بلد الغبش
كلمات : خالد عباس شقورى
غناء : طارق العوض
يا راحلى لبلد الغبش شيلينى فى خاطرك نغيم كان القى لى هناك عش
وارجع معاك انا ياطيور .. خلف الزمن كم سنة
اتمد فى امل الوصال .. وارحل معاك سرب المنى
وانزل هناك انا فوق تقى ..واطاطه يابسة مشققه
كانت مسقية بالغنا .. وليك ياطيور كانت وطن كانت رخا وخيراً دنا
.................
اطرا البلد وناس البلد ..ليل البلد وصبح البلد
لو عارفة يا الفاردى الجناح انا بي شوق ماليه حد
للنيمة والضل الرهيف .. والنسمة والسعن البرد
لى لوبة فى صدر الجروف .. والنيل من الحيضان شرد
.................
لى ابوى فوق برش الصلاة .. فرش طرف توبو ورقد
لى مرقة القيت العصير .. قاصد سبيل الخير قصد
لى لحظة من عمر الزمان لا حسرة لا هم لا حرد
.................
آهـ يا طيور واشوقى انا .. انا ياطيور مشتاق كتير
ما لى جناح متلك انا .. لو لى جناح انا كت بطير
وانزل قصاد بير الفريق .. لى شوفت الواردات عصير
وامسك دلو الرايقى واجر .. واملالها وابراهن غفير
لامن خلاص هن يوصلن .. وانا تانى اواصل للمسير
.....................
اوصل هناك حد الترب .. واقعد قصاد جدى الكبير
اضحك من الشبه الشديد .. بين حظى والليل والمصير
واذكر الزمن البعيد .. وكتيت ابوى الحاج سعيد
يقلعلو فى انتاى كانت .. قايمالها فى حوضا جديد
......................
وانا ذكرة الناس العزاز تلقانى فى نومة الدغش آهـ يا طيور آه
