أغنيات وشعراء مصطفى سيد احمد

ياسر احمد بركات كتب:: مشكور اخى مصطفى دعوب والله فعلا مصطفى سيد احمد فنان كبير وصوت شجى

حقاً مصطفي سيد احمد انسان مبدع
وخاصة كلماته فيها شئ من الإبداع .
وتسلم علي المرو ياسر احمد بركات

ودالسديرة ابوحداد كتب:: اديك العافية دعوب يا مبدع

مشكور علي المرور ود السديرة أبو حداد
ونتمني أن تكون متابع معنا في هذا البوست لأن هنالك الكثير من أغاني مصطفي سيد أحمد سيتم إنزالها هنا

ادينى احساس بالامل مدني يوسف النخلي

ادينى احساس بالامل
فى كل رحلة شوق تطول
وادى الخطاوى الراجعه
ليك فى سكتك عشم
عشق حلم الوصول
ما الدنيا كلها انتظار
والارتحال قدر الوصول
الموجه تحلم بالضفاف
والغيمه تحلم بالهطول
راحل معاى ضى الامانى
وذكرى للايام هناك
لحظات بتزخر بالمعانى
وكيف انسى تذكارت هواك
نتحمل الغربه ونعانى
ونصبر عشان نكسب رضاك
ونغنى لو زاد الحنين
ياريتو كان سفراً معاك
ياريتو كان سفراً معاك
ادينى احساس بالامل

جواز سفر

والله نحن مع الطيور الما بتعرف ليها خرطه
ولا فى ايدا جواز سفر
نمشى فى كل المداين نبنى عشنـا بالغناوى
وننثر الافراح درر
الربيع يسكن جوارنــا والسنابل تمـلا دارنا
والرياحين والمطر
والله نحن مع الطيور المابتعرف ليها خرطــه
الحبيبه تغنى لينا
لا هموم تسكن دروبنا ولا يـلاقينـا الخطـر
وين يلاقينا الخطر
لوبقينا مع الطيور المابتعرف ليها خـرطـه
لما باكر ياحليوه لما
اولادنا السمر
يبقوا افراحنـا البنمسـح بيها احـزان الزمن
نمشـى فـى كل ااـدروب الواسعــه ديــك
والـرواكيب الصغيـره تبقـى اكبـر من مدن
ايدى فى ايدك نغنى
والله نحن مع الطيور المابتعرف ليها خرطـه
ولا في أيدا جواز سفر

نورا محمد الحسن سالم حميد

وكتين يضيع عرق الجباه الشم
شمار في مرقه
آه .. يانوره آه
من دربك التور نفس خيل الصبر فتر
خطاوى الشوق وراك آه يا نورا آه
ساعة الشموس الغر تهضلم
تلحق الصبح فى المغارب
يستر الضو الكهارب
تستر المدن الضبابية السرابية ..الكآبة
حائط التيه والطشاشات فوق
قفيك يا أم عوارض
يا ام عوارض مو دعاشه ماها شبوره وتقيف
جايي ليك يانورا غيمه
تملأ ماعونك خريف .. يملأ عينيك ويفضل
يروى جواك العطاشا .. مو دعاشه ...
يا نفس فجر القصائد .. يا بلادى
دا القطع قلب الروادى باللواج الجاى وغادى
ماهو صوتك .. لاها صورتك
دى البترشق نادى فوق صدر الجرايد
إنت يا حضن الصحارى
شفع العرب الفقارى

نورا

البغنوا الشايلا إيدهم ويجروا كايسين القطارى
لا سراب الصحراء مويه لا حجار سلوم موائد
حالكم البصرخ وإنادى يا وطن عز الشدائد
يا هدى الناس الحيارى
يا ندى الفجر الببلل نور عوينات الفقارى
جاي ليك يا نورا آفه
آفه للسوس البينخر عود عشيماً زاخرو فيك
أصلى لمن أدور أجيك
بجيك ،، لابتعجزنى المسافه
لا بقيف بيناتنا عارض
لا الظروف تمسك بإيدي
ولا من الأيام مخافه
يا نفس فجر القصائد
ما ضهب فى بعدى عنك
أصلى متغرب عشانك راضى
بالجايينى منك
ما شكيت شح الليالى
ما بكيت نح شلتو حالى
رغم إنو الحال بيفضح
إلا كت فى الحاره بصرخ
يا وطن عز الشدايد
يا وطن عز الشدايد

الدنيا ليل / عبد العال السيد

الدنيا ليل
غربة ومطر
وطرب حزين
وجع تقاسيم الوتر
شرب الزمن فرح السنين
والباقى هداهو السفــر
يا روح غناي
الغربة ملت من شقاي وغربتى
وبقيت براي حاضن أساي ووحدتى
لا غنوه .. لاموال يبدد حسرتى
الوحشة ملت من أساي ووحدي
غير الدموع يا مُلهمــه
الغربة مره ومؤلمة
قولوا للنيل ضفه .. ضفه
والعشيات لما تصفا
والنسيمات البتاخد
من عفاف ريدتنا عِفه
إنو شوقى .. يفيض بحر
شوقي شوق إنسان مضيع
ضيعُو الليل والسهر

شوقي شوق إنسان معذب
عذابوا لافحاتك الليل والسهر
لا ينابيع ريدي جفّت
لا ولا أشواقى خفت
كل يوم في غربه زايده
وبيها كل الدنيا عرفت
الدنيا .. ليل
غربة ومطر

عباد الشمس / قاسم أبو زيد

عباد الشمس شافك .. مشاك
ساقك جبيره
وجد تيار الظلام غطاك
غياب البهجة ما هزاك
هواك هزّ العهود بالصد
تذوب يوم الشمس ضوّت
عباد الشمس يوم جاك
سألنا الغيم عنادك ردّ
أسى فى بُعدك حروف جفّت
جدار الماضى دمعة خد
غفل طرفك صرخ
ياليل .. ياليل .. ياليل
سرق عشقك صباحاتى
شتيل إحساسنا ما فرهد
رحل صوت المغنى حزين
ولسه الصوت صراع زمنى
مواعيد عشقى ما بتنهد

من بعد ما عزّ المزار عبد العال السيد

من بعد ما عزّ المزار
والليل سها وملت نجوموا الإنتظار
والشوق شرب حزن المواويل
وإنجرح خاطر النهار
وبقيت أعاين فى الوجوه
وأسأل عليك وسط الزحام قبّال أتوه
يمكن ألاقى البشبهك
ما الليل براح والشوق تعالى بيندهك
شايلاهو وين النيل معاك .. عصفورة
جنحاتها النجوم وأنا بى وراك
بسأل عليك مدن ,.. مدن
وأعصر سلافة الليل حزن
بسأل عليك فى المنفى فى مرفأ السفن
يمكن طيوفك أُخريات الليل تمر
تملأ البراحات للحزين طول العمر
ما نحن بينّا الأمنيات والتضحية
بينّا المعزات والعزابات فى الحياه
بينّا الهوى إحساساً على قلب إنكوى
وكلام قديم قلناهو آخر الليل سوا
إنو راح نتلاقى لو طال النوى
لكن كلامنا الكان وكان .. خايف
يكون شالوا الهوا

صابرين محمد طه القدال

صابرين
ياحزن الغنا صابرين من بعد الضنا
على وعد المنى صابرين
برجاك ياوعد الحبيبة
وبلقاك فى الفرحة القريبة
وبشراك يا أم الثناء صابرين
لا ليل ولا حزن طائل
لاصد ولادمع سائل
لا هم جاك يا أم نفايل
والنيل فاض وإنحنى
نيلين وحلمك انا
فرعين شايلين جنى صابرين
عشرات حبابك .. سلامات
أسلم شبابك .. سلامات
شايل سحابك .. سلامات
والقبلى شابك .. سلامات
خيرك سنابل .. وهواك هنا
قلبين عاشقين ترابك
سلامات

شوق الشوق

شوك الشوق للشوق ياخى
ضارب غصن النسيج الحى
منقاش احزانى مشرد وادى الفرح اتمدد حى
يارعاة العرب الرحل مالاقاكم فى المطرانة
فى كاويق الجرف الاحمل بين ساساق الغيمة عليكم
فى رقراق الخيمة معاكم مااديتو شويهى بحرجل
شوك الشوق للشوق ياحى ضارب غصن النسيج الحى
يامنقاش احزانى مشرد وادى الفرح اتمدد ضى
يارطانه الليل ان ليل لا قلكم فى ونساتكم
فى قعداتكم بين كاساتكم فى خلواتكم بين صلواتكم
زولاً زول الله ان محن اما بسأل
العباد لى غلب اخواتو الفَّرح عوان الحلة
عرق العرق البضوى سباتو نار الشجر الاخضر ضو
نار الخضر جاتو والعربات جات تسال منو
والغابات تنشد جياتو
اديناهم عرقوا ... وعلقوا صورته ... تلعب فى كفاتو
رسم طوريتو ولون ابرولو ومس طمبور إلى نغماتو
الف شليل يانورا يفوتوا عشان
مايجيك شليلك زاتو

العمرٌ مدني يوسف النخلي

مابان عليك سفر العمر لسه الربيع يادابو زار
لسه الضفاف المترعة بتفيض ندى وبتدفق ثمار
وانا جوه قلبى المشتهيك نزفت جراحات الودار
يانخله طالت بالفرح بتراقص انوار المسـاء
مابان عليك اثر القطاف ولاجاتك ايام القسا
ما أروعك انتي الشباب بحمرة الريد اكتســـى
وانا جوه قلبى المشتهيك نزفت جراحات الودار
جوه العيون اطفال فرح لمـــــه زفـــاف
جوه العيون تشرق دموع برحــل جفـــاف
وحنان غمر عاشقين رهاف
وانا جوه قلبى المشتهيك
نزفت جراحات الودار

بين مريم الاخرى والمجدليه/ محمد ابراهيم شمو

هاهى الارض
تغطت بالتعب
البحار اتخذت
شكل الفراغ
وانا مقياس رسم
للتواصل والرحيل
وانا الان الترقب
وانتظار المستحيل
انجبتنى
مريم الاخرى
قطارا وحقيبه
ارضعتنى
مريم الاخرى
قوافى
ثم اهدتنى المنافى
هكذا قد خبرونى
ثم قالوا لى
ترجل
ثم انت
انت ياكل المحاور
والدوائر

ياحكايات الصبا
تحفظين السر
والمجد الذى
مابين نهديك اختبا
ليس يعنيك الذى
قد ضاع من عمر ى هبا
وانا
لست ادرى
ما الذى يدفعنى دفعاً
اليك
مالذى يجعلنى
ابدو حزينا حين ارتاد التسكع
فى مرايا وجنتيك
لاعليك
فعلى هذي السفوح المطمئنة
نحن قاتلنا سنينا
واقتتلنا
نحن سجلنا التآلف
فى انفعالات الاجنه
واحتوانا البحر

والمد البيقاوم
والشراع
ياهذه البنت التى تمتد فى دنياي
سهلاً وربوعاً وبقاع
ما الذى قد صب فى عينيك
شيئاً من تراجديا الصراع
والمدى
يمتد وجداً عابراً هذى المدينه
خبرينى
هل انا ابدو حزينا ؟؟
هل انا القاتل
والمقتول حينا ؟؟
والرهينه
هل انا البحر الذى
لايأمن الأن السفينه ؟؟
خبئينى بين جدران المسام
قبلينى مره في كل عام
فأنا اشتاق
ان اولد

فى عينيك طفلاً
من جديد
ارتدى اللون البنفسج
اعتلى شكل الهوية
ضيعتنى
مريم الاخرى سنينا
فى انتظار المجدليه
آه
لو تأتين آه
من عميق الموج
من صلب المياه
كالرحيل
كالترقب
وانتظار المستحيل
كالترقب وانتظار المستحيل .

الشجن الاليم صلاح حاج سعيد

عارفنى منك ..
لا الزمن يقدر يحول قلبى عنك
لا المسافه .. ولا الخيال
يشغلنى منك

وتحرمنى منك ...
والمواعيد لا بتجيب منك تودى
لا الشجن قادر يشيلني عليك اعدى
لا التحايا ...
ولا المشاعر الحيه فى جوه الحنايا
لا رساله تجينى منك
لا خبر طمنى عنك
وانت سايق فينى ظنك
رغم انك
انت عارف
انو منك
لا الزمن يقدر يحول قلبى عنك
لا المسافة ولا الخيال يشغلنى منك

ببقى بعدك فى الاسى
وتبقى انت الظالم القاسى النسى
وغصب عنى اريح ظنونى
واقول عليك
انت المسامح
وفوق شجونى
اعيش زمان بالفرقه جارح
وفى احتمالى وبالى انك
وانت سايق فينى ظنك
رغم انك
انت عارف
انو منك
لا الزمن يقدر يحول قلبى عنك
لا المسافة ولا الخيال يشغلنى منك

ياهوى الالم النعيم
خليك على الوعد القديم
خلينى فى الشجن الاليم
وابقى فى كل المداين ..

سكتى وسفرى الجحيم
تبقى ايه الدنيا من بعدك تكون
وابقى ايه بعدك اكون
مافى احتمالى وبالى انك
وانت سايق فينى ظنك
رغم انك
انت عارف
انو منك
لا الزمن يقدر يحول قلبى عنك
لا المسافة ولا الخيال
يشغلنى منك
عارفنى منك

يامطر / محمد الحسن سالم حميد

من الواسوق أبت تطلع
من الأبرول أبت تطلع
من المدفع طلع خازوق
خوازيق البلد زادت
يامطر عز الحريق
يامصابيح الطريق
يالمراكبيه بالبتجبد
من فك الموج الغريق
جينا ليك والشوق دفرنا
يا نشوق روحنا ودمرنا
يالمحطات الحنينة
القصرت مشوار سفرنا
ياما شايلك فينى حايم
لا الليالى المخمليه
لا العمارات السوامق
لا اللاسامى الاجنبية
بتمحى من عينى ملامحك
وانتى جايي المغربية
داقسة دايشة المغربية
وشك المكبوت مكندك
سامسونايتك زمزمية

كون شبر
طورية ..
منجل ..
سبحة ..

فانوسا مدردح
قلتى بيهن لى زمانك
يازمان الحاجة عندك
يازمان الاهة حدك
لاتطأ الوردة الصبية
لا تطأ الوردة الصبية

الزمن الفلانى / نجاة عثمان

لمن يجى الزمن الفلانى
سمانا بتقطر مطر
درى و تمازج
برتكانى

نسطر اسمك يا حبيبنا
فى رموش غيم ارجوانى
ندمن الضحك المعافى
نحيا فى الفرح المورد
ياسمينى واقحوانى

ياحبيبنا
جوا عينيك عايشه ناس
بتسجل الايام اغانى
والطريق ما ببقى ساهل
ليك بالمعنى المكانى

لما يتحقق زمانى
بمسح الحزن المعشعش
فى عيونك اسمرانى
ياحبيبنا

الزمن الفلانى نجاة عثمان

بتحيا فى حلم الترابله
وفى العلاقات
المعانى

وفى البقاسى شقى المسافه
وعايشه فى داخله ويعانى
لما يتحقق زمانى
بشرق الفجر الحقيقه
والصباح الابيضانى

رعشة الشوق محجوب الحاج - ابوالسيد

مرة بقصد احكى عنـك
وقولى من طابعه الاشارة
شوفو ديك القمرة بانت
والنجوم حاطت مدارا
غيبوا اتلاشوا فى عيونا
وغوصوا فى اعماق بحارا
وابقوا اعرفو من صفاها
كيف صبحت اسير هواها
ورأسى فى ابعاد قرارا
الا لو مرات سرحت
قمت لمحت وقرونى
وعرفوا كل البينا عامر
اصله باين فى عيونى
اعرف انه بحسن نيه
باحت الاعين شويه
افشو سرى وغافلونى
واتعرف ريدك متاعب
وانو فكرى واقتناعى
والسعاده الضاله كونى

ويسألك ياذاتى عنك
البراءة الفى عيونك
الرزانه الفى انفعالك
والضجيج الفى سكونك
انت ابعد من خيالى
ورعشة الشوق فى سؤالى
بتحكى عن ابداع محاسنك
وعفة الطبع البصونك

[u]سمحة وسمرية / محمد طه القدال[/u]

سمحة وسمرية ومحبوبتى
ولفتاتا غزالة
خضرة ومسقية وجنب النيل
مشتوله الناله
بهواك يابنيه
كتبته قصيد .. وبقوله مقاله
يالنفحتى فى معانى غناى
تدليها مجالا .. زهرة وبريه
بشوق الارض عيونا كحالا
تريانة ندية بعرق الناس
والناس فى بالا
ياخوفا على عقل وثابت
ما ها الولواله
من فرص البى
قلعت الخوف
وكستنى بساله
قلتيها النيه .. متين نتلم
والحال بطاله
قالتلى غنيه وانت معاى
مستورة حاله
بت سودانيه .. ومحبوبتى
ولفتاتا غزالة

يا سلام عليك لما تهتم باغاني مصطفي سيد احمد
انه يختار مفرداته بحسه الفني ويمتلك قدرات لا يملكها فانين اليوم انسان مبدع غني للوطن وطني ولا ملي بطني سوداني ولا الكلام الني وغني للحبيبة نفسي في داخلك اعاين وغني للمشردين من الوطن بسبب سياسة ثورة الانقاذ حكومات تجي وحكومات تغور وفي اخر حكومة الفقر الدمار الكضكب والصهينة
في بعض الناس يطلق عليه فنان الطبقة المثقفة ولكن هذا خطا
مصطفي غني للجميع
وتقبل تحياتي يارايع

ابراهيم الحويلة كتب:: يا سلام عليك لما تهتم باغاني مصطفي سيد احمد
انه يختار مفرداته بحسه الفني ويمتلك قدرات لا يملكها فانين اليوم انسان مبدع غني للوطن وطني ولا ملي بطني سوداني ولا الكلام الني وغني للحبيبة نفسي في داخلك اعاين وغني للمشردين من الوطن بسبب سياسة ثورة الانقاذ حكومات تجي وحكومات تغور وفي اخر حكومة الفقر الدمار الكضكب والصهينة
في بعض الناس يطلق عليه فنان الطبقة المثقفة ولكن هذا خطا
مصطفي غني للجميع
وتقبل تحياتي يارايع

مشكور الاخ / إبراهيم القادم بي قوة

وكما أعرف انك عاشق لأبو عركي البخيت يا ريت لو تعطينا شئ من أغانية