أغنيات وشعراء مصطفى سيد احمد

أغنيات وشعراء مصطفي سيد احمد

1 - طوبى للرجال العصافير / فيصل محمد صالح

- 2 لمحتك / عبد القادر الكتيابي

- 3 الطيور / حافظ عباس

- 4 يا مطر / محمد الحسن سالم حميد

- 5يا ضلنا / يحي فضل الله

- 6 يا جمة حشا المغبون / حميد

- 7 عرق الجباه الشم / حميد

8- البت الحديقة / خطاب حسن احمد

9 - طيبة / حميد

10 - عم عبد الرحيم / حميد

11 - زمن حظر التجول / الفرجوني

12 - عجاج البحر / حسن بيومي

13 - المسافة / صلاح حاج سعيد

14 - قالوا مرحلة / المقبول سيد احمد المقبول

15 - في عينيك عشم باكر / ؟

16 - ضليت / قاسم ابو زيد

17 - اسئلة / يحي فضل الله

18 - غناء العزلة / الصادق الرضي

19 - سمحة وسمرية / القدال

20 - هردت لهاتي بالغنوات / حميد

21 - معتوقة ومعتقة ومنعتقة / عاطف خيري

22 - على بابك / الكتيابي

23 - غربة ومطر / عبد العال السيد

24 - علمي عيوني السفر / مدني النخلي

25 - حاجة فيك / هاشم صديق

26 - وضاحة / ازهري محمد علي

27 - مشرع الحلم الفسيح / ازهي محمد علي

28 - لما اتلامس بيني وبينك( انا إنسانك ) / ازهري محمد علي

29 - اقتراح / عاطف خيري

30 - شهيق/ عاطف خيري

31 - الممشى العريض / العميـــــــري

32 - الملام / هلاوي

33 - سلمات عليك يا بوي أنت السما وقمرو

34 - وجيدة / قريب الله محمد عبد القادر

35 - نفسي قولك من زمان / صلاح حاج سعيد

36 - نفسي في داخلك اعاين /د. بشرى الفاضل

37 - سحابات الهموم / الدوش

38 - يا خطوتك/ يحي فضل الله

39 - اديني احساس بالامل / مدني النخلي

40 - مريم الاخرى / شمو

41 - ابيت الكلام المغتغت وفاضي وخمج / القدال

42 - لا بالحزن الفينا بنرضى / تاج السر الطيب

43 - واقف براك / النخلي

44 - الزمن الفلاني/ نجاة عثمان

45 - من جديد جيت تاني تكسر / النخلي

46 - استلاب / يحي فضل الله

47 - خليني اقراك مرة صاح / عاطف خيري

48 - زهرة الصبار / مظفر النواب

49 - يا جرح عزة هوانا / قاسم ابو زيد

50 - عباد الشمس / قاسم ابو زيد

51 - املنا الباقي يسرح بي أهاجر لي زمن تاني

52 - بت العرب النوبية / حميد

53 - عينيك وطن / صلاح حاج سعيد

54 - مسافر / قاسم ابو زيد

55 - أظنك عرفتي / جمال حسن سعيد

56 - نشوة ريد / قاسم ابو زيد

57 - بقول غنوات / القدال

58 - قلت ليها / صلاح حاج سعيد

59 - ايها المصلوب كالنجم

60 - ليه غبتي يا قمرا / قاسم ابو زيد

61 - طوريتك في الطين مرمية

62 - يا جراحك / د. طلال

63 - عد فات / صلاح حاج سعيد

64 - اليابسة / عاطف خيري

65 - والله ايام يا زمان

66- المزار / عبد العال السيد

67 - في عيونك / ابوزر الغفاري

68 - الرحيل في الليل / عبد الرحيم ابو زكرى

69 - عشقت ابتسامتك

70 - تحرمني منك / مصطفى

71 - يا بت يا نيل / مصطفى سيد احمد

72 - طالما ف بحرك في حمي / حميد

73 - قمر الزمان / صلاح حاج سعيد

74 - شوك الشوق للشوف يا خي / حميد

75 - شيخ تلب / القدال

76 - مساماتك / يحي فضل الله

77 - جلبت ليك من بلاد الله البعيدة / خطاب حسن احمد

78 - حبالنا الجوة ما تخنت / يحى فضل الله

79 - إدفقي / قاسم ابو زيد

80 - القاكي وين / قاسم ابو زيد

رائع منو؟
انت؟
والا مصطفى؟
والا ناس الكتيابي وازهري
والا الزمن الجميل..
واللحن النبيل
والكلمة الرقيقة والمعنى الأصيل
رائع انت وكل ذلك حقيقة
وياريت تختار لينا أغنية واحدة حركت سكون دواخلك .. لمحتٍك؟

الشناوي كتب:: رائع منو؟
انت؟
والا مصطفى؟
والا ناس الكتيابي وازهري
والا الزمن الجميل..
واللحن النبيل
والكلمة الرقيقة والمعنى الأصيل
رائع انت وكل ذلك حقيقة
وياريت تختار لينا أغنية واحدة حركت سكون دواخلك .. لمحتٍك؟

رائعون هم من يتذوقون الكلمة الجميلة

لك التحية استاذ / عادل وانشاء الله طلبك علي العين والرأس

81 - رجعلك قليبي المهضلم / القدال

82 - جمعنا قدر

83 - زمنا بروح وزمنا بجي

84 - باكر ضواي / حميد

85 - معاك كنت / مدني النخلي

86 - رعشة الشوق / محجوب الحاج

87 - كيف أنساك / محمد مريخا

88 - مت في قلبي / د. عبد القيوم ومصطفى سيد احمد

89 - يا سر مكتوم

90 - أخوان الإنسانية /محمد المهدي عبد الوهاب

91 - قولي الكلمة / قاسم ابو زيد

92 - صابرين / القدال

93 - الحزن النبيل / صلاح حاج سعيد

94 - إذا عادت بنا الأيام / عوض مالك

95 - ماني غرقان في التمني /محمد المهدي عبد الوهاب

96 - بالبل الدوح

97 - حتى الفصول صابا الجفاف / عدة شعرا

98 - ولمانديلا اغني

99 - مابان عليك سفر العمر

100 - باكر ضواي / حميد

لمحتك عبد القادر الكتيابي

لمحتك
قلت برآمن
بديت احلم
الملم قدرتى الباقيه
واشد ساعد على المجداف
تلوح لى مدن عينيك
وترفع لى منارة
بسمتك ساريه
وبديت احلم
وكل ما الريح تطارد الموج
ازيد اصرار
واحلف بيك اغير سكة التيار
واقول يا انتى يا اغرق
الوح لى مدن عينيك
تلوح لى
اخاف الضفه ترجع
بيك قبل الحق
اخاف غيم المنى الشايل
تسوقوا الريح ويتفرق
اخاف واخاف
واشد ساعد على المجداف
واجيك بى قدرتى الباقيه
حطام انسان موسم
بى شقى الدنيا
ومقسم قلبه فى الاحزان
اجيك فنان اشد اوتارى واحكيلك
حكاية انسان وهب
لى سكتك نفسو
ورسم صورتك على حسو
وربط ساعد على المجداف
وقال يا انت يا اغرق
اخاف واخاف
والاقيك يا امانى سراب
مراكبى عليك بتدفق
اخاف واخاف

ماجدولين فتح الله ابراهيم

ماجدولين
يا ضى بيطرز عتمة العمر الحزين
يا سامقة وشامخة
وراضعة من ضرع الصباح
وطالعة من وجع السنين

ماجدولين

ياسرة الزمن الفتى
يا الخصيب سندس دواخلك
جندلى الحزن اللبس حلكة جدايلك
وحصل العرق البشق هامة الارض
لا رشف زمزم خصوبتك
لا فلق صخرة مناعتك
لا هو طايلك ماجدولين
ذى كل الفوارس وذى ملايين النوارس
صرعى فى سطوة حبايلك
بس فى قاع الروح بختك
وفى غياهب ذاتى شايلك

ماجدولين

يا نجمة بتنقط ألق
وتسيل على خد الظلام
والدنيا يبن عتمة وغسق

ماجدولين

قبل منك كنت موبوء بى وجع
لا غمد مرة وهجع
ولا سكت خلانى اقول
وقبل منك كان غرز ضرع الكلام
وجفت شرايين الفصول

وضاحة أزهري محمد على

الصباح الباهي لونك
وضاحة يافجر المشارق
غابة الأبنوس عيونك
يابنية من خبز الفنادق
شيدتي في جواي صوامع للفرح
وفتحت في دنياي مسارح للمرح
وبقيتي لى سكة وعيون
لاقدرت أطولك شان اجيك
لاقدرت من غيرك أكون
وأنا بيك مالينى الكلام
حركت بيك عصب السكون
جلبت ليك الغيم رحط
طرزت ليك النيل زفاف
حرقت ليك الشوق بخور
وفرشت ليك الريد لحاف
لا السكة بيك بتنتهي
ولامعاك مليت طواف
ياريتني لو اقدر أكونك
وضاحة يافجر المشارق
الصباح الباهي لونك
يابنية من خبز الفنادك
غابة الأبنوس عيونك

الشاعر/صلاح حاج سعيد
سطوة محاسنك

كان نفسى أقولك من زمان
بى الكاتمو فى سرى .. ومكتـّم فى حشاى
مدسوس سنين
بى الشايلو فى عيني معزّة
وفى القلب
ريداً يخاف الغربة والشوق .. والحنين
زاملنى زى خاطر الفرح
وكتين يقاسم الهم .. عزا
وكتين مدامعى تكون جِـزا
وتفتح مباهج الليل .. ظنون

**************

كان نفسى أقولِّـك من زمان
سطوة محاسنك عندى ما كسرة ..جفون
وكت العيون تعبرنى زى خاطر المسا
سطوة محاسنك ما الرخام .. الفى الحرير
وكت الثغير يفجعنى
بى حرفاً .. قِـسـا
سطوة محاسنك عندى وكتين كبريائك ينهزم ..
لى طيبتى .. بى لفظة حنان
وكتين مشاعرك .. تنسجم فى عمرى
تنفح قلبى بى رعشة أمان
سطوة محاسنك عندى
وكتين شوقى يصبح فى هواك
ليل عزّة
ما بتعرف هوان

***************

كان نفسى أقولك من زمان
عينيك وحاتك غربتى .. وأهلى
وبلادى الفيها ضايع لى زمن
عينيك وحاتك شوقى لى زولاً ولوف
من بعدو ساب عينى .. سهن
وانا كنت داير من زمان
أشرح حكايتى معاك ألف
أحكيك .. وأزيد القول .. إلِفْ
وأتمنى لو قلبك عرف
كان من زمان
من قبل ما فى قلبى يتحكـّر
زمان الغربة فى جرح الأسى
من قبل ما حرف الحقيقة الحلوة
.. يتبدل عسى
ويصبح أمانى كسيرة
.. فى خاطر الحنان

عمنا الحاج ود عجبنا الفرجونى

عمنا الحاج ود عجبنا
فى الفريق ياهو الركيزة
هو البشيل حمل الرباعه
وعندو كلمه على الجماعة
فى الفريق باقيلنا تايه
وكل طيب ليهو غاية
للضعيف تلقاهو ساند
ويقهر الكعب المعاند
وللضيوف ديوانو فاتح
ديل يقوموا ... وديل ينزلوا
يا ولد ... جيبو الرتاين
وجيهو الديوان
وافرشو الفرشه الكبيره
الاباريق والتباريق
واضبحو الحمل المدوعل
عمنا الحاج ود عجبنا
من سنين ايام جهلتو
ديمه فى دعوات صلاتو
بسأل المولى السلامة

وسترة الحال والكرامة
عمنا الحاج ود عجبنا
فى ليلة من ذات الليالى
في زمن حظر التجول
جاهو ضيف فوق راس حداشر
رحّبْ الحاج بيهو جداً
فرشولو ونزلوهو وكاسو للعشا ما إتلقاهو
مالرغيف ممحوق مِقَصِر
والبلد في حال مِعَسِر
عمنا الحاج فى مبادؤو
واجب الضيف زي فريضة
وهسة ضاقت بي العريضة
ضيفو كيف يترك عشاه
ومن دى ذايد إختشاهو
وجاتو فكرة !!
يمشي للفرن المجاور
ولى لجان العيش يشاور
بس عشا الضيف يا جماعه
ضيفي نازل ليه ساعة

شاكلوهو ونهّروهو
ودفّروهو
وجاتو دورية الطواري
وأمسا بايت في الحراسة
وناسو جنو
للصباح ماعرفو حاجة
وين ده رَوَحْ
وجاهم الخبر المؤكد
ود عجبنا في الحراسة
وماشي محكمة الطواري
ناسو .. أولادو .. وبناتو
عرفو حالو وبدري فاتو
راحو محكمة الطواري
فيها في نص الخلائق
شافو حالاً ماهو لايق
عمنا الحاج بي جلالو
فوقو حس الصوت يِوَلْوِلْ
فوق قفاهو وفوق زنودو
وفوق رجولو

ومرة فوق فِججا حشايم
أصلو ما قايل بهون
حتى كان نزلت هجايم
الا لكن الليالي
يوم بترخص كل غالي
حاكمو الولد المنصّبْ
كتفو بالدبور مقصّب
إنت ياحاج يا مخالف
زول مِخَرِفْ وعقلو تالف
إنت يازول ماك داري
زلة الناس في الطواري
غرِمُوهُو وأجلدوهو
ونفذو الحكم البهينو
شان يفتح تاني عينو
تسمع السوط ليهو خاوية
وفوق قفا الحاج صيحتو داوية
كل جلدة جبل مذلة
في ضمير الحاج مزله
كل كرباج الف عِلة

وفجأة رفع الحاج عيونو
شاف بنات ولدو وبناتو
كلهن واقفات يعاينن
دمعتن في العين ترقرق
وجعتن في الجوف تحرق
والحزن ليهن مفرق
ده النجوم الفي سماهن
ده الزمان الكان حِماهن
كل صوت نازل عليه
من شعاع الضو عماهن
عمك الحاج دمعو زرَّف
وسيلو فوق اشنابو سرف
وتم حكمو وراح بيوتو
نفسو مكسوره وذليلة
وكيف ملاقاة الحليلة
وصحوة الروح العليلة
وفي البيوت الجوه غادي
عمك الحاج ما إعتيادي
فوقو متلمين جماعتو

والسكيلي ضرب حزايني
قالو ناداهو المنادي
وفارق الذلة المهينة
يقطع الدنيا وسنينا
فوق فراش حاج ودعجبنا
تَسمع الزول البوصي
أقفلو الحوش ياجماعة
وطفو أنوار الرتاين
داك حرس حظر التجول
من بعيد ليكم بعاين
يازمن حظر التجول

بقول غنوات / محمد طه القدال

بقول غنوات .. واقول غنوات
فى البلد البسير جنياتها لى قدام ..
بقول غنوات
وفى الولد البتل ضرعاتو فى العرضة
ويطير فى الدارة صقرية ..
ولو السمحة تلت إيد
ومدت جيد يقوم شايلاه هاشمية
يشيل شبالو وختفة ريد وفرحة عيد ..
وريدة روح وحمرة عين وإيدية
بقول غنوات .. بقول غنوات
وفى الولد البشيل مدقاقو قولة خير على القمرة
يقابل الجاية متحزم ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليه قمرية
و قبال حول تغيم غيمة قبلية
ترش الدارة والحدبة الصعيد الحلة
يا فرحه بتطارد الصفقة فى النسمة الصعيدية
وياجهرة نهار الليلة بدرية
رحيح جنياتنا فى
الحدبة الصعيد الحلة
يا قمحاتنا هو لبلب ...
يا سمحاتنا هو لبلب
و يا اللوز الفتق فى الوادى هو لبلب
ويا البحر الطمح مدادى هو لبلب ..
ويا حجواتنا يا دعواتنا هو لبلب
سألتك بالذى ركز الأرض معبد
وسوى الناس عليها مقام
سألتك بى حجا الأمات ودعواتنا ..
سألتك بى كبيداتن و دمعاتنا
شليل وين راح ..
يكون ضل الخريف فاتنا
وشليل وين راح
وزى برق السماك الجابها دغشية
وزى زغرودة البطن الكبارية
مرق من شامة القمرة
مهيقت بى وداعة الله
ومقدم بالعديل يبرا
تعالوا ابشروا ياجنيات
شليل ما راح .. شليل ما فات
شليل عند المسورو حرق بقالو حصاد
شليل فوق التقانت قام خدار وبلاد
شليل مشوار.. شليل مسدار
شليلنا أرضنا يا جنيات
شليل قائم نصاصي الليل
يتمتم ليلو وردية
حرازنا شليل .. شليلنا دليب
شليلنا دليل على البلدات بعد درب التبلدية
شليل ما راح .. شليل ما فات
مزارع بات على عشقين
تراب بلدو
وسماح فوق بت
مزارعية

عزه هواناصلاح حاج سعيد

******
ياجرح عزة هوانا
الساكنة فى حرف الكتابة
أصلو فى .. زمان الأسى المشدود
.. على وتر الكآبة
فى زمان الحرقة .. والخوف ..والرتابة
إنكتم نبض الأغانى
وإنبهم حس المعانى
وإنجرح خاطر المهابة

جيتنى فى الزمن الأليم

قلبى مثخن بى جراحات الهوى

عمرى ضايع فى متاهات النعيم

فى دروب الغربة .. لا تاب .. لا قِوى

كان عيونك فيهن الوصف القديم

معنى فى الحب .. إنطوى

وضاع معاك زمن الوسامة

وإختفى الفرح العلامة

لسة يا حزن الملامة

من سنين دربك .. سلامة

كلمات أغنية بين الموجة والخزان مصطفى سيد أحمد - محمد الحسن سالم حميد

*********
سنّى على النضال إيدى
سوّكى بى الهتاف .. فمّى
شوارعك لى .. دويها .. على
إذا ما آخر العلاج الكى ...
مراويدك حُمر يا أمْى

**********

هردت لهاتى بى الغنوات
وقتْ يبرد حشاك .. يا أمّى
من التعب البلا صالح ...
تفيقى .. تروقى .. تنجمّى
تسوّى مكانسك المطرة
تضوى البيت وتنجمّى
تمرقى صبوحة لى الجيران
قدح فوق إيد ... (وفْيد) ألمى

**********

يلاقوك شفّع الكتـّاب
نضاف وظراف بلا النسمى
يغنولك غناوى السـاب
وفى بيوضة مافى سراب
جبال كجمى وفيافى الكاب
تميد بى الخضرة ...منقسمى
فيافى الصّى وبيوضة ..
البراسيم فيها مفروضة
خدارا يرارى شوف عينى
على الأبواب .. طواريها وحواريها
بقت روضة
بقت تشرب من الحامداب ..
تشوفى رهاب ... بُعُد نجمى
.. بشوفو قريب قُرُب نضمى
بشوف العالم التحتانى هيلاهوب وقف ناهض
وهدّ عمايد الفوقانى ..
جوّة الجُب رمى العارض
وفى الساقوا الدمار أفراد
عريق الحب نبض قابض
متل قبض الحروف فى إسمى
وغناوينا القبيل .. رقراق
علينا تصب برد .. قارض
وأجر نمّى ...
أدوبى لهاتى بى الغنوات ..

عُقُب يبرد حشاك .. يا أمّى

....

وطنى ولا ملى بطنى
سكاتى ولا الكلام النّى
بليلتى ولا ضبايح طى

قليلتى ولا كُتُرْ سمّى
سلام يا أمّى
سلام لا هكمى .. لا دكْمى

يا جرح صلاح حاج سعيد

ياجرح عزة هوانا
الساكنة فى حرف الكتابة
أصلوا فى زمن الأسى المشدود
على وتر الكآبة

فى زمان الحرقة والخوف والرتابة
إنكتم نبض الأغانى
وإنبهم حس المعانى
وإنجرح خاطر المهابة

جيتينى فى الزمن الأليم
وقلبى مثخن بى جراحات الهوى
عمرى ضايع فى متاهات النعيم
فى دروب الغربة لا تاب لا قوى

كان عيونك فيهن الوصف القديم
معنى فى الحب إنطوى
وضاع معاك زمن الوسامة
وإختفى الفرح العلامة
لسة يا حزن الملامة
من سنين دربك سلامة

ماطال في بحرك في مي محمد الحسن سالم حميد

ماطال في بحرك في مي
وتمرك مفدع بالجريد
شدرك أمد حس السمي

طينك معتق بالطمى
نبنيك اكيد نبنيك جديد
نبنيك ايوا سوا سوا
منو وجديد نبنيك جديد

يا إيد ابوي على إيد أخوي
على إيدنا أنا
عى إيد وايد نجدع بعيد

في لجة من راس ميضنة
حكومة الفقر الدمار
الفخفخت والصهينة
واللي نقاص ايامنا كاس

اليالطيف سوس البحر
نرجم قفاهو حجر حجر
من ها الرصيف
الما قدر قدام
سريحة الموج يقيف
الما انستر
الأرزقية وناس مو يا
نسقيها كاس اسقتنا يا
نوريها كيف عشق الحياة
سنانا فوق حجر القصاص
سنانا ناس ضرب البحر
جوانا احر من الرصاص
ياضو حبيبين القسا
طول ما انت غرقان في الأسى
تبت يديك ما ترمي ساس
ماتبني مجدك من جديد
تفتح شبابيك الخلاص
تدخل نسيمات النشيد
بيت القصيد يستقبلا و مستقبلا
والحاضر الماضي التليد

يابلدي يافردة جناحي التاني
وكت الناس تطير لي عالما
وا فجعة الزول البجيك
مايلقى فيك غير الهجير
ناسا تواشني مسالمة
كل البشاشات القبيل
يلقاه ميتة مسممة
والجاتا جاتا من الارض
ما جاتا من تالا السما
مااعتى غبنك ياولد
واعدل قضيتك وأعظما
لاترجّع السيف الجفير
والدنيا فايرة مصادمة
من غير تجيب تار البلد
ريح العوارض تهزما
وتطرد مع إبليس الأخير
دعة الضلال من جنتك يا آدما
تاكل من الشدر الحلال
يغشاك نعاس في ضل رمى

تحتاك هضاريب الصعب
كربة ليالى الَمظْلمة
يا نيل قُبل خاطرك يطيب
أرضك تفذّع باللهيب
تكشح تواريب الغضب
صعب المِراس
نوبة وزنوج بجه وحلب
رطانة عربان مواشو
ومولدين تلقانا أو
نلقاك ضوء
ضلمة لياليك العِجاف
رشة نهاراتنا النشاف
آمنا بيك وموحدين
في إيدنا فاس… وقلم رصاص
شتلة وكمنجة ومسطرين
وطبنجة في خط التماس
حرآسة من كيد البكيد
ضد الرصاص والإنتكاس
نبنيك جديد واشد باس

تأمل يحي فضل الله

مانى غرقان في التمني ولاني سابح
فى الامانى
زارنى خاطراً
بله شوقى واحتوانى
النخل اتلاقى طل
ردد النيل الاغانى
النجوم لامع بريقا
الزهور النايمه فاحت
وعطرت كل الجزائر بى رحيقا
الندى الراقد صفق جناحاتو لهوانا غنت
دقوا مزيكه الحوارى
رقصوا البنوت اعرضوا
النخل زايد فى عرضو وفى علاهو
البيوت غرقن وراهو
وبرضو زايد فى علاهو
يحكى للدنيا الجديده
سر ثباتو وسر بهاهو
ضى عيونك يابنيه
يضوى من بلداً بعيده

ترسلك لينا الغمامه
ويكتمل للروح نشيده
في الدروب الليك تودى
ينسرج الخيل العنيده
الحزن من نور عيونك
سكه للفرح الجديده
انا راكب يا مراكب
لا الرياح توقف خطايا
لا الجبال تحجب رؤايا
ست شموس الكون منايا
ليك مسافر بكثير
الزاد مسافر بغنايا
نوصل الشمس البعيده
نبقى عيدة
نزرع الحب البيوقد
للنهايه

على بابك عبد القادر الكتيابي

على بابك نهارات الصبر
واقفات
بداية الدنيا هن
واقفات
وكم ولهان .. وكم طائر
بعد نتف جناحو وراك
لملم حر ندامتو .. وفات
قطع شامة هواك من قلبو
إلا هواك نبت تانى
وعلي بابك
وقف تانى الغمايم
شاقي حضن الليل
مسافر فيها وحدانى
وبدون جنحين
يغنيك الهنا المافي
ويغنيلك رهافة حسو
يغنى على جليد آمال
ويحلم بالشتا الدافئ
وقدر ما يمشى فى سور الزمن
خطوات

يلاقي خطى السنين
واقفات
يلاقي هواك نبت تانى
وعلي بابك وقف تانى
وملأ الساحات
على بابك
نهارات الصبر واقفات
بداية الدنيا هن واقفات

يا جرح / صلاح حاج سعيد

ياجرح عزة هوانا
الساكنة فى حرف الكتابة
أصلوا فى زمن الأسى المشدود
على وتر الكآبة

فى زمان الحرقة والخوف والرتابة
إنكتم نبض الأغانى
وإنبهم حس المعانى
وإنجرح خاطر المهابة

جيتينى فى الزمن الأليم
وقلبى مثخن بى جراحات الهوى
عمرى ضايع فى متاهات النعيم
فى دروب الغربة لا تاب لا قوى

كان عيونك فيهن الوصف القديم
معنى فى الحب إنطوى
وضاع معاك زمن الوسامة
وإختفى الفرح العلامة
لسة يا حزن الملامة
من سنين دربك سلامة