أغنيات وشعراء مصطفى سيد احمد

فى طريق الليل مظفر النواب

فى طريق الليل ضاع الحادث الثانى
وضاعت زهرة الصبار
لا تسل عنى لماذا جنتى فى النار
فالهوى أسرار
والذي يقضى على جمر الغضاء أسرار
بالذي يخفى الهوى بالصبر
يا با لله كيف النار تخفى النار
يا غريب الدار إنها أقدار
كل ما فى الكون مقدارله
وأيام له الا الهوى
ما يومه يوم ولا مقداره مقدار
لم نجد فينا قطار العمر
يدنو من بقايا الدرب
من ضوء على شئ وقد ضج الأسى أسرار
كنت تدعونا فأسرعنا
وجدنا هذه الدنيا محطات بلا ركاب
ثم سافرنا على أيامنا أغراب
لم يودعنا بها إلا الصدى
أو نخلة تبكى على الأحباب

يا غريباً يطرق الأبواب
نحن من باب الشجى والزخرف الرمزى
والألغاز والمغزى
وماغنى على أزمانه زرياب
كلنا قد تاب يوماً ثم الفى نفسه قد تاب عما تاب
كل ما في الكون أصحاب وأيام له
إلا الهوى
ما يومه يوم ولا أصحابه أصحاب
كم طرقنا بابك السرى فى وجد وفى خوف
لم تجبنا فإبتعدا فرسخاً هجراً
فألفيناك سكرانا جدابات
فلم تغفر ولم نغفر كلانا مدع كذاب
كل غى تاب إنما غى وغىٌ فيك قد غاب
وراء النرجس المكتوب للعذاب
لا تسل من عادة أن تكثر الأقوال
فى من ذاق خمر الخمر فى المحراب
لم يقع فى الشك إلا أنه من لسعة
الأوساخ تنمو خمرة الأعناب
نبه العشاق مدنف أودى بلا هجر
ولا وصل بباب الطاق

مرهق من خرقة الدنيا على أكتافه
لم تستر الأجساد والأشراق والأشواق
مُوغِل فى السر مُندسٌ بنار الوجد
فى الأعماق ما أبعد الأعماق
لم يفق يوماً ولم يأبه بمن قد فاق
مرهف مشتاق كله أشواق
أثملته الخمر صحواً فانبرى يبكى
وأطفال الزمان الغر لجوا حوله
سخرية فى عالم الأسواق
قل لا هل الحى هل فى الدور من عشق
لهذا المبتلى ترياق
نأمةٌ فى العشق تكفى .. نقطة تكفى
فلا تكتر عليك الحبر والأوراق
كل ما فى الكون تنقيط له إلا الهوى
فأحني فالتنقيط نهوى وأسال العشاق

نفسى فى داخلك أعاين بشرى الفاضل

نفسى فى داخِلك أعاين
أروى روحى وأشوف منابعك
صحراء فى عينىّ تتواثب جناين .
ماخده صوتِك من جداول
وماخده صورتِك من كهارب
مولداً ميدانو حافل
كل ما يصبّح تجيهو الناس جحافل
يا سلام
لما تعبرى فى الشوارع
شوفى كيف الناس تصارع
ناس تطّفر وناس تدفر
فى البشابى على نجومِك
وفى البخت كايس تخومِك
وكل زول من عند سُلافِك
لا لا قال دايرلو كاس
مرة طربان شلت صورتِك
شان أغنى وقلت آه يا ليل وآه
إنت أول
وإنت ثانى
وإنت تالت
وإنت رابع

نافرة زى صيد الخلا
وصافية زى نبع المنابع
وقلتى لى غنَّاى خلاص
لما في العيني تفتح
المطر غسل الهجير
وبيوتنا ضالاها الطراوة
لما في الكون شقاوة العديل يبقالنا مايل
ما ني حيران الا لكن كيف أحبك
أقوي بكل الوسائل حب جديد
وعميق وهائل
حلوة عينيك زى صحابى
عنيدة كيف ؟
تشبه شريحتين من شبابى
غريبة ذي شردة سؤال من جوابى
زى عنب طّل معتق فى الخوابى
وسمحة زى ما تقول ضيوفاً دقوا بابى
فرحى بيهم سال ملأ حتى الكبابى

البت الحديقة / خطاب حسن أحمد

حا تجى البت الحديقة
فارده أنسام فى طريقها
شاتلة الوان
حاتجى البحدث بريقها
ضجة الضو فى المكان
حاتجى المن بدرى جات
من ضلامات السكات
شايلة قمرين فى عيونا
وفاتحة ليلين بى جنونا
وضاوية ساحات إنتمت لى فجر فات
وينتمى لعصور جديده
حاتجى البت البريدا
ضاحكة منقسمة وعنيدة
آملة مزدهرة شديداً
وناقشة فى الزول أغنيات
حتجى المن بدرى جات
ناسفة أزمان السبات
واصفة للناس الطريقة
وللعصافير الجهات

*********************************
ليه غبت يا القمرا / قاسم أبوزيد

ليه غبت يا القمرا
نركب جياد الليل
ينشرّا بينا صباح
سفر العتامير ليل
نرجاك فى المطرا
أرجع تعال يا شليل
درع الأميرة سِرق
سوه حدوة خيل
بحر العطاشك نِشف
نشرب بواقى السيل
صد لى ملامحك يا حراز
ريح العوارض غرّبت
فرتق ضفايرك فى الرزاز
جبة العصافير قرّبت

حليوة ليلة المولد / محمد طه القدال

أه بقول غنوات بقول غنوات
فى البلد البسير جنياتها لى قدام
ولى الولد البتل ضرعاتو فى العرضة
ويطير فى الدارة صقرية
ولو السمحة تلت إيدا ومدت جيد
تقوم شايلاهو هاشمية
ويشيل شبال ختفه ريد وفرحة عيد
وريد روح وحمرة عين وإيدية
ويا الولد البشيل مدقاقو
قولة خير على القمره
يقابل الجاية متحزم
ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليه قمرية
وقبال حول تغيم غيمة قبلية
ترش الدارة والحدبة الصعيد الحلة
ويا فرحة بتطارد الصفقة فى النسمة الصعيدية
ويا جهرة نهار الليلة بدرية

تصبح جنياتنا فى الحدبة الصعيد الحلة
يا سمحاتنا هو لبلب
يا قمحاتنا هو لبلب
ويا اللوز الفتق فى الوادى هو لبلب
ويا البحر الطمح مدادى هو لبلب
ويا حجواتنا ويا صلواتنا هو لبلب
سألتك بالذى ركز الأرِض معبد
وسوى الناس عليها مقام
سألتك بى حشا الأُمات ودمعاتا
سألتك بى كبيداتن وعويناتن
شليل وين راح
تكون ضل الخريف فاتنا
شليل وين راح شليل وين فات
وزى برق السماك الجابها دغشية
وزى زغرودة البطن الكبارية
مرق من شامة القمره مهيقن بي وداعة الله
ومقدم بالعديل يبراك
تعالوا تعالوا أبشروا آجنيات
شليل ما راح شليل ما فات

شليل عند المسورو حِرق
بقالوا حصاد
شليل فوق التقانت قام خدار وبلاد
شليل مسدار شليل مشوار
شليل أرضنا آحبنيات
شليل قايم نصالص الليل
يتمتم ليلو وردية
حرازنا شليل شليلنا دليب
شليلنا دليل على البلدات على درب التبلدية
شليل ما راح شليل ما فات
شليلنا ونحنا همباته ومهاجرية
مزارع بات على عشقين
تراب بلدو وسماح فوق بت مزارعية

كيف أنساك محمد مريخا

كيف أنساك
وإنت الجرح النازف
منو خريف العّته
خريف المحل الما بدارك
ونجم الطالع شيّل وختا
رحل الديرة وهج وديرة
فرع الحنة النوّر حته
جرحك نيلة وسيرة طويلة
وشافي البلسم أبا يتخته
سبر العاشق كتر الليمة
ولم الشمل الروح شتا
سبر الروح الكلمة الزينة
ونفسا طيب مالى الحتة
غلب الراوى تملى حكاوى
وغلبا زيك مااتعودت
آهة حزينة وأنة دفينة
تخفف عنى لماما حتى
كيف أنساك وليل الشارع

رمّ ستايرو وقفل الحته
وبرج الدالى أنشر بدالى
حوش ليك أيامى الستة
يوم الليلة يمر بى صبرو
أحلام باكر كيف تتأتى
يا مغلوبة وغالبة زمانك
كيف أنساك محال البته

عدى فات / صلاح حاج سعيد

عدى فات زمن العيون الألفة
والحضن الملاذ
ورهافة الحس البلون
ضحكة الناس العزاز
بعد الحنان الكان زمان
إستوطن المطر الحراز
روح زمانى وفى رجاك
عانيت قساوة الإنتظار
فى ضل شبابيك السفر
صادقت ليلات المواني
الساكنة فى بحر الأماسى بتنتظر
لو يوم طيوف لحظك تفوت
تعبر خيالاتك تمر
قلق المواعيد الضجر
سهر العيون الإحتراز
وإتعزز النوم الخزار
وإتمدد الشقى فى العمر
مليت تباريح الجراحات
وزمنا قسى وحالا أسيف
ومشيت عن خطاويك القبيل

أضارى من زمنا وراك ملانى خوف
إحتجت أرتاح فى عيون
فيهن ملامحك ذاتا من غير أي زيف
وإشتقت لى ضحكة صباحك
والدعاش عطر رزاز مطر الخريف
وأنا وإنت والدنيا الأمان
والناس وفا
وخوة صفا
ودفء المشاعر الشاتيه صيف
أنا وإنت والدنيا الأمان
زمن الغناوى الطالعة من قلبا رضى
وحسا ندى وزوقا رهيف
أنا وإنت والدنيا الأمان
ما العمر شتان بين أوان زمنا حييتو
وعمر ما بتقدر بتعرف
بكرة يصبح حالو كيف
عدى فات

غناء العزلة ضد العزلة / الصادق الرضي

الُحزن لا يتخير الدمع ثيابا
كي يسمى بالقواميس بكاء
هو شئ يتعرى من فتات الروح
يعبر من نوافير الدم الكبرى
ويهرب من حدود المادة السوداء
شئُُ ليس يفنى في محيط اللون
او يبدو هلاماً في مساحات العدم
الحُزن فينا كائنُُ يمشي على ساقين
دائرةُُ تطَوف في فراغ الكون
تمحو من شعاع الصمت
ذاكرة السكون المطمئنة
كيف ترفَضُّ الجدائل فِضة في الضوء
ترفِضُّ الفقاقيع
ما بين إمرأة الرزاز
إشارة للريح في المطر الصبي
إضاءة في الماء
خيطا من حبيبات الندى
سحراَ .. صلاةً .. هيكلاً .. قوسَ قزح
ذلك سر الكون
أن تبصر في كل حسن آية لله
أنوارا من الملكوت والسحر الإلهي الرهيب

ذلك سر العدل
أن تنفجر الأشياء تُفصحُ عن قداستها
ترى في الشئ ما كان إحتمالا
ثم تنفتح الكنوز
الأرض كانت توجد القمح لأطفال لها
فقراء لا يتوسدون سوى التراب
قل للذين يوزعون الظلم باسم الله في الطرقات
الله في نار الدموع
وفي صفوف الخبر
والعربات والأسواق
والغرف الدمار
البحر ياصوت النساء الأمهات
القحط ياصمت الرجال الأمهات
الله حيّ لا يموت
كيف استوي ماكان بالأمس هواءاً نتناً
ريحاً بغيضاً
بما كان هواءاً طيباً
ريحاً يؤسس معطيات الشارع الكبرى
عبيراَ ضد تلك الرائحة
ما أشبة الليلة بالبارحة
كل ما كنا نغنيه على

شارع النيل تغَيّب
وانطوى في الموج منسيا
حطاماً في المرافئ
او طعاما للطحالب
ثم إنزلاق الصوت في القاع
وفي صمت المسافات القصية
أختر مكانك واحترق حيث إنتهيت
أنت منسوب الدم الآن وأنت الإشتعال
النار مجمرة الغضب
أنت إذاً ضياء اللحظة الآتي
أنا وأنت ونحن الناس والشارع
والعواميد التي تمتد بالأسفلت
صوتي
صوتك المشروخ في صدأ المقاعد
وانهيار البرلمان
لم أقل إن الفضيحة قد تراءت
تحت أكمام الجلاليب
تعرت من تلافيف العمامه
وامتداد اللحية الزيف
لماذا لم تقل ؟
إن العمارات إستطالت
افرقت أطفالك الجوعى على وسخ الرصيف

أنت تعرف أنهم يقفون ضدك
ضدنا ... ضدي
وأعرف أنني سأظل ضد السلطة .. اللاوعي
نحن الآن في عمق القضية
لست من نور لتغفر
أنت من طين لتبنى
فابنى لى بيتاً
لنا .. لك
للصغار القادمين
أن يك للعدل في الأرض وجود
فليكن دمنا هو القياس
إن تكن السماء مقابلا للأرض
فلتكن الدماء مقابلا للعدل
قال الله كونو ثم كنا
هل تحققنا تماماً من وجود الذات في أرواحنا
ضوء السكون وإنطلاق الكائنات
نحن نخرج من حصار العزلة الكبرى
لنكتب عن غناء العزلة الكبرى
لكننا نصاب بضربة الحزن
أو أن خروجنا في داخل الصمت
وفي صمت السؤال

ألقاك وين قاسم أبو زيد

ألقاك وين ألقاك وين
ألقاك وين كان الفرح
قفّل مسامات الضياع
غناك قيثار الزمن
أرشيف عشق وأصوات نغم
وتر التراخى موشحات
ألقاك وين ؟
من غبتى
ما شرقت شمس
والدهشة ساساقت الدروب لي وين تمش
نار النضال لو تنهبش
توقد سنون المتعبين
تعقد زفاف آخر ضمير إتباع مقنن بالقرش
ألقاك وين كان التعب ما خت إيدو
على جبين تربال يخم رمل الشقا
المليان غُلب
دقست قوافلو مع السراب
رابط جليد الهم سعن

محزوم خشيمو من الصبر راجى السحاب
القاك وين نلقاك وين
أنا وإنت والنيل والأرض
والبور مشتت متنسى
ونجّامة التعب الكعب
ماكان عول ريدى
ريدى الصبح صفاف هدير البر
إيامى توب شحات
هزاه خم وخم
أنا مالقيتك ليه طعم الفراق دمدم
ختيتى فوقى الليل والليل سقانى السم
أنا خاطرى فى المطرة
طعم الدعاش والشم
ما كان عول .. ريدي القاك وين

الحزن النبيل / صلاح حاج سعيد

وبقيت أغنى عليك
غناوى الحسرة والأسف الطويل
وعشان أجيب ليك الفرح
رضيان مشيت للمستحيل
ومعاك فى آخر المدى
فُتينى يا هجعة مواعيدى القبيل
بعتينى لى حضن الأسى
وسبتينى للحزن النبيل
ومشيت معاك كل الخطاوى الممكنة
البقدر عليها وبعرفها
أوفيت وما قصرت فى حقك
ولا كان عرفة غيرك أصادفها
وقدر هواك يجيبنى ليك
جمع قلوبنا وولفها
وكتين بقيتى معاى فى أعماقى
فى أعماق مشاعرى المرهفة
لا منك إبتدت الظروف
لا بيك إنتهت الأمانى المترفة
ندمان أنا
أبداً وحاتك

عمرى ما شلت الندم
ما أصلو حال الدنيا
تسرق منية فى لحظة عشم
وأنا عندى ليك كان الفرح
رغم إحتمالى أساك
يا جرح الألم
كان خوفى منك
جاى من لهفة خطاك
على المواعيد الوهم
اهو نحن فى الآخر سوا
باعنا الهوى
ماشين على سكة عدم
وبقيت أغنى عليك
غناوى الحسرة والأسف الطويل

مت فى قلبى د. عبد القيوم - مطفى سيد أحمد

مت فى قلبى ولم أبكى عليك
فمعين الدمع قد نضب قديماً
قبل أن أدنو إليك
إن عقلى يتعجب
كيف قلبى فيك يُخدع
وتقول لى
صرت قلباً من حجر
أنا قد مُزقتُ قلبى
وتناثرت بعيداً
مثل أوراق الشجر
وتجرعت كؤوسك
وتوسدت الغير
مت فى قلبى فدفنتك
خارج القلب الحجر
تربتى أطهر من أن يدفن فيها من غدر
هكذا الغدر أمرْ
عدت من دفنك وحدى أتألم
وأدارى قلبى المكسور غدراً أتبسم

وأغنى للربيع الفض بالإشراق والآمال مفعم
ذبحت كفاك قلبى
وتقول لى صرت قلباً من حجر
أنت ظلم .. أنت جور
أنا إحساس وحب وشعور
أنا فى العالم فرحة .. أنا فى الظلمة نور

حبالنا الجوه ما تخنت / يحى فضل الله

طعنا الضل .. طعنا الضل
وفى الأحلام طعنا الفيل
قواف غضبة كانت طرحت تلات مرات
دحين جربت عضة زول ملان مغصه
حبالنا لجوه ما تخنت
حبل السما الممدود
حبالنا الصوت وكت يرجع
يجيب الخاطر المردود
تعالوا نشوف
غنيواتنا البقت فى الدينا ما بتشوف
تعالى نشوف
حروف البكا الجواها ما فى حروف
تعالى نشوف .. تعالى نطوف
على المدن البقت أشباح
على الجوع القعد مرتاح
على الكلمة البقت فى الجوف
تفتش سكة الأفراح
تعالى نشوف منو البقدر يخاصم طفلة
صبحت هازلة فوق مد الأسى الحرَّاق

ويا غنوتنا ما تفوتى
يا كلماتنا ما تموتى
فتشى فوق ضمير الكلمة
وعن وتراً رحل فراق
وعن بلدا رحل فراق
وعن ولدا رحل فراق
عن علماً ما بنفع
غنانا الفينا ما بشفع
حديثنا الجوه ما بنفع
تعالى نشوف
تعالى نطوف
تعالى نعلم الشفع
تعالى نعلم اليفع

إذا عادت الأيام للماضى / عوض مالك

إذا عادت بنا الأيام يوماً إلى للماضى أيها الأحباب
كتبت على سواد العمر شعرا لا يدانيه
غناء الطير وهمس الماء ووشوشة الضياء فيه
ركبت زوارقى أبحرت فى شعر لها مجدول
جعلت مشاعرى جندول
إذا عادت بنا الأيام يوماً إيها الأحباب
ولو فى زورق يمضى على الصحراء عبر سراب
أنا ملاحه الفرحان يطرق مغلق الأبواب
أدق ليس يعنينى لأنى قادم من حاضر اللحظات
للماضى
ولى شوق يبدد صمت هذا الزورق الهادى
فيدفعه إلى الوادى
إلى أفق أنيق النجم صداح البساتين
وأشدو حين تأتينى فتاة لثغة العصفور
أنفاس الرياحين بكفيها
ولى فى عمق هدبيها حكايات وأشعار
ولى فى شعرها المعطار أخبار
إذا سالت على وديانها الخضراء أمطار
إذا عادت بنا الأيام للماضى

سحابات الهموم عمر الطيب الدوش

سحابات الهموم يا ليل بكن
بين السكات والقول
وباقات النجوم الجن
يعزن فى المطر
فاتن عزاك رجعن
وشوق رؤياك
زمان مشدود على أكتاف خيول هجعن
وصوت ذكراك مكان يجرى .. يلاقى السيل
وسر مدفون بصدر النيل
ولولا الذكرى ما فى أسف
ولا كان التجنى وقف
وصوت ذكراك رزاز صفق
على خطوات بنات سجعن
وشوق رؤياك
حنين لى رحلة فى المجهول
ولولا الذكرى ما فى وصول
ولولا الذكرى ما فى أصول
ولولا الذكرى ما فى شجن

يا خطوتك يحى فضل الله

****************************
لا زمن حبك حقيقة
لا تعب زمنك فرح
لا دغش وترك صدح
لا بعد ليلك صبح
يا خطوتك
يا خطوة الوجع الجرح
لا الفيها منك إبتدا
لا البيها منك إنتهى
يا خطوتك
ياخطوة ضاعت
بين صراخك والصدا
بين المشاوير والنوى
بينك وبين كل المشاعر
الفينا غرقت فى الغنا
يا خطوتك
داست على الحرف اليبس فوق الشفاه
داست على البوح والكلام
داست عليك
على إنتظارك والملام

داست عليك
وعلى الدروب الماشة منك
وجايا ليك
لا تعب فيها الحرف
لا فتر فيها الولف
يا خطوتك بين إبتعادك وإنتظارى
بين مشاوير طفلة ضاعت
يا عيونك وإفتكارى
يا عيونك وإفتكارى
يا عيونك وإفتكارى

أظنك عرفتى جمال حسن سعيد

أظنك عرفتى عواصفك مهبى
أبارى فى خيالك يسوقنى ويودى
ونهرك يعدى ويجهل مصبى
هواجسى البتزرع وظنى البربى
بديتك خواطر بتصحى وتساور
وطيوفك تزاور وروحك تحاور
تجبينى فى زمانك موشح اساور
اقول بس نسيتك
وجرحك يتاور
اظنك عرفتى عذا ب المغنى
وطبلو المجدع شظايا التمنى
حروفو البتفزع فى لحظة تجنى
خطاه البتهرع متين تطمئنى
مسرج خيالك حصانى القبيل
معربد غبارو وخلى الصهيل
مسافر مسافر وفاقد دليل
اظنك عرفتى هموم الرحيل

لا بالحزن الفينا حنرضى تاج السر الطيب

لا بالحزن الفينا حنرضى
ولامن خوف سامرنا انفض
وما بتطفيك الريح ياومضة
رغم الصبر المر حاضننو
رغم الحزن الطال عايشنو
ما اصلو البحر .. المد .. الجذر
الفرح الحزن بيطلع منو
تعالى نغنى تعالى نعيش احساس الفرحة
شان من عمرى وشان من عمرك
سنين الزمن البجرى ويمضى
ما تغشانا تشيل فى لمحة
رنين الضحكة الحلوة السمحة
لما نغنى القمرى بيسجع
لما نغنى الغيم بتجمع
والآمال الغابت تطلع
بس وحياتكم عيدو المطلع

رسمت فى وجيها / مصطفى سيد أحمد

رسمت فى وجيها بسيمة ضو
بتغالط فى الزمن القاسى
بتعاتب فى الغنوة الصعبة
وفى لحن حزين ووتر موجوع
يحكى إحساسى
تسأل عن شدو الأفراح
أمكن لجراحنا يكون آسى
ما بشبع روحنا فرح زايف
لو كان بتناسى وتتناسى
يا بت يا نيل
العاشقك عاشق كل الفيك
غنايك فى كل ظروفك
فى الفرح البدفق وعد وفال
والحزن الودر ضى شوفك
فى سجون القهرك فى خوفك
فى النبض الصامد فى البركان
السامعو يدمدم فى جوفك
جرّحنا عتابك يا باكية
وعايزانا نغنى غنى الأفراح
ما الغنوة الناشفة لبن ضرعك

والفرح الفيك خلانا وراح
ولقينا فرحنا وإنت حزينة
يكون أشتر ويزيدنا جراح
خلينا من الفرح الزائف
بتعود أفراحنا تلقي براح

المسافه / صلاح حاج سعيد

لسه بيناتنا المسافه والعيون
واللهفه والخوف والسكون
رنة الحزن البخافا
تعدى بالفرحه وتفوت
وابكى بالحسره واموت
الامانى الفى السفر
قبل الزمن كايسه الموانى
يوم تجيبنى عليك
بصدق انو مره الحظ طرانى
واحتوانى معاك شجن
عذبنى قبلك
ولسه منك جاى تانى
تمشى وين الخطوه عنك
ما الزمن بالحب بلاك وابتلانى
لى عيونك يا مداين
يا مداين الفرحه والحب والجساره
عندى ليك مليون بشاره
والف خير والكلمه شاره
وانتى لما الحب يهوم

فى عيونى وعيونك
يبقى حالم بالأمارة
الفرح منك يجينى
ويعترينى الخوف عليك
خطوه منك خطوه ليك
راجى منك بس اشاره
كلمه تدينى البشاره
والله بيناتنا المسافه

نشوة ريد قاسم أبو زيد

نشوة ريــد احســـاس اكــــليل
وردة وصلك .. جنة اصلك
نجم الليل الوصل جميل
نحن مشينا الخطوه الاولى
انتى معاى مشوارنا بيقصر
بكره بنحكى الشوق للذكرى
نار الريد الغابت تظهر
الاطفال يافاطمه بيغنوا
الافراح لابد من ترجع
الاحلام الدونك فــاتت
لو واصلنا صباحا بيطلع

طولى النجمه صلاح حاج سعيد

قولى الكلمه لصمت الليل
وطولى النجمه
امشى معانا الدرب طويل
وطولى النجمه
وادى الفرح امتد مساحه
نادى الامل الجوه عيونا
شوق الشوق اتجدد تانى
باقى احلامنا جدار من كونا
نار الالفة البينا سنين
صحت فينا احلام يوم باكر
غيم الامل الشارد يوصل
وانتى معانا فى عمق الخاطر
ايد مبسوطة تقابل الحنه
نغم الليل الشال شبال
نخلة تغازل فى عيون طفلة
طفلة وحفلة ورقصة فال

سافر / قاسم أبو زيد

سافر
مطارات الوداع ضجت قدامك
وراك بيضاً وسماك غناى
مساحات الاسى الفى عيونا
تتفجر مدينة وناى
بطاقات دعوه الرجعه
تساب عينين من الفرحه
ودموع للحاضرين فجت
زغاريد غطت الدنيا
وعاد فرح الرجوع منيه
هواك الريح من السنبله الغناى
كثير بنعاتب الحاضر
ولااسفاً على الماضى
صدق الرؤية من قلبك
بين الشوق وانسانك
نغم فنان يعيش راضى
مداك اتعدى حد الشوف
دخلت على الشعر انسان

هواك اتخت جوه الجوف
وانتحر النهار هسه
نغنيك لى مدن شاخت
خلاص ياغربه ماترسى
تغنيك القرى الراحت
معاك احلامى لى هسه
غنيناك وبنغنى
وبنتحدى الزمن فنان

لوحة وطن / قاسم أبو زيد

طفله حلوه
وشايلا لونا ترسم
الوطن الشباب
كل خطوة في اللوحة باين
من دموع الطفله يحكى
القلوب تبقى الاراضى
النفوس تبقى السحاب
تزرع الوطن اليباب
راسمه فى اللوحه القمارى
فيها وش النيل حزين
الضفاف كان لونا احمر
الجباة عرقها بيضارى
حمرة النيل واصفرارى
راسمه جوه اللوحه طفله
الفرح فى رموشه صفق
ادت الامواج بسيمه
غير النيل انحداره
لابسه من السعده قرباب
شايله فى الايدى
الطوارى
مارقه قمحه من اليباب
شله من اطفال مدارس
فى نظام ماشين سوا
رددوا الخير بالوتر
الزمن فى اللوحه بشر
الجروف فتحت مداها
الغيوم شايله المطر
الترابلة هناك كبار
شتتو العيش للمواسم
العيون شايلات مطر
من بعيد فى اللوحه عاين
الايادى على السنابل
ودعوا الليل والفتر
خدرو الوطن اليباب

مشكور اخى مصطفى دعوب والله فعلا مصطفى سيد احمد فنان كبير وصوت شجى

اديك العافية دعوب يا مبدع