شيل الشيله والزم كلو حاره تجيلك
وماتجالس الحريم رفقاك اغنو حليلك
عريان العروض اوعاك تسيهو خليلك
والعاد نفسو فوق ماظن فوادو بشيلك
خاويهو البعزك ولي وليتك صاين
وماتبره البكوس سهوات حريمك خاين
عريان العرض ارميهو كيف الفاين
امسح بيو قمامتك ودوسو عينو تعاين
الخات روحو فوق ماتسيهو ليكا رفيق
وعريان العروض ماظن افش الضيق
الحام بالفريق ماتبقي متلو طليق
وفي ديوان ابوك قابل عدوكا صديق
خاوي الفي الرجال ديوانو ساهو تكيه
ونفسك هينه بي توب العفاف اكسيه
سويهن شيم فايته الحدود واسيه
والموت في الحدود اسعالو ماتخاف ديه
صداقة الخمله ماظنيت وراها عمار
والحارس الحريم مابداوس الصقار
انجع بي الهويد خاوي التلوب وكبار
واحرص سمعتك مايكون عليها غبار
وماتخاوي الحريم مابجيب قدمهن خير
وماتعرف المحال ان كان حليب الطير
امسك في الكريم رازق الشبع وفقير
غير رزقك طلاق ماتحوش اكان بطير
ماتخاوي البكوس زلات رفيقو اعايرو
وماتخاوي المكلق شعرو ربي ضفايرو
خاويهو البجيك متل السحابه بشايرو
وانعل خاشو عريان العرض لاتسايرو
نفسك بالكتاب والسنه نمي علومه
وشيل زواده تسبيح كلو حته تحومه
رسول بشفعنا يوم كل الامور محسومه
اجعلو قدوه وارضاها التجيك مقسومه
نفسك بي حبال حكم النميم افتلها
ومشهد روحك الفعل السمح علمها
طيبات الخصال لي سمعتك لجمها
وايقن ربك ان ضاقت عليك بفرجها
ماتسو العوج تبرا اب حديثا مايل
خليك متلو سيل عين التعول الشايل
نفايل جدك الدارس ام بنايا زايل
سوها كان علي المابسوا تلقي جمايل
حليلت جارك اوعاك بي الخيال ترغبها
واسرار بيتك احرص برا لاتسربها
عظم والديك صلتك بهم كربها
واحزر منها سكك الفارقه لاتقربها
فارس محمد
المهجراوي
