اعينه نوع من الشفقة والخوف علي حياتها ولن تصدقوا ان البت الفارهه والملانة والسمحة ديك كيف ذبلت شئ يحير 00 الي ان جاءت واحدة من اهلهم مره كبارية في السن قدرت تقنع اهل البت بان المرض ده مامرض دكاترة ده مرض فقرا وان البت دي عاملين ليها عمل او مسحوره صدقوا كلامها واخدوها علي شيخ معروف في منطقتنا وكانت المفاجأه بالنسبة للجميع انو فعلا عاملين ليها عمل وان العمل مدفون قدام الباب 00 انا شخصيا كنت لااؤمن بمثل هذه الخرافات ولكن موضوع البت دي وواحد زميلنا في العمل خلاني مش اصدق بل اقتنع تماما بان الدنيا فيها ناس كعبين ممكن يأذوك لاي سبب من الاسباب ولكن هنالك رب اقوي من اي شئ وصدقوني ليس هنالك اقوي من سلاح التحصين الصباحي والمسائي ويقول الرسول (ص) واعلم لو اجتمع الجن والانس علي ان يضروك بشئ لن يضروك بشئ الا كتبه الله لك الي اخر الحديث00 فدائما ياخواني اتسحلوا بالقران وبي اذكار الصباح والمساء زي ماقلت ليكم00 المهم مشينا نحن مجموعة وحفرنا في نفس المكان القال عليهو الشيخ ونفاجأ باشياء غريبة شعر وبيض وعضام وطلاسم غير معروفه ومكتوب اسم البت واسم فروجه طبعا فروجه اكيد الشياطين خافوا منو وشتتوا للبت المسكينة دي ثلاثة ايام البت قاعدة مع الفكي الي ان رجعت لحالتها الصحية ورجعت البيت علي ارجلها انسانة كانت فاقدة الوعي لاكثر من اسبوعين كانت بين الحياه والموت فجأه بقت ماشاء الله تبارك الله المهم الوضح انو البت عندها ودخالتها كان عايزها وهي رافضهو لسوء اخلاقه وهو زول منبوذ في الحي وسمعته شينة خلاص تصدقوا هو العمل العمل ده والفكي قال الزول العمل العمل ده حايجي جاري هنا ويقول هو الفعل ذلك وقد كان جا ودخالتها جاري يبكي ويكرش في جسموا ويصيح واي ياراسي واي بطني سامحوني انا العملت ده كلوا شوف عيني لاجابوا لي ولاسمعتو شفتو بعيوني وسمعتو بي اضاني دي الولد يكورك ويدردق في الواطة دي زي المجنون والفكي قال حتى الزول العمل ليهو العمل ده بكون بتعذب الان كان منظر الولد عجيب وغريب 00 الموضوع ذكرني واحد زميلنا كان راقد في المستشفي ثلاثة سنوات كان داير واحدة واتزوج واحده غيرها وعملت ليهو عمل لحدي ماودهو للفكي وفك ليهو طلاسم العمل ده حتي بقي كويس وياهو ده حسي قاعد منطط عويناتو المقعمزات ديل المهم البت بقت كويسة الحمدلله وعلاقتها بفروجه تمام التمام ولكن فروجه نفسيا تعبان وصارحها عديل كده انو مسألة الزواج دي حايتأني فيها شويه وربنا يسعدك مع انسان اخر وانا مع انسانه اخري اقتنعوا الاثنين بالامر الواقع ولم تنطقع علاقتهم مع بعض بل ازدادت اكثر بارتباط صاحبنا كمال باختها خطبناها وعرسنا ليهو طوالي عشان مايجينا ودخالة ولاعمة يعمل لينا سيك ميك وهم الان اسعد زوجين وعايشين حياه هنية وسعيده00 البت اتقدموا ليها ناس كتار جدا ولكن يبدو انو موضوع فروجه لسه معشعش في جواها والظاهر دايره تشوف نهاية فروجة طبعا فروجة حصل علي فرصة دراسة جامعية منحوها للمعلمين وتم قبوله بجامعة الجزيرة وسافر للدراسة وفي الجامعة كانت هنالك مفاجات عجيبة000
فاصل اعلاني ونواصل احبتي

الأخوان
محمد أحمد
اسماعيل الريح
محمد بركات
بمش وارد عليكم واحد واحد وجااييييييكم بالباقي
بس ما تشفقو والتقيل قدااااااااااااااااااااااااام
فروجة دا لو ما قطع مصارينكم من الضحك انا ما عصام

عصام ود الخليفة كتب:: الأخوان
محمد أحمد
اسماعيل الريح
محمد بركات
بمش وارد عليكم واحد واحد وجااييييييكم بالباقي
بس ما تشفقو والتقيل قدااااااااااااااااااااااااام
فروجة دا لو ما قطع مصارينكم من الضحك انا ما عصام

تسلم ياعصام والله شفقانين شفقة اصله الصبر دا مافينا دحين الكع ساي ماعندنا اي شغله غيرفروجة الفورة مليون غايتو انا شفقان اما ودراشد واسماعيل امكن ينتظروك

عصام ود الخليفة كتب:: اها يا الأشراف
]حذر وترقب وهدوء يسبق العاصفة الكل منتظر يعرف البت دي مالا ابت الولد ده حتى اختنا نسرين الشمار كاتلة دايرة تعرف البنيه السمهريه دي حكايتها شنو، فروجه علي شانتو العليهو بقي ضعييييف المسكين شايل هم الدنيا العاكستو دي وشدة ما الهم كبرو تحلف تقول بقي مشرف تربوي وهو لسه معلم ياداب 000 فجأه نسمع ليك انو البت صحتها اتدهورت بصوره عجيبة وتصرخ من غير سبب شالوها جري علي المستشفي والتحاليل شخصت حالتها انو عندها ملاريا وتارة انيميا وتارة التهاب بالكبد طبعا مسألة الاخطاء الشائعة في التحاليل دي او الاخطاء الطبية سمعنا عنها بلاوي متلتله وياما شفنا ناس كتار راحو فيها لمجرد خطأ طبي او دايما يقولوا ليك الحالة لم تشخص صاح نسأل الله العفو والعافية 00 المهم البت اكثر من اسبوعين راقدة في المستشفي وماعارفين عندها شنو حالتها ماشه للاسوأ واصبحت حالتها شبه ميؤس منها لم نتخلى عنها وفروجه اثبت انو رجل مواقف لم ينقطع عن زيارتها يوما واحدا طلبنا من اهلها ان ننقلها الي الخرطوم وكنا علي استعداد ان نقيف معاهم لاخر لحظه وفروجة رغم الجرح الاليم الذي لم يندمل رايت في اعينه نوع من الشفقة والخوف علي حياتها ولن تصدقوا ان البت الفارهه والملانة والسمحة ديك كيف ذبلت شئ يحير 00 الي ان جاءت واحدة من اهلهم مره كبارية في السن قدرت تقنع اهل البت بان المرض ده مامرض دكاترة ده مرض فقرا وان البت دي عاملين ليها عمل او مسحوره صدقوا كلامها واخدوها علي شيخ معروف في منطقتنا وكانت المفاجأه بالنسبة للجميع انو فعلا عاملين ليها عمل وان العمل مدفون قدام الباب 00 انا شخصيا كنت لااؤمن بمثل هذه الخرافات ولكن موضوع البت دي وواحد زميلنا في العمل خلاني مش اصدق بل اقتنع تماما بان الدنيا فيها ناس كعبين ممكن يأذوك لاي سبب من الاسباب ولكن هنالك رب اقوي من اي شئ وصدقوني ليس هنالك اقوي من سلاح التحصين الصباحي والمسائي ويقول الرسول (ص) واعلم لو اجتمع الجن والانس علي ان يضروك بشئ لن يضروك بشئ الا كتبه الله لك الي اخر الحديث00 فدائما ياخواني اتسحلوا بالقران وبي اذكار الصباح والمساء زي ماقلت ليكم00 المهم مشينا نحن مجموعة وحفرنا في نفس المكان القال عليهو الشيخ ونفاجأ باشياء غريبة شعر وبيض وعضام وطلاسم غير معروفه ومكتوب اسم البت واسم فروجه طبعا فروجه اكيد الشياطين خافوا منو وشتتوا للبت المسكينة دي ثلاثة ايام البت قاعدة مع الفكي الي ان رجعت لحالتها الصحية ورجعت البيت علي ارجلها انسانة كانت فاقدة الوعي لاكثر من اسبوعين كانت بين الحياه والموت فجأه بقت ماشاء الله تبارك الله المهم الوضح انو البت عندها ودخالتها كان عايزها وهي رافضهو لسوء اخلاقه وهو زول منبوذ في الحي وسمعته شينة خلاص تصدقوا هو العمل العمل ده والفكي قال الزول العمل العمل ده حايجي جاري هنا ويقول هو الفعل ذلك وقد كان جا ودخالتها جاري يبكي ويكرش في جسموا ويصيح واي ياراسي واي بطني سامحوني انا العملت ده كلوا شوف عيني لاجابوا لي ولاسمعتو شفتو بعيوني وسمعتو بي اضاني دي الولد يكورك ويدردق في الواطة دي زي المجنون والفكي قال حتى الزول العمل ليهو العمل ده بكون بتعذب الان كان منظر الولد عجيب وغريب 00 الموضوع ذكرني واحد زميلنا كان راقد في المستشفي ثلاثة سنوات كان داير واحدة واتزوج واحده غيرها وعملت ليهو عمل لحدي ماودهو للفكي وفك ليهو طلاسم العمل ده حتي بقي كويس وياهو ده حسي قاعد منطط عويناتو المقعمزات ديل المهم البت بقت كويسة الحمدلله وعلاقتها بفروجه تمام التمام ولكن فروجه نفسيا تعبان وصارحها عديل كده انو مسألة الزواج دي حايتأني فيها شويه وربنا يسعدك مع انسان اخر وانا مع انسانه اخري اقتنعوا الاثنين بالامر الواقع ولم تنطقع علاقتهم مع بعض بل ازدادت اكثر بارتباط صاحبنا كمال باختها خطبناها وعرسنا ليهو طوالي عشان مايجينا ودخالة ولاعمة يعمل لينا سيك ميك وهم الان اسعد زوجين وعايشين حياه هنية وسعيده00 البت اتقدموا ليها ناس كتار جدا ولكن يبدو انو موضوع فروجه لسه معشعش في جواها والظاهر دايره تشوف نهاية فروجة طبعا فروجة حصل علي فرصة دراسة جامعية منحوها للمعلمين وتم قبوله بجامعة الجزيرة وسافر للدراسة وفي الجامعة كانت هنالك مفاجات عجيبة000
فاصل اعلاني ونواصل احبتي

حرام عليك يا أبو النسب
يا عمنا كمل القصة دي وخلي فواصلك الكتيرة دي ولا أحلف عليك اسي (أستخدم الفيتو) رايكم شنو ياجماعة عمنا محمد بركات واسماعيل الريح ومحمد أحمد أستخدموا ولا رايكم شنو

اها يا جماعة نشكركم كتيييييير على المتابعة
واهو حنكمل ليكم القصة الليلة وحانزل اربع حلقات كمان
من حلقات لميس ويحي اقصد فروجة والبت القبطية

[size=29]
نواصل موضوعنا اها قبل ما فروجة يسافر
قمنا نحنا اصحابوا عملنا ليهو حفلة شاي كاربة جنس لقيمات الواحد ياكل
ويتمسح وهاك ياشاي اللبن المقنن، قعدنا قعدة حلوه جدا وناقشنا امور كتيرة
مع فروجة، وطلبنا منو ان ينتبه لدراستة ويبطل امور الجكيس ده طبعا ضحك
ضحكة خبيثة فهمناها انو مافي طريقة ، اليوم التاني مشينا قدمناهو لحدي
البصات اها يافروجة وداعة الله عند الرسول وانشاء الله ربنا يوفقك وسافر00
فعلا وحشنا وترك فراغ كبير في الحي ، بعد اسبوع اتصل علي فروجة وقال لي
يامنتصر انا خايف اضيع بنات الجامعة سمحات خلاص لكن لحدي الان مافي واحدة
عبرتني، قلت ليهو اوعة يكون بتستحمه بصابونة الغسيل وبتمسح شعرك بزيت
السمسم، قال لي لا بمسح شعري بزيت فهد وبستحمة بصابون فنيك00 لاحول ولاقوة
الا بالله يافروجة ده ياهو زاتو المنفر منك الجكس00 ياخوي شوف قرايتك احسن
ليك ، مرت فترة طويلة فروجة لااتصل ولا رسل جواب وانقطعت اخباره شفقنا
عليهو قلنا امكن الولد مشغول بالقراية والمذاكرة وحاتكم يالغاليين اتاري
الزول غاطس في الحبكانا لي اضنينو الطوال ديل نحنا عارفنو مستحيل يقعد
ساكت والغريبة نحنا عارفين انو زول شين ومكجم ولو مشى من تلقاء نفسه عشان
يقرا لواحدة مستحيل تديهو فرصة لكن هو محظوظ الشين البنات براهم بتكسروا
فيهو العاجبم فيهو شنو انا ماعارف زول احرف جزار مايطلع منو نص كيلو المهم
زولنا جاء اجازة يومين خميس وجمعة وراجع نحنا ماصدقنا انو ده فروجة الولد
بقي حنكوش بياكل الايسكريم وشايل مناديل تشز ومتريح كمان ياخوانا القيامة
دايره تقوم ولاشنو ولابس قميص سمح ومكوي كمان زمان شوف عيني يغسل القميص
ويطبقوا ويختوا تحت المخدة ويقعد فوقو00 دحين الولد اتغير خلاص00 وقولوا
الكلام حيث ان وكذلك وحتما00 شئ عجيب، جانا في البيت امي قالت ليهو والله
كان مشيت القمر ياكا فروجة ابتلاليش00 امو حاجة فاطمة قالت لي شوف ولدي ده
الغربة جيهتو كيف00 المهم تغيير توتلي في فروجة نحنا عارفين فنانو المفضل
زيدان ابراهيم كان فالقينا بيهو فلقة شديده خلاص اما الان مابسمع الا
لعبدالحليم حافظ وام كلثوم وكت يقول ليك الحب هو المكتوب ياولدي00 تحلف
تقول كلب بعوعي00 سبحـــــان الله00 عقدنا اجتماع طارئ لبحث مسالة تغير
الاوضاع المعنوية والجسمانية والاخلاقية في الولد فروجة00 سالناهو مالك
ياولد الحصل عليك شنو قال لينا الجمال شنو والرقة شنو والاحساس شنو دي
قالت للقمر انزل انا اقعد مكانك شوفوا ياخوانا الولد مفصوم وحات ربي جن
تعرف عليها في الجامعة وزعوهم في قروب واحد سئلتوا كم سؤال رد ليها بكل
ادب تبادل نظرات ثم اعجاب تلبيت وقعت في حب فروجه00 قال معانا اولاد اوجه
بملايين المرات منو وكلهم كان عيونهم عليها00 ولكن سبحان الله اختارت
الزول الشين المكجم كجيم عدوكم ده00 ماقلت ليكم البعشوم ده محظوظ وعندو
عرق محبة، البت من طائفة اخوانا الاقباط حاجة سمحه عديل كده من اسرة ثرية
جدا تعلقت بفروجة بصورة غير طبيعية اصبحت لاتقوى علي فراقة لوغاب منها
ساعة واحدة هي تتصل عشرين مره ونسيت اقول ليكم هدت ليهو موبايل والله لو
شفتو شايل الموبايل وبتكلم بس اسماعيل ياسين الممثل00 كلو يوم يمر كانت
علاقتهم بتكبر والبت بتتعلق اكتر بفروجة00 حاجة فاطمة قالت ليهو سجمي
بتدور تعرس مصرية00 الاسرة كانت منشقة بين مؤيد ومعارض طبعا نحنا
السودانيين فهمنا للطوائف الاخري مختلف تماما يعني بالواضح اي طائفة غير
مسلمة معاناها كفار حتي الشيوعيون عندنا كفار 00 ده الفهم السائد عند معظم
اهلنا السودايين ولكن انا شخصيا ماكان عندي اياعتراض علي ارتباطه بتلك
البت وخصوصا انها ابدت موافقة تامة بانها حاتسلم ولكن كيف تقدر تقنع اهلها
بتلك الفكرة وكيف فروجة يقنع ناس بيتم00 اصبحت المسألة شائكة جدا وخصوصا
اصبح تعلق البت بفروجة لدرجة تدعو للخوف وكذلك هو تعلق بيها شديد 00 انتشر
خبر العلاقة دي بصورة رهيبة وكل الناس متابعة دايرة تعرف لحدي وين حاتقيف
تلك العلاقة الله يجازي محنك يافروجة00 ونواصل000

[/size]

طبعا فروجة داير يحاول اول زول يقنعوا
بالبت دي انا لانو عارف ناس بيتم بسمعوا كلامي كويس00 قال لي لازم تجيني
في مدني فعلا مشيت عشان اشوف البت الشطبت راس صاحبنا هي منو، وصلت مدني
حوالي الساعة 2.30 ظهر كالعادة قابلني فروجة مبسوط يرفع في نخرينو
العاملات زي شكمان العربية ده00 طبعا صاحبنا طوالي مسك الموبايل ترن ترن
ضرب لي البت الو هاي كيفك اتغديتي ولا لسه 00 قادر الله يافروجة البقيت
تقول هاي، قال ليها طبعا مونتي وصل وهو معاي حسي شوفو الولد بقي يدلعني
ويقول مونتي وحاتكم زمان غير منتصر مافي كلام وهو زاتو فروجة الدلع بيني
وبينكم ماخايل فيهو مره في بت سالتو قالت ليهو انت بدلعوك يقولوا ليك شنو
قال ليها اسي فروجة وبدلعوني بي (داؤود) بس اتخيلوا اسم الدلع ده 00 المهم
قالت ليهو خلاص الساعة خمسة نتقابل في الكفتيريا 00 والله ياجماعة الزول
ده علي بال ماتجي الساعة خمسة داير يجن يدخل ويمرق ماعرفت زاتو اتونس
معاهو التقول ضارباهو حمي ام برد 00 من الساعة اربعة زولكم واداني
الكفتيريا00 كلو مره يعاين لي الساعة قال لي الليلة الزمن ده اصلو مامشي
قلت ياود الناس ماتصبر هي الممحوقة دي ما كلو يوم معاك والليلة الصباح
كنتو مع بعض الشفقة والكبكبة في شنو قال لي وحشتني البت 00 استغرتك يامالك
روحي هو الحب ده تاري كدي 00 المهم بعد شوية اشوف ليك قنبلة جاية علينا
القوام كيف اللون كيف الشعر كيف اللبس كيف كلوا حاجة فيها اروع من التانية
ومهما حاولت اصف ليكم جمال هذه المخلوقة مابقدر شئ خرافي سلمت علي اليد زي
الحرير ماشاء الله انا ماعارف استحملت يدين فروجة الخشنات ديل كيف والله
الولد تقول شغال مونا حصل شفتو ليكم ايادي مشققة ديل يدين فروجة 00 المهم
خلونا مع البت الصاروخ دي 00 قالت لي هاي كيفك مونتي الظاهر فروجة قال
ليها اسمو مونتي ما اسمو منتصر00 البت طوالي قالت لي يامونتي طبعا من كلام
(فروجتي) لاحظوا كلمة فروجتي دي كيف ينعل ابو الحديد زاتو00 قالت لي انك
زول متحضر وواعي وحاتتفهم علاقتنا دي وتقدر تقيف معانا لاننا حانواجه حملة
شرسة سواء من اهلي او من اهل فروجة00 طبعا اخوكم خاتي يدو في خدو وقاعد
يسمع في الكلام الموسيقي ده وكان لي مراد مااعاين لي فروجة القاعد جنبي دة
بجيني طمام طوالي وفي سري كلو مرة اقول يافروجة الصاعقة التخبر بكان رقادك
بالله شوفو الجنا ده لما في بنية سمحة كيفن بعد مرات لما اعاين لي فروجة
بجيني طشاش وسبحان الله لما اعاين للبت بشوف سمح00 البت قالت لي انا حتى
لو اهلي اعترضوا وده الشئ المؤكد لكني مابتخلي عن فروجة حتى لو اضطر
للهروب معه الي اي جهة وماعندي مشكلة في سيبل الزول البحبو اعمل اي حاجة
وفروجة ينفخ في جضمو زي ضب الخلا00 قلت ليها والله موضوعكم صعب وداير تريس
وعقلانية شديدة عشان الناس تقدر تعرف الحاصل شنو00 المهم البت قالت لن
تتنازل عن فروجة باي ثمن00 حتي لو يكلفها حياتها ماعندها مانع00 قلت خلاص
انت حاولي اقنعي اهلك ومن ناحيتنا نحنا مافي مشكلة لكن انت ابدي اشرحي
لاهلك الموضوع وشوفي كلامهم شنو 00 اتفقنا علي هذا الاساس وقلت لي فروجة
انت في ورطة كبيرة جدا البت متعلقة بيك شديد وعلي حسب الشئ الانا شايفو
انو زواجكم مستحيل يتم لان البت مهما كان لن يسمح ليها اهلها بالارتباط من
شخص غير منتمي لملتهم00 المهم ربك يسهل ونشوف بكره الحايحصل شنو 00 انا
رجعت القضارف اليوم التاني وعلي طول شرحت لناس بيتم الموضوع لاحول ولاقوة
الا بالله اخواتو طوالي قالو فروجة اخر الزمن داير يعرس لينا كافرة المهم
انا قلت ليهم الزول ده اذا ماوقفتو معاهو حاتخسروه حاولوا اقيفوا معاهو
لان البت الله اعلم اهلها يوافقوا علي الزواج ده امو قالت لو عرس البت دي
حاتموت المهم جوطة شديدة جدا وبعد تعب شديد جدا ومشاورات واقناع رضوا
بالامر الواقع00 اتصلت علي فروجه فهمتوا الحاصل علي هذا الاساس جا راجع
القضارف عملوا نقة كتيرة معاهو ولكن في النهاية رضخوا بقينا منتظرين البت
00 وفجأه واحدة صديقتها تتصل بفروجة تقول ليهو البت كلمت اهلها والدنيا
انقلبت عندهم حبسوها في غرفة وقالوا ليها لو جبتي سيرة الموضوع ده ساكت
حانقتلك وقالوا ليها حانحرمك من الميراث وحانفعل ليك كذا وكذا والبت
ماهاميها شئ كل تفكيرها في حبيبها فروجة الله يجازي محنو كان جازانا00
انقطعت الاتصال بينهم بقت حلقة التواصل الوحيدة صاحبتها دي واهل البت لما
عرفوا بامرها منعوها من مقابلة البت00 فروجة دخل في حالة نفسية واحد اخونا
اسمو حيدر قال لي فروجة والله المرة دي تعمل لينا فيها عندك نفسيات وداير
تمشي المستشفي والله اصمتك بي كف تقول كفتني شيطان00 كان باين علي فروجة
الالم والحزن والسرحان 00 الاخبار مقطوعة لاعارفين البت حية ولا ميته00
منعوها طبعا حتى من مواصلة الجامعة عشان ماتلاقي الولد فروجة ابرويس مطاول
ده00 ساد نوع من الصمت الرهيب والكل في حالة ترقب انو في مفاجاة حاتحصل
وقد كان00 ونواصل0

محمد احمد راشد كتب:: عصام وانا صغير كنت مغرم بمغارات الشياطين ال13 لكن خليتها تعرف ليه....؟
لانو كانت هناك مغامرة فى جزئين ..فتشت للجزء التانى مالقيتو...بحثت كل المكتبات مافى فايدة...من ديك حلفت اى مغامرة ابداها من الاخر .عندها نهاية ببداها ما عندها الله معاها...
اها اعمل حسابك ماتبقى عليك الحكاية وكمل القصة...

تحياتى يامبدع سلام خااااااص لاسامة.

وين يا ابو حميد وجمعة مباركة
لا ان شاء الله ليها نهاية والقصة لقدام سمحة انتا زاتك حتتمنى انها ما تنتهي
بالله بورسودان كيف والشرق كيف
وتحياتنا لكل الأهل
واسامة ود الخليفة ببلغك تحياتتو
وتسلم ثم تشكر للمرور

اسماعيل الريح بلال كتب:: ياعصام يارائع فروجه صــــــــــــــــــاحبك ده خفاف سعد اصله في ناس زي ديل البنت تكون بايره ليها زمن اول مااتكلم فيها باكر اظهرو لها اولاد اعم واخله خشمه ملح ملح
عندنا زميلتنا في الشغل عمره عمل 45سنه ماتدينا فروجه ده اخفف لينا سعدها ونرجعه ليكم ده لو ما اتزوج

تسلم يامبدع

ههههههههههههههههههههههههههههههههههههههههه
الله يجازي محنك يا اسماعيل قلت لي مما يجي العريس يظهرو اولاد العم العوارض
(اوع يجي واحد من اولاد عم العروس البوست دا نبقى في خبر كان Razz

)
اها زميلتكم دي بتاخد كم اقصد من اولاد وين
والسمسار او الخطاب او واسطة العرس ليو نسبة كم
صدق انا الى الأن القصة ما تميتها لكن لو فروجة ماعرس عندنا الف فروجة Razz

تسلم للمتابعة
وخليك قريييييييييب

محمد بركات احمد كتب:

عصام ود الخليفة كتب:: الأخوان
محمد أحمد
اسماعيل الريح
محمد بركات
بمش وارد عليكم واحد واحد وجااييييييكم بالباقي
بس ما تشفقو والتقيل قدااااااااااااااااااااااااام
فروجة دا لو ما قطع مصارينكم من الضحك انا ما عصام

تسلم ياعصام والله شفقانين شفقة اصله الصبر دا مافينا دحين الكع ساي ماعندنا اي شغله غيرفروجة الفورة مليون غايتو انا شفقان اما ودراشد واسماعيل امكن ينتظروك

محمد بركات المبدع والمتألق دوما
جمعة مباركة
ياخ انا معجب بيك عديل
واهو نزلنا ليك حلقتين وهسع حاتبعها ليكم باتنين
وتبقى اربعه والحلقات من غير اي فواصل اعلانية
بس خليك قريييييييييييييب
وتسلمثم تسلم ثم تسلم يا ابن العم

حرام عليك يا أبو النسب
يا عمنا كمل القصة دي وخلي فواصلك الكتيرة دي ولا أحلف عليك اسي (أستخدم الفيتو) رايكم شنو ياجماعة عمنا محمد بركات واسماعيل الريح ومحمد أحمد أستخدموا ولا رايكم شنو[/quote]

ابو النسب كيفك
اها انتا جبت لي هوى ساي واهو هسع تميت القصة والجماعة حيقولو نسيبو هرشو
والله يا ابو النسب جبناك فزع بقيت لينا وجع
واهو هسع حاتبعها ليك باتنين بس اوع من (استخدام الفيتو )
وتسلم للطة البهية

تحياتى ياودالخليفه والله انا لى كم يوم متابع مسلسل فروجه دا وقلت مابرد الا اشوف الحلقه الاخيره

لكن شوقتنا شديد بى فواصلك الكتيره دى زى تلفزيون السودان عشان كده طلعنا قرار ادارى وهوممنوع وضع اى موضوع به عدة اجزا بالذات اذا كان موضوع ممتع ومشوق ومثير عشان الناس دى شمارها كتير Very Happy

ودايره تعرف الحاصل على صاحبك شنو بتزوج القبطيه ولا .....................
ياود راشد رايك شنو فى القرار ده
اها هدى قعده النشوف اخر فروجه شنو

اسرع ياودالخليفه بشوف فواصلك كترت الله استر ما اجونا ناس MPC مصطفي الاغا اقولوا لينا اعملوا توقعات فروجه بتزوج القبطيه ولا مابتزوجه والجائزه شاشة بلازمـــــــــــا 21 بوصه
ارسل الاجابه علي تلفون 09xxxxxxx
اما عن زميلتنا فلن نرضي سوي فــــــــــــــروجه بديلا امكن فراريجك الجديده ده اكون عندها انفلونزا الطيور لكن فروجه صاحبك ده شكلوا بلدي اصلي من ايديه المشققات ديل

تسلم ويسلم فروجــــــــــــــــــــه الكع الكع الكع ياخال

قوووول الواقع اكان خير يعم وكان كدىكدى خلص نفسك سريع بس كمل بالحقيقة