سوال الى الخالة تابيتة بطرس مشرفة المنتدى

اولا اسفين على الكلفة ياقول حاجة فريخة الله يرحمها فى حين انو اصلا هى
مابتقضى ليها غرض الملا ح كلو تقول ليك ناولنى الكمشة بعد شوية تقول ليك
تعال حركة لى البصلة اا وبعد ده كلو تتاسف

الســـــــــــــــــــــــــــــــــــــــــــــــوال
هو ماهو الفرق بين الجردقة الترابية والجردقة الزغاوية
وهل هناك اى اثار صحية عندما نتناول اى نوع من انواع الجردقة

وانا بسال من ده باعتبارك مشرفة والاهم من ده كلو
منظر الجردقة الكئيب القبيح الذى يشككنى انه
غلط استعماله او قد يوثر على صحتنا
وذلك لانى ارى اسراف حبوبتى امنة
بت حنون فى هذا الصنف
ولو توجدى اى مخاطر على استعماله نرجو الافادة
ومن ثم تبليغ الحبوبة امنة بت حنون

بمناسبة الجردقة الترابيه ذكرتنى نكتة الشايقى النزل فى محطة الرباطاب فسال المرة الرباطابية البتبيع فى الجردقة فرفعت السعر فقال ليها ليييه الشى تراب...فما كان منها الا ن شالت ليهو حفنة تراب وقالت ليهو هاك خم.....

اكيد للجرقدة فوائد وانا ماباكل الفطير باللبن الا بالجردقة وبرضو ملاح الورق والخضرة ما بموتو الا بالكاتول ..غير فوائد( الشربه)

الظاهر عليك عوااااف ياود اخوى.. Very Happy

محمد عمى مشكور على المعلومات وحاتك يامحمد عمى ود اخوك ياكل النار

خلى الترابية وتانى وتالت خايف الجدقة كان تابية كان زغاويو وراجى تابيتا ترد
والا -----------------------------؟؟؟؟؟؟؟؟؟؟؟؟؟؟؟؟؟؟؟؟؟

السلام عليكم اولا اقول ليك انو الجردقة الترابية رغم منظرها الكئب دة الا انو لها مصالح عديدة فى علاج الحرقان والام المعدة والعلاج البلدى للعقم ودة طبعا غير انو بيعملوها فى الفطيرفهى طبعا صحية والا كان يحظر بيعها اما الجردقة الزغاوية يا الشميس يا ولدى لها عدة استعمالات منها نافع واخر ضار النافع طبعا تساعد على فرك البا مية والخضرة والورق ما تكون جعت تلقاك مشتهى الحاجات د ىوايضا تستعمل كمنضضة للوز ووجع الضرس واما الاستعمال الضار فهو فى مجال الكيف طبعا (الصعود التمباك)وان شاالله اكون تحت حسن ظنك ولقيت الاجابة الكافية

تسلمى يا تابيتا على المعلومة

وياقل هو ان بقيتا مابتضر ولى هسى انا خايف منها
لكن البعد ده ماعلينا الا ان نتوكل
ونقوم اليلة نشد لينا فطير حار بى لبن ضان ولون الفطير
السواد لكن يا حلات طعمو مع الجردقة
وام كوم بتاكل الجدق واكان بتاكله انا على طول حا استعملة

يا شمس الدين سلام عليك والله موضوعك جميل واضاف لينا معلومات جديدة من ود راشد ووزيرة صحة المنتدى ومشكورين وما نعدمكن انشاء الله
ونفسى اعزمكم معانا مديدة بالجردقة لانو امى بتظبط الحاجات دى لو شالوك من اضنيك ماتقوم من حلاته.

الجردقه

التريبه

العطرون

الكاتول

مترادفات دايرين نفرق من حيث الشكل

واللة ياشمس الدين كلامك جد وعايزة الرد ودائما بتنعشنا بى كلامك وتقاريرك وتقلب علينا المواجع تذكرنا الحلة ناس الحنونية وكلامها وشراب البيبسى

عمرعبدالقادرالحاج محمد كتب:: يا شمس الدين سلام عليك والله موضوعك جميل واضاف لينا معلومات جديدة من ود راشد ووزيرة صحة المنتدى ومشكورين وما نعدمكن انشاء الله
ونفسى اعزمكم معانا مديدة بالجردقة لانو امى بتظبط الحاجات دى لو شالوك من اضنيك ماتقوم من حلاته.

تسلم اخو عمر عبد القادر وكلم الخالة تظبطها صاح

لانى جاى مكوفر وبطنى ملانة رز من بلاد الكفار

فدوى عثمان كتب:: واللة ياشمس الدين كلامك جد وعايزة الرد ودائما بتنعشنا بى كلامك وتقاريرك وتقلب علينا المواجع تذكرنا الحلة ناس الحنونية وكلامها وشراب البيبسى

بت العم ام حمودى تسلمى والله الحله مشتنها وها رايكم شنو فى جنس

الخبارت ديل والجرقة ده انا بشوفة عند نسوان العرب وكنت فى غاية الغرابة
تراب بى قروش فى حين انو بيستعملو والفنجان كان بى متين وخمسين جنيه
ونسوان العرب كان عندهن جنس ذباين اشي وكان بيبعن معاهو المح

واللة نحنا عندنا شى غالى خلاص الجردقة لانها صحية ومفيدة كثير خاصة لى النساء فى فترة الولادة

ازيك يا الشميس الشي الطراك الجردقة شنو وانت في بلد الرز واللة شهيتنا لملاح الورق الما بحلي الا بالجردقة وزي ما قالت رابعة ليها فوائد صحية وبتساعد في الهضم

والله انت يا اب رويس بتجيب ليك في جنس حاجات !!!!!
هسي الجردقة دي قلعتها لينا من وين
اول أمبارح كنت شافع صغيروني وبعد ما فتحته ودوك الهند
الجردقة دي لحقتة عرفتها وين ؟؟؟؟؟؟؟

شكيت محنك يا جنا جاد كريم

والله يا دعوب ماليه راسى بالحيل

وتانى وتالت اشك فى انها ماصحية
ونفسى القى الخبر اليقين لذلك الشى
وهل عندها تاريخ صلاحية وكيف بعرفها
اذا كان انتهت او غير صالحة
وانتو البيبعها ليكم منو فى القويز
ونحنا عندنا فى فرق التوم ياقل هو

اها اناشالله تكون اكلت الفطير بالبن ياالشميس

يسمنى مااكلت الفطير بى اللبن ياخالة رابعة

وهنا عندنا اللبن يعوف رحيتو ماتمام
لانو لبن جاموس تقيل والاهم من ده كلو الجردقة مافى
فى الهند والعيش الليل الفتوريتة مافى ولا ودعكر ولا قدم حمام
والا هجين ولا طابت ده المخلينى مكوفر
بس اليوم اكلت الافضل من الفطير قراصة بى تقلية
بعد غيبة دامت عيييييييييييييييييييييييييك وكم انا سعيد بها
وعذمنى ليها واحد من العيلفون ولى هسع طعمة فى لسانى وخلتنى اترع

تنفعك ياخال

والله ياشمس الدين انامتابع البوست دا لي كام يوم وماكنت عارفه عشان رامين بالنا كله في المنتدى العام لكن والله اقرا واضحك وياقول دعوب جنس محنا انا غايتو رائ في الجردقة زي رائك الجردقة دي تراب وكلام فاضي ومافيها اى فائدة وخصوصا الترابية وسمعت بانها تراب من النوع الممزوج بالملح وبيجي من المناطق ذات الارض المالحة ولو في واحد دارس جيلوجيا اكان طلعها لينا اي كلام اما الجردقة الزغاوية دي طبعا كيمائية عديل ويمكنها اذابة كثير من المواد وياريت لو حمد عبدالله ادانا رايه فيها وزمان الناس كانو ا بيشربوا الشربة وينقفلوا في بيت لمدة كام يوم ولااكل ولاشراب ويقولوا ليك فلان شارب ليه تريبة يعني معتقدين اعتقاد صاح في التراب دا والله نفعه ياقولك اكان في الفطير والزغاوية اكان في الخدرة وغايتو الحافظ الله وتحياتي ياشمس الدين

محمد هشام احمد كتب:: تنفعك ياخال

تسلم يابن اختى وماشا الله حمودى بقيت راجل

عاوزنك تجى ممهندس ادى الدنيا وطالع لابوك

محمد بركات احمد كتب:: والله ياشمس الدين انامتابع البوست دا لي كم يوم وماكنت عارفه عشان رامين بالنا كله في المنتدى العام لكن والله اقرا واضحك وياقول دعوب جنس محنا انا غايتو رائ في الجردقة زي رائك الجردقة دي تراب وكلام فاضي ومافيها اى فائدة وخصوصا الترابية وسمعت بانها تراب من النوع الممزوج بالملح وبيجي من المناطق ذات الارض المالحة ولو في واحد دارس جيلوجيا اكان طلعها لينا اي كلام اما الجردقة الزغاوية دي طبعا كيمائية عديل ويمكنها اذابة كثير من المواد وياريت لو حمد عبدالله ادانا رايه فيها وزمان الناس كانو ا بيشربوا الشربة وينقفلوا في بيت لمدة كام يوم ولااكل ولاشراب ويقولوا ليك فلان شارب ليه تريبة يعني معتقدين اعتقاد صاح في التراب دا والله نفعه ياقولك اكان في الفطير والزغاوية اكان في الخدرة وغايتو الحافظ الله وتحياتي ياشمس الدين

والله البركة البتاوفقنى الراى عشان تشد من اذرى شوية

تجاه تلك المحنة الجردقة الترابية ولما تقيف فى صفى انت
يعنى منصورين باذن الله وماظن ابدا ليها طعم ولا ضل ويبقى لزومو
شنو تقرفونا بى حاجات ذى ده ذايد قف الفتتوريتة واللون القبيح
وللمعلومية ياخال انا ابدا مابكال كسرة بس بحب اطمن على
موقف السادة مستخدمى الجرادق وماهو خطر هذه الماده