مافينا البكوس كسب الرزق بالباطل
ومافينا الملازم اخواتو قاعد عاطل
مافينا الزرف دمع العيون متهاطل
ومافينا الفسد راسو السجاير ساطل
مافينا البخون صاحبو امرق العيبه
فينا النفسو لي كظم الغيوظ حبيبه
مافينا الفرح ان جارو جات مصيبه
فينا الفعلو ساعة الحوبه طب طبيبه
فينا اللبسو عرض اماتو توب وعمامه
وفينا الفارس اللفخة ضراعو شوامه
فينا الفي الكرم بطن السحاب الطامه
وفينا القولو حاوي لامور وزمامه
مافينا العلي بيوت المرايس حايم
فينا الديمه لي صلة القرابه مدايم
مافينا اللبد والفجر اذن قايم
فينا الشال نهارو من اللذايذ صايم
مافينا البتر ساعة الخيول مشبوكه
فينا الفارس الخلا القلوب مربوكه
مافينا البسو باقي العصيده عروكه
فينا الايدو حين طلب المرؤه دروكه
مافينا الحسود لي جارو صاري ضغاين
فينا الفوق شيم عز الرجال متباين
فينا الفي الكرم عين السحاب متحاين
وفينا الكفو للشيطان شهابا باين
مافينا الاضينه الامو ماسك توبه
فينا النسلو منسوب ليهو ود حبوبه
فينا الفارس الخبر المحاص ودروبه
فينا الفوق عروض جاراتو شاشا دوبه
فارس محمد
المهجراوي
