مشروع مكتبة العسيلات العامة

سؤال يطرح نفسة بشدة........
هل توجد فى العسيلات مكتبة؟؟؟؟؟؟؟؟؟؟ ماااااااااااااااااااااااااأظن...
هل يوجد فى العسيلات مقهى انترنت؟؟؟؟؟؟؟؟ برضو ماااااااااااااااأظن
اين يقضى الناس اوقات الفراغ؟؟؟؟ أكيد فى الطلمبة...
والله ياأهلنا الشغلانة ماصعبة لو اتناقشتا وفكرنا فيها بجدية شوية...
اكيد كلنا دايرين نرفع ونعمر بلدنا...
الفرصة متاحة للناس اى زول يورينا رايو شنو...

كلام موزون اسلئله لا تحتاج لاجابه بل تحتاج تنفيذ والمساله ما صعبه مع الامكانيات المتاحه في المنطقه والاقتراح كبدايه تبرع بكتاب ومبلغ بسيط لشرا اجهزه حاسوب والبيوت كتيره وكبيره لاحوجه للائجار

مشكور الاخ سعد مصطفي ,,, الموضوع في غاية الاهمية ,,, اسألو اهلكم ناس الهوج ,,, كانت تجربة مكتبة الشهداءالعامة بالسديرة الغربية ,,, نعم كان المشروع حلم كل الاهل ,,, وايضاً كانت العقبات والتحديات الجسيمة التي تواجه المشروع اكبر من الاحلام ,,, ماذا حصل ؟؟؟؟؟ جلس الشباب قبل الكبار وتبنوا هذا المشروع العملاق ,,,وتم تكوين لجنة تنفيذيةعليا لمتابعة العمل ولكن!!!!!! كيف ومن اين لنا بالمال ,,, وهو عصب كل شي ,,, كانت العزيمة اكبر من المستحيل ,,, اجتمعنا نحن الطلاب والموظفين وكل من له رغبة اكيدة في تحقيق الحلم ,,, بدأنا بالاشتراكات الشخصية ومن ثم دعم الجهات الاخري وكذلك الخيريين من ابناء المنطقة ,,, فبدأ المشروع بتأسيس المبني وتاهيله (مشروع الشفخانة القديمة ) التي تم تحويلها فيما بعد الي المركز الصحي الجديد ,,, استفدنا من المبني القديم وقمنا بصيانته وانشاء مبني اخر بجواره ,,, واكتمل المبني الذي يتكون من صالة اطلاع بها 30 كرسي جلوس وايضاً غرفة للكمبيوتر وخدمات الطباعة وكذلك غرفة للسكرتارية والاستقبال ,,, وتم الاتصال بعدة جهات رسمية وشعبية وخيرية مما ساهم في توفير اكثر من ثلاثة الف كتاب ,,, تشمل التفاسير وعلوم الحديث والكتب العلمية والثقافية والاقتصادية والقانونية وحتي مجلات الاطفال ,,, بعد اكتمال كل الترتيبات وتجهيز المبني باحدث وسائل الراحة ,,, تم تسمية المشروع بـ (مكتبة الشهداء العامة بالسديرة الغربية ) تكريمأً لشهداء المنطقة التي قدمت اكثر من عشرة شهداء ,,, وتم الافتتاح وهي الان تقف صرحاً شامخاً يحكي عن روعة الانجاز ,,,, فيا اهلي ناس الشرق مشوار الالف ميل يبدأ بخطوة ,,, فلتكن العزيمة وليكن الاصرار ,,, واسأله تعالي ان نري في القريب مكتبة عامة في ارض الاشراف تحكي عن اصالة التاريخ ليس ذلك ببعيد

خطوة ممتازة منك يا سعد مشكور علي الاهتمام الرائع

الخالة زينب والاخوان لقمان ومحمد مشكورين على المرور ومن منتدى الاشراف نبدا وربنا يوفقنا

والله الفكره حلوه ومفيده خاصه للشباب اوقات الفراغ

كان هذا الموضوع اختراح من الاخ كمال عمر محمد عمر مدني (الكلس)وفعلا قام بجمع كميه كبيره من الكتب لا ن الكاتب بعد قرأته من الافضل ان يسلم لشخص اخر حتي تعم الفائده والاجر ووجد ترحيبا من الاهالي مما شجع الاخ ماجد الطيار فقال انه مستعد بان يدعم هذه الكتب من مقر عمله والذي يدعم مثل هذه المشاريع وكذلك الورق للطباعه وبعض الادوات المكتبيه ولكن نسبة لعدم وجود مكان مناسب بالمنطقه ووجود بعض الجهلاء الذين لايقدمون بل يدمرون قاموا باعمال احباطيه وتخربيه و....ولكن الحمد لله حسب علمي توجد مكتبة العسيلات الشامله بمعهد المنصور الاسلامي فاتحه للجميع وكان مسؤل منها الاخ معاويه .
الاخ سعد كلامك جميل جدا ولكن المشكله كلها ليست في الماده (المال) هو من اسهل الاشياء ولكن الاشكال هل يوجد اناس يشجعون ويستفيدون من مثل هذه المشاريع المثمره وانا اقصد الشباب الذي اصبح يعيش حياة روتينيه
دراسه او عمل تمشي الصباح بعد داك الغداء ثم التمرين اي الغلاط في الكوره المساء الدكه وانتهي الموضوع فنتمني مثل هذه المشاريع ان تقوم ابتداء من المدرسه يتعود الطالب علي المزاكره وهي من اصعب الاشياء كيف تقنع نفسك انك تمسك كتابا ففي المرة الاولي تكون صعبة والثانيه كذلك الي ان تتعود عليها حتي تدمنها ويصبح الكتاب خير جليس لك

الانترنت
الانترنت كلامي الداير اكتبه احتمال تقولوا ممامنطقي ....مفترض الانترنت يكون في كل بيت البعض سوف يرد يقول ان بعض الاسر لاتستطيع ارد لكم قائلا تعالوا شوفوا اطفالنا والله يحملون موبايلات رهيبه تحيرك بعدين مواكبين اول بي اول الواحد بغير الجوال من اين هذا اذا لم تدعمهم الاسر بعدين الصحف(الحنيطير زي ماقال شمسو) الواحد بشتري اقل حاجه 4 في البيت مع العلم يمكن الحصول علي ذلك في النت وكذلك شحن الجوال يعني اهلنا المغتربين والله مافي حاجه بتصرف معاهم اكثر من الاتصالات لو في نت كان ده كله توفير حتي موضوع الكتب والبحوث بكون تحت قدميك مجاني وبي راحتك
يعني شـــــــــــــــــــــــــامل كل ماتريد سوف تجد انشاء الله وياريت الناس تقتنع وتفكر في الكلام

مشكور يابشمهندس على المرورو الافادات الوااااااااااضحة وصريحة دى ... لكن الناس لازم تتمسك بحتة المكتبة فى الحلة والمكان ممكن يكون غرفة فى اى مرفق حكومى . مدرسة او محلية لحدى ما الناس تلقى مكان ثابت ومخصص للمكتبة... ولامكان للمخزلين والمحبطين هنا... تسلم

كلامك سمح بالحيل اخى سعد وفعلا عندما كنا فى رابطة القويز للطلاب مشينا مع الاخ ماجد احمد مضوى لمخازن وزارة الثقافة ببحرى ووجدنا كثير من الكتب المفيدة سواء كانت لغة او علوم عامة صدقنى بقينا نعزل فى ده دايرنو وده مادايرنو .اها ملينا بوكس كامل ولكن لعدم توفر المكان وديناهو مدرسة الاساس للبنين والحمدلله فى كتب تصلح لطلاب الاساس وزعها مدير المدرسة والباقى راح فى حق الله بعد داك ما واصلنا قلبوا علينا الحكومة Smile

وجات رابطة جديدة وبس وقفنا...
انت عارف ازمة بلدنا شنو انت فى العمل العام حراااااااااااااااااااااااااااااااااااااااااااااااامى..
ماداير احبطك لكن ده الواقع حتقول لى انت مادام مقتنع مايهمك الكلام اقول ليك بس الكلام ما بصلنى انا بس حتى الاسرة بتسمع واكيد حتقوم مشاكل....عشان كده مسالة التبرعات دى خليها شوية.

انا معاك فى الفكرة بس رجاء تكون من اشتراكات اعضاء المنتدى فقط على الاقل فى مرحلة البداية.
بالنسبة لموضوع الانترنت انا شايف انو كلام اسماعيل منطقى وممكن مجموعة من الشباب يشتركوا فى واحد.
وبالله التوفيق

سعد مصطفى محمد سعد كتب:: سؤال يطرح نفسة بشدة........
هل توجد فى العسيلات مكتبة؟؟؟؟؟؟؟؟؟؟ ماااااااااااااااااااااااااأظن...
هل يوجد فى العسيلات مقهى انترنت؟؟؟؟؟؟؟؟ برضو ماااااااااااااااأظن
اين يقضى الناس اوقات الفراغ؟؟؟؟ أكيد فى الطلمبة...
والله ياأهلنا الشغلانة ماصعبة لو اتناقشتا وفكرنا فيها بجدية شوية...
اكيد كلنا دايرين نرفع ونعمر بلدنا...
الفرصة متاحة للناس اى زول يورينا رايو شنو...

طرح جميل وفكرة اجمل ياابني سعد مصطفى كل المواضيع التي طرحت هنا للنقاش اصبحت ونسة منتديات فقط مداخلات وردود مع وقف التنفيذ ..مثل هذه المواضيع تحتاج للمتابعة التي نفتقدها وتحتاج للجدية كل الناس سوف يكون رائها بانها مع ذلك الطرح الجميل والفكرة الممتازة وسوف تصلك ردود ومداخلات كأن المكتبة قد بنيت واصبحت جاهزة لاستقبال القراء نريد ان نعيش واقعا وليس احلاما نريد ان يتطوع احد الشباب لمتابعة ذلك الموضوع والوقوف عليه وبعدها يمكننا ان نحقق ذلك الحلم اسف ياسعد لهذه المداخلة الصريحة

واللة نعم الفكرة ومشكور على التفكير لان تلك الاشياء بلدنا فى حوجة لها وقد كتر عطال الشباب وان شااللة تنفذ تلك الفكرة وجزاك اللة خير

ود الخال وودالعمة .... نحن فعلا محتاجين لمثل هذه الاشياء لانو يا اخي لان هنالك ابناء من العسيلات لا يعرفون القراءة والكتابة حتي اكثرنا لا يعرف الدخول في النت وهو فعلا مشروع جميل .. وكمان اضيف عليهو مشروع محو الامية ... تسلم تسلم