البت القبطية الحبت صاحبنا

اسماعيل الريح بلال كتب:: ودالخليفه كيفنك لعلك طيب اولا عليك الله اللون ده تاني ماتكتب لينا به اللون العامل ذي الاي شدو ده القصه ده امكن تطول ومامعروف ان كتبت لينا باللون ده نقدر نشوفها ولا مانقدر

اه خف خليتنا كسع كسع نتاوق ليك. تسلــــــــــــــــــم يا اميــــــــــــــــــــر

اسماعيل كيفنك الكبر حصل ولا شنو Very Happy

ياخ انا حاديك جائزة احسن متابع
واحتمال تطلع بجائزة تلفزيون بلازما وكدا
واحتمال فروجة زااااااتو يجيك في البيت
وتتصور مع ابطال الفلم فروجة ومنتصر والبت القبطية
وجااايك هسع طبس خليك معاي
واللون دا
تاني تب ما بنكتب بيو
بس خليك قريب

محمد بركات احمد كتب:: الله يجازيك ياودالخليفة والله انا لي يومين قلت اخلي الموضوع لحدي مايخمر شوية لاني مابريد الجهججه بتاعت الانتظار دي كارهه في المسلسلات والله القصة شدة ماعجبتني على طول عملت ليها برنت اوت وقريتها بمزاج والله يجازيك ياودالخليفة بكل ماهو خير وتسلم وفي الانتظار على احر من الجمر جمر شنو هبله ..

ابن العم كيفنك
متشعلقيييييييين عدييييييييييييييييل (التشعلق درجة عالية من درجات الشوق )
وتسلم للقعدة وقعدتك معانا شرفتنا والله
واهو لقدام الشغلة حتسخن بس خليك قرييييييب
فروجة دا حيعمل حاجة حتتكيفو منو
انا ما احرق ليكم الفلم
بس خلوكم معانا

[color=red]اخر مرة قلنا مشينا ومعاي ناس العمم الكبار لي ابو البت في البت في البيت والراجل كتر خيرو واحترمنا شديد وحاج ابراهيم فتح معاهو الموضوع بعد ماكل الناس كانو متوترين جدا ابو البت قال يديهو فرصة وحايرد علينا خلال اسوبع وماتنسوا نحنا مخلين البت في بيت صديقتها ولما رجعنا ليهم انقسمنا الي قسمين ناس يقولوا ترجع معانا القضارف وناس يقولوا تجلس في بيت صديقتها لحدي مانشوف راي ابوها لكن بيني وبينكم اكتر الناس دايرنها ترجع معانا القضارف عشان يشبعوا فيها شبع وشوف عشان البت شديدة لمن غلط00 والولد فروجة مقعوز عويناتو ويبحلق في وش البت وحاتكم لوماعمنا حاج ابراهيم نهروا تقول داير ياكلها00 قلت ليهو يافروجة حرام عليك عملت للبت وجع وش طبعا الكلام ده قدام البت اححححي يالله سمعتني رد خجلتني في حناني قالت لي مستعدة عمري كلوا بس اقعد اعاين في وش فروجة لاني بشوف في عيونو كلام كتير00 اهـ انا قادر الله ومخير الله في خلقوا بس لوشفتو فروجة واقف معاها وحاتكم زي الكمون الواقع في لبن زول وشو كلو مكجم تقول تربيزة لحام واقف قدام بت وجهها ولا القمر00 حكم والله00 المهم اخر حاجة قررنا انو البت تقعد مع صديقتها وبعد اسبوع نسمع راي ابوها 00 بالرغم من انو البت ما عندها اي رغبة تقعد في بيت صديقتها ولكن نحنا شفنا عشان لايستفحل الموضوع اكتر من اللازم الصاح انها تكون قريبة من اهلها رغم الجفوة الحاصلة بينها وبين اهلها 00 ركبنا العربية وسافرنا للقضارف والله ياجماعة البت واقفة برة بتودع فينا وهي بتبكي بحسرة والم لو بي مرادها لاتفارقنا ابدا والولد فروجة يعاين ليها من نافذة العربية والدموع عشرة عشرة وصلنا القضارف طبعا الناس كلها منتظرانا بفارغ الصبر دايرين يعرفوا الحاصل شنو وفي صباح اليوم التاني كانت هنالك مفاجأة عجيبة00

طبعا زي ماقلت ليكم وصلنا القضارف وطيلة السكة من مدني لي القضارف صاحبنا ابوالفررايج عامل فيها سرحان عبدالبصير قال لي يامونتي انا خايف ماعارف ليه طبعا ضحكته شديد في كلمة مونتي لانو عمرو كلو ماقال لي يامونتي بس شابكني ليك منتصر منتصر وانا اشيل وادلع فيهو فروجتي وابوالفراريج المهم قلت ليهو خايف من شنو قال قعاد البت في حتة واحدة مع اهلها مافي المصلحة قلت ليهو ياخي الحكاية كلها اسبوع وابو البت يدينا الخبر الاكيد ونعمل عرسك الجننا ده وينتهي الموضوع00 طبعا زي ماقلت ليكم ناس الحلة كلهم منتظرننا عشان لزوم الشمارات وكدة اول حاجة لاقتنا ليك حاجة امنة اها مالكم جيتوا حانفين وشكم كدة وينا البنية الحليونة وبعد شوية جاتنا ليك حاجة التاية اها خبركم انا عارف صديق ده من ما مشا معاكم عارفة ماتجيبوا نتيجة طبعا صديق ده زوجها وكان باكي شديد في البت القبطية وهدد بيها حاجة التاية لو كترت كلامها تاني يعرس البنية ويهرب بيها ومن ديك حاجة التاية خايفة00 المهم الناس سلوا روحنا بالاسئلة والله مؤتمر صحفي بس 00 صبحنا اليوم التاني كويسين ومشينا السوق والبلاقينا كلو يسألنا سويتو شنو في مدني مع اهل البت علي فكرة يمكن القضارف كلها عارفة موضوع البت السمحة الجات هاربة من اهلها عشان فروجة00 طبعا فروجة عمل ليهو شعبية كبيرة من الموضوع وبقي مهم خلاس لو عايز تقابلو الا تقطع تذكرة هههههه بعد شوية جاني تلفون ارجع البيت ضروري وانو البت القبطية جات راجعة تاني 00 الليلة دي يحلنا الحلة بله وجري علي البيت ومعاي فروجة لقيت البت قاعدة وخالفة رجل علي رجل يابت الناس ماليك رجعتي نحنا مش قلنا تنتظرينا هناك قالت لي كدي اقعد عشان اشرح ليكم قالت لينا فاكرين الولد القال قريبي وجا لحدي هنا ومعاهو بتاعين المباحث عرف مكانها وجا هددها اما تهرب معاهو او يقتلها وتدخل ابو صديقتها وعمل معاهو ضجة كبيرة ومشي علي هذا الاساس وقالت هي خافت وقامت الصباح بدري ركبت الحافلات وجات القضارف وتعالوا شوفوا نسوان الحلة لما شوفوها حاجة خديجة قالت ياخواتي الزمن ده البلقي ليهو راجل يتشعلق فوقو لمن يموت وبي هناك حاجة التاية ماخايفة علي راجلها اها ياالممسوخة جيتي تاني شكيتك علي الله قالت ليها انتي كان ما عدمتينا نفاخ النار مابرتتاحي 00 وبيني وبينكم ناس كتار جدا فرحوا بي جيتها لانكم لاتتخيلوا كيف البت دي دخلت قلوب الناس وحبوها بالرغم لرفضهم اسلوبها في الهرب من اهلها الا انهم حبوها وقدروا يجدوا ليها مبررات00 انه الحب ينعل ابو الحب زاتو ياخ00 وحاتكم فروجة بقي زي بستم العربية القعدة غلبتوا وفضل حايم البيت كلوا طبعا ناس الحي مجرد ماسمعوا بي جيت البت انكبوا علينا والله بيتنا ده محل تقعد مافي وبيني وبينكم البنية وشها ماصبوح وماعسل عديل كدة وحاتكم الناس دي بتجي تتفرج مابتجي عشان تشوف الحاصل شنو بالذات عم ابراهيم داخل قالد البت خارج قالد البت (طبعا قالد دي معناها حاضن لزوم الحناكيش وكدة) وشابكا ليك يابتي حمد الله علي سلامة الجية وبركة الشوفه حاجة امنة زوجتو قالت ليهو تبيت في الخلا ياراجل ماتمشي تشوف شغلتك وحاتكم النسوان كلهم خايفات علي رجالن من البنية لانو البنية قالت تموت وتتكسر حتة حتة في القضارف تاني الا يشلوها ميته من هنا قالت لي حتي لو ابوي وافق وقال تعالوا نعمل العرس امشوا انتو كملوا العرس وتعالوا انا بقعد مع ناس حاجة التاية دي يلبوسني الزفاف حاجة التاية عاينت ليها باستغراب كدة ومع لوية خشم قالت ليها لا يابتي احسن ليك بيت ناس حاجة نفيسة ماهل وسمح00 البت طبعا طاب ليها المقام ولقت الناس طيبيبن وعلي نياتم00 البت قالت لي يامونتي اوووووووب انا من مونتي دي بتحرقني في حشاي والله بتمني اسمعها منها هي بس مش من فروجة العامل خشمو زي خشم البعشوم تحلف تقول بعوعي بعدين كلمة مونتي دي عندها هي رنانة جدا اما عند فروجة زي الزول الحلقو مقروش وشارب ملح الله يقطع وشك يافروجة0 المهم البت قالت لي يامونتي انا المرة دي مصممة كان ما حسمت موضوع زواجي من فروجة ده ما بتحرك لاي مكان او اقوم انتحر ليكم هنا 00 ياساتر الليلة ياود الاغبيش ود الاغبيش ده جدي النوع البروب الموية 00 الليلة دي تلحقنا وتفزعنا من البنية الدايرة تجيب لينا مصيبة دي قلت ليها اسمعي هنا ده كلها كم يوم وابوك يتصل علينا ويقول تعالوا خلاص وربنا يتمو علي خير انشاء الله00 اليوم الثالث جاني تلفون من صديقة البت الكانت معاها في مدني وقالت لي الولد جاهم في البيت وهددهم بانهم اختطفوا البت وعمل ليهم فضايح لايعلم بيها الا الله حقيقة انا زعلت وعلي طول مشيت ومعاي فروجة لصاحبنا ظابط في المباحث وحاتكم بي تلفون بس جابوا خبر الولد مسكوه ليك ناس المباحث في مدني وعملوا ليهو الطيارة قامت زولكم بقي في الطريقة التفكوا قالوا ليهو انت مش كتبت تعهد في القضارف بان لاتتعرض للبت دي قال ليهم نعم قالوا ليهو طيب داير منها شنو تاني قال ليهم انا بحب البت دي وعايز اتزوجها قالوا ليهو البت ماعايزاك دايرة واحد من القضارف وهربت ليهو انت مابتحس المهم بشتنوهو جنس بشتنة ومحل محبوس وين مامعروف00 اليوم الرابع في العصرية كدة وبنات الحلة متلمات مع البت وعاملين ديك يا الجبنة الماخمج واخر ونسة وضحك والولد فروجة كعادتوا مشي استحمه بي صابون الفنيك وجانا بي ريحتو الوحيدة بت السودان ديك والله جنازة بس والليلة زولكم خاتي ليهو وردة حمراء في جيب الجلابية قادر الله وحاتكم زي اشارة المرور وقعد بمزاج مقابل البنية ويبحلق في عويناتو العاملات زي البلالي ديل00 البت فتحت قلبها للبنات وقعدت تحكي عن علاقتها بي فروجة بدت كيف ووين ومتي واثناء الجلسة الحلوة ديك جاني ود اختي قال لي في واحد بي عربية واقف قدام الباب وقال عايزك00 مشيت لقيت ليكم واحد عندو عمة كبيرة انا افتكرتوا حسين خوجلي قلت ليهو اتفضل دخلتوا في الصالون وقعدنا بعد شوية فاجأني بي قنبلة عجيبة 00 احححححي يااصبعي والله وجعني شوية كدة واجيكم صادي[/color]

اها جيناكم بالباقي

حبايبنا الحلوين ازيكم والله الواحد مشتاق ليكم عديل كدة اها رايكم شنو جيتكم بسراع عشان الولف كتال00
اها جاني الزول العامل عمتو زي كمال ترباس ده انا قلت ياربي المحافظ حقنا غيرهو ولا شنو جلسنا في الصالون قال لي طبعا انت مابتعرفني وانا بشكرك كتير علي وقفتك مع بتنا لاحظوا كلمة بتنا دي كويس قال لي انا جاي بخصوص البت المعاكم وانا بتربطني صلة نسب معاها يعني بينا نسب قلت ليهو وضح لي اكتر نسب كيف ومن ياتو ناحية قال لي شقيقي متزوج خالة البت 00 الزول ده من عيونو المنطاط ديل قلبي اصلوا ما ارتاح ليهو وبعدين هو كان بتكلم وتحس بيهو زي المضطرب كدة وقبل ما يدخل في الموضوع مرة يتكلم عن السياسة ومرة عن الكورة ومرة ينط من موضوع لي موضوع زي قرد الطلح قلت في قرارة نفسي اشوف اخر الزول ده شنو المهم زولكم بعد شوية فجر لي قنبلة قال لي يامنتصر طبعا الحقيقة الانت ماعرفها انا عاقد علي البت دي 00 ياود الاغبيش الليلة ده كلام شنو قلت ليهو قلت شنو قال لي انا عاقد علي البت دي من زمان وحاتكم الزول ده شفتو عشرة عشرة وبقي لي المرفعين الساكي ارنب00 والزول دة لما تشوفوا علي طول تقول عمرو 50 سنة شن جاب خمسين الي عشرين بت في عمر الزهور زي الوردة المفتحة يعقدوا ليها علي المجلكن ده وحاتكم اخير فروجة صاح فروجة عامل وشو زي البنية كدة ومكجم كجيم عدوكم لكن اخير من عمنا ابو عمة دة قلت ليهو طيب انت من زمان وين والبت معانا ليها فترة مالك ماظهرت من زمان قال لي انا كنت مافي كنت في مصر وجيت امس وعرفت بالحاصل وعلي طول جيتكم قلت طيب المطلوب شنو الان مني قال لي داير البت وتمشي معاي بالذوق لمدني 00 قلت ليهو طيب انا اعرف كيف انك عاقد عليها وين قسيمة الزواج قال لي موجودة في مدني والله ياجماعة بس اتمالكت اعصابي قلبي قال لي قوم فوق واقطع في الراجل العايب ده كف لمن يآمن لكن قلت ياولد برضوا ضيف واكبر منك اعقل شوية وشوف نهاية القصة قلت ليهو طيب دقيقة طلعت برة ارسلت لي فروجة جاني جاري التقول مركب مكنة حصان جا بسرعة كيف انا ماعارف ورسلت لعم ابراهيم قمت حكيت ليهم القصة وقبل ده كلو سالت البت قلت ليها جا واحد هنا وموجود معاي في الصالون وقال كذا كذا وانو هو عاقد ليك 00 البت قربت تجن من الصدمة قالت لي عاقد علي وانا ماعارفة قلت بس انا داير منك الحقيقة هل الكلام ده صحي ولاغلط اووووووووب علي انا من الدموع وكتيل العيون الرماد كال خشمك يامنتصر هسي بتوقف اللحن ده كيف والله بيني وبينكم قطعت قلبي من جوه قالت لي يامونتي معقول انا اكذب عليكم واكون عاقدين علي واجي اقول ليكم كلام مختلف وبعدين فروجة ماعارف اي حاجة عني ومن صحبتي لوفي كلام زي ده وعملت الحركة حقت المسيحين ديك وضعت يدها في كتفها اليمين وكتفها الشمال وفي جبهتها والله بس رولانادينو قالت لي مستحيل قلت ليها خلاص تعال لي وشوفي الزول بنفسك وقدامو قولي الكلام ده وفعلا دخلنا انا وفروجة وعلي طول فروجة قال للراجل معقول الكلام البتقول فيهو ده وبعد شوية جا عم ابراهيم شايل عصاتو السلام عليكم ياجنيات حبابك ياعم ابراهيم ابقي داخل لي جوة وعلي طول عم ابراهيم قال وينوا العريس الجديد قلت ياهو ده ياعم ابراهيم قال ليهو يازول ماتخاف الله البنية دي مي قدر بتك قلنا المسعلة شنو وجاي من وين وبتدور شنو اختصرلنا الميضوع بي قلبي قلت عفارم عليك ياعم ابراهيم طبعا الراجل حاول يلطف الجو شوية وقعد يرحب بي عم ابراهيم قال ليهو يابوي كدي اقعد شوية ونسالمك وبعدين نقول ليك الموضوع عم ابراهيم قال ليهو الببو الينفخك يامطموس بتدور تتلصق في البنية السمحة دي 00 فروجة قال ليهو ياخي انا قعدت اربع سنوات في مدني وكنت بمشي بيت ناس البت باستمرار ماحصل شفتك لافي بيتم ولافي مدني الراجل قال لي فروجة والله انا مشغول وسفرياتي كتيرة عشان كدة ماتصادفنا00 وبعد شوية جات الغزالة داخلة علينا وحصلت المفاجأة00 بجيكم راجع ان شاء الله

كده نزل لينا منها انشاء الله خمسة سطور بس ان الله حيانا لي باكر بعيدة اصلوا ابوعمه ده مغصني خلاص انشاء الله اكونوا خبطوه

اسماعيل الريح بلال كتب:: كده نزل لينا منها انشاء الله خمسة سطور بس ان الله حيانا لي باكر بعيدة اصلوا ابوعمه ده مغصني خلاص انشاء الله اكونوا خبطوه

اسماعيل الريح
نأسف أشد الأسف لاننا لم نلبي رغبتك
لكن حنديك الباقي وبتشوف عمك اب عمة دا بعمل شنو
بس ربنا يستر
تسلم يا راقي
ونرجو منك السماح ثم السماح ثم السموحة
وكلو الا زعلك
lol!

اها صاحب الجزلي في منو خبر

بس من قبيل منتظر وناس اسماعيل ديل الليله الكهرباء قطعت عندهم وماحايحضو المسلسل
اها اسرع اب عمه سوه ليه شنو
اتفقنا مع ناس زين (موبيتل ) عشان ننزل ليهم الاعلان ده وياود الخليفه حقك بره بس اوعه تكلم اسماعيل

حين تري الصيوان سقفا لبيتك
والدلوكة والسيرة هي معزوفتك
المعازيم هم أسرتك....
تأكد انك وقعت في مشكلتك

العرس ...عالم ما جميل

نواصل مع فرووجه والبنت القبطيه

الحبان كيفنكم والله وحشتوني عديل كده ... اها كدي نتوهط ليكم في الواطة دي واحكي ليكم عن الشايب العايب ابوعمة طبعا زي ماقلت ليكم الراجل قال هو عاقد علي البت وانو كان مسافر خارج السودان في مصر وزولكم ده جاي لامعاهو قسيمة... ولامعاهو ورقة وماعندو شئ يثبت انو عاقد علي البت طبعا عمنا ابراهيم قاعد ويشخبط بعصاتو في الواطة ساكت بس داير ليهو فرصة عشان يشيل العصاية دي ويدي بيها الزول ده في نص راسو فروجة قاعد يبحلق بعويناتو ديل زي كديس الخلا ومخلوع جنس خلعة الله بسألني تقول ساكيهو كلب 00 المهم يالحبان ناديت البت وقلت ليها تعالي شوفي الزول ده وادينا خبرو شنو وبتعرفيهو ولالا 00 وفعلا جات البنية السمحة السمهرية لابسة داك يالتوب السمح واول مادخلت شافت الزول ابوعمة صرخت صرخة بصوره هيستيرية جدا ووقعت نبذ في الزول انت ياتافه تاني لاحقني هنا داير مني شنو واهلي ماوقفوك بواسطة الشرطة تاني جاي لاحقني هنا والبت بتبكي بحرقة وزولكم المابخجل كأنو الكلام مابعنيهو تقلة دم بصورة ماطبيعية قال ليها ياحبيبتي معليش انا كنت مسافر هنا نطه عمنا ابراهيم وقال ليهو الببو الينفخك ماقالت ليك مابتعرفك 00 المهم انا مسكت البت وقلت ليها اهدئي واقعدي هنا احكي لينا بالتفصيل يبقي شنو الزول ده جلست البت وقعدت تحكي لينا انو الزول ده كان مطاردها من ايام بتدرس في الثانوية وحاول كم مره يعترض طريقها وفي يوم من الايام صرخت ولمت عليهو الناس وبعد مدة جاهم في البيت عشان يطلب يدها من ابوها وقاموا اهلها رفضوا من مبدأ اختلاف الاديان لما قوبل طلبه بالرفض بدا يضايق البت وفي مرة من المرات حاول يختطفها ولكن المارة انقذوها البت حكت لي اهلها الحاصل ومشوا فتحوا بلاغ في ابوعمة وكتبوهو تعهد بعدم التعرض للبت رغم التعهد ظل هذا العجوز يلاحق البت باستمرار ومافي سبيل ماطرقوا عشان يصل للبت دي 00 المهم بعد ماسمعنا كلام البت والله ياجماعة من غير مانحس كلنا هجنا بصورة غير طبيعية بالذات الولد فروجة وعمنا ابراهيم قلت ليهم ياجماعة سمعنا كلام البت خلونا نسمع كلام الراجل ده قلت ليهو كلامك او ردك شنو قال لي كل الكلام القالتوا البت دي كذب وانا عاقد عليها بس كنت مسافر قلت ليهو طيب ياخ اذا انت عاقد عليها وين قسيمة الزواج قال نساها ماجابا معاهو طبعا قلت ليهو للاسف رغم انك راجل كبير لكن انت الكذاب وفي اللحظة دي انفعل فروجة اكتر وحصل اشتباك مع الراجل وقلت ليكم عمنا ابراهيم ناوي من بدري يدي الزول ده بعصاتو في نص راسو وفعلا وحاتكم صقع ليك الزول في نص راسو لمن قال هق انا قلت خلاص كتلوا المهم هديت الامور شوية اتلموا علينا الناس ودايرين يكتلوا الزول عديل كده قمت سالت الراجل قلت ليهو طيب انت داير شنو الان قال لي داير زوجتي برضوا مصر انو زوجته علي طول اتصلت علي صاحبنا ضابط شرطة جانا سريع عرف الحاصل كلوا كفت ليك الراجل زي الماحصل حاجة وركبوا في العربية ومشوا مركز البوليس00 طبعا ناس الحي كلهم كانوا هايجين جدا وشايفين البت دي بتهم خلاص وحبوها ورادوها وبتمنوا ماتفارقهم ابدا وهي كذلك نفس الاحساس مافي زول في الحي ماحب البت دي حتى عمنا ابراهيم وعم صديق وحتى الاطفال البت عملت ليها شعبية كبيرة جدا وكل الناس متعاطفة معاها00 الطريف في الموضوع بعد ما الشرطة اخدوا الراجل فروجة مسك ليك الحنان حقوا من يدها وقال ليها مافي قوة في الدنيا تقدر تفرقنا من بعض انعل ابو الحب زاتو ياخ فروجة بقي رومانسي درجة اولي وبقي يتغزل ياناس وقسما البت دي نظرت لي فروجة نظرة لوقعدت اكتب من الان الي يوم يبعثون ماحاقدر اصف ليكم تلك النظرة العجيبة والتي تحمل دلالات رهيبة جدا00 البت زي اخدت في خاطرها انو موضوع الزول ده اثر فينا او ادخل شكك في قلوبنا لكن ابدا والله وعشان ربنا ينصرها تصلت صديقتها من مدني وسألناها عن هذا الرجل اكدت لينا نفس الكلام القالتوا البت00 شاهدت لحظة عناق بين فروجة والبت دي مباااااااااااالغة شكيتك علي الله يافروجة الله بسألني تقول حاضن الدنيا ومافيها وفي اللحظة ديك الناس ملمومة وانت يافروجة لاخجلت ولااستحيت وحات الله ماصدق لقي ليك اللحم الابيض المتوسط ده وعمل فيها نايم وحاتكم الا جريتوا جر مكنكش كنكيشة عدوكم بس قرادة وبيني وبينكم انا حسدتوا عديل كده ههههههه بعد ماجريت فروجة قال لي والله جنس حساده عليكم عاينت لي عيون البت زي البتقول لي ياحسود طيب انا ذنبي شنو ياخ ادونا معاكم حبة عمنا ابراهيم لمن جا ماشي مسك حضن ليك البت اها يابتي تصبحي علي خير وماتخافي عوجة واحدة بتجيك مافي طبعا هو لسة حاضن وحاتكم الا صاحت ليهو حاجة امنة حتى فك البت00 اتصل علي ضابط الشرطة وقال لي الزول في الحراسة تعال لي الصباح نشوف الحاصل شنو وفي نفس اليوم جاني تلفون من مدني عجيب خلاص00 دقيقة بس واجيكم صادي .. فتكم
بعافية ياحلوين

عمنا عصام ودالخليفة ... تمها لينا خلينا نشوف اشغالنا... بطلنا اى حاجة وقعدنا حارسين فروجة دا.. عطلت عجلة العمل ياعمنا... تحياتى للاهل كلهم

عاد فروجة ده معاه زعل نصبر بس نسوي شنو ياود الخليفه يارائع القصه سمحه شديد بعدين فروجة ده ربنا مسخر ليه الجماعه اصلو في ناس شينين لكن احبابهم كتار

.

زول الجزلي ده ودعمتي والله طيره طيرة ابريش من الدريش سأله في المعاينه جاوب تمام في النهايه قال ليه محافظ الجبل منو قال ليه ماعارفه انا من شرق النيل طيره طوالي اسع بقه مدرس في الحلال القدام حلة اسمها كبوته الفلخ دكان مافيها الدكان في خرج بجيك الصباحيه لافي بي حماره تشتري حاجات يومك تاني الا بكره .

وين يا احمد فروجة ده مابتفوت انا بطارية الlaptop بدري بملاها لي فروجة ولو قطعت بمشي ناس العماره

عندهم التلفزيون ابوكماشات

ناس زين واريبا يااحمد ما صدقوا انه شيخ عبدالحي قاليهم الجوائز ده فيها انه عشان كده وقفوا الدعايات والساحه خلت لي فروجه قولت ليك الله مسخر ليه تمام امره سالكه

سعد مصطفى محمد سعد كتب:: عمنا عصام ودالخليفة ... تمها لينا خلينا نشوف اشغالنا... بطلنا اى حاجة وقعدنا حارسين فروجة دا.. عطلت عجلة العمل ياعمنا... تحياتى للاهل كلهم

سعد مصطفى بنفسه هنا ما معقوووووووووووووووولة
ياخ زارتنا البركة وانا عارف وشك وش سعد علينا وفروجة متفائل بيك
يعني جيتك دي اكيييد فروجة حيعرس البت القبطية
تسلم للمتابعة وخليك قريييييييييييييب

حين تري الصيوان سقفا لبيتك
والدلوكة والسيرة هي معزوفتك
المعازيم هم أسرتك....
تأكد انك وقعت في مشكلتك

العرس ...عالم ما جميل[/size]

نواصل مع فرووجه والبنت القبطيه[/quote]

ياخ والله الكلام دا ابداااااااااااااااااع عديل
ههههههههههههههههههههههههههههههههههههههههه
انا من هنا احي فروجة بأنو خلانا نشوف الابداعات دي

بعدين مسعلة الدعايات
انا حاخليك الراعي الرسمي قبال ناس بزيانوس وشاي رتش وناس الحكاية في الكوباية
اسمع ناس زين بحاسبو بالدقيقة ما حنقدر نقبل دعاياتهم
تسلم للطلة وللمرور السمح الجميل المعطر
وجاااااااايك التقيل قدااااااام
فروجة دا حيبسطك لقدااااااام

اسماعيل الريح بلال كتب:: عاد فروجة ده معاه زعل نصبر بس نسوي شنو ياود الخليفه يارائع القصه سمحه شديد بعدين فروجة ده ربنا مسخر ليه الجماعه اصلو في ناس شينين لكن احبابهم كتار

.

زول الجزلي ده ودعمتي والله طيره طيرة ابريش من الدريش سأله في المعاينه جاوب تمام في النهايه قال ليه محافظ الجبل منو قال ليه ماعارفه انا من شرق النيل طيره طوالي اسع بقه مدرس في الحلال القدام حلة اسمها كبوته الفلخ دكان مافيها الدكان في خرج بجيك الصباحيه لافي بي حماره تشتري حاجات يومك تاني الا بكره .

وين يا احمد فروجة ده مابتفوت انا بطارية الlaptop بدري بملاها لي فروجة ولو قطعت بمشي ناس العماره

عندهم التلفزيون ابوكماشات

ناس زين واريبا يااحمد ما صدقوا انه شيخ عبدالحي قاليهم الجوائز ده فيها انه عشان كده وقفوا الدعايات والساحه خلت لي فروجه قولت ليك الله مسخر ليه تمام امره سالكه

تسلم يا اسماعيل لردودك الروعة والابداااع
والله ود عمتك دا خلاني اضحك ضحك
عليك الله اعمل لينا قصة عنو
انا متأكد انو بضرب سوق فروجة
غايتو الجزلي دا شكيتو علي الله
لكن فروجة دا بالجد بختو شديييييييييييييييييييييد
صدق انا حاسدو حسدة اسكت بس
واهو هسع حنزيد الحلقات كالعادة
نسبة للغياب الكتير
تسلم للقعاد وقعادك وتواصلك يشرفنا وتاج نفتخر بيه على رؤسنا

بعد العناق الرهيب الشافتو عيني داك بين
الولد المطموس فروجة والبنية الحليونه ديك وحسادتي ليهم عاينت يمين شمال
قلت النشوف لي زول رقيق يحضني كان ابرد شوقي ويطفي النار الفي جواي
وياكافي البلا مالقيت زول الا صاحبنا حيدر ويمين الله حيدر ده ان بزق
لامؤاخذة يفقد سوائل علي طول00 و زي ماقالوا ده احرف جزار مايطلع منو ربع
كيلو زول كلو عظام حته ساكت تمسكو منها مافي 00 بعد شوية جاني تلفون الو
منتصر 00 نعم منتصر 00 السلام عليكم وعليكم السلام قال لي انا والد البت
المعاكم تقدر تجينا في مدني بكرة قلت ليهو جدا بس انشاء الله خير قال لي
خير انت تعال ومايحصل الا خير بس الامر هام وعاجل قلت ليهو انشاء الله انا
الصباح عندكم قفلت الخط راسي بقي يودي ويجيب ياربي في شنو لو كان الموضوع
خير كان الزول ده قالوا لي في التلفون00 ناديت فروجة قلت ليهو اتصل علي
ابو البت وقال ضروري اجيهم في مدني بكرة فروجة اندهش من الموضوع وعلي طول
نادي علي البت وقال ليها ابوك اتصل وقال منتصر يجيهم في مدني البت نفسها
استغربت جدا وقالت لي انا في راي ماتمشي وخلونا نضع الناس ديل امام الامر
الواقع نعقد ويتم الموضوع الفكرة وقعت لي فروجة في راسو وقال لي الافضل
يتم العقد قبل ماتمشي مدني عشان مانتفاجأ بموضوع جديد وانا بيني وبين نفسي
مصر اني امشي واشوف الحاصل اخدت فروجة علي جنب وقلت ليهو انا لازم امشي
وفي كل الاحوال لو حصل شئ انا حا اتصل عليكم واواضح ليكم الحاصل شنو00
وعشان ماننفرد بالراي لوحدنا اشركنا معنا عدد من الاصدقاء فيهم من وافق
علي ذهابي لمدني وفيهم من اعترض وحسيت انو البت مقلقة جدا من موضوع سفري
لي مدني 00 اتصلنا علي الفور علي صديقة البت عشان نعرف لو في اي خبر شائع
في الحي البت قالت لينا لاحظوا ناس كتار جدا بترددوا علي بيت ناس البت لكن
في شنو ماعارفين هنا زادت مخاوفنا ولكن اصراري بالذهاب لمدني مازال موجودا
وحتى لانسبق الحوداث من الافضل التروي في الموضوع فروجة قال لي ماتسافر
بكرة سافر بعد يومين وانا في قرارة نفسي اديت كلمة للراجل وقلت ليهو بكرة
الصباح انا معاكم00 لم يغمض لنا جفن مساهرين نفكر في الحايحصل شنو ورغم
انو البت رافضة فكرة مشيتي لكن قدرت اقنعها ربما ابوها شاف من الافضل انو
يوافق ويتم الموضوع وتنتهي القصة الشغلت عدد كبير جدا من الناس00 صباح
اليوم التاني جاني تلفون من صديقة البت واكدت لي انهم لم يسمعوا باي خبر
بهذا الخصوص00 اتصلت علي صديقي ضابط الشرطة اخبرته بالحاصل شجعني علي
الذهاب وقال لي الراجل ابوعمة فجر لي قنابل عجيبة وقال ليهو مافي فكي في
مدني وضواحيها انا مامشيت ليهو عشان البت دي خسرت قروش كتيرة عشانها وعلي
فكرة في ناس كتار غيري ولكنني لم ايأس ابدا من الوصول اليها المهم ضابط
الشرطة قال لي سافر مدني وتعال ونشوف موضوع الزول العجيب ده 0 خلاص قررت
السفر اخدت معاي صاحبنا خالد عشان هو زول ماشاء الله مانع منعة كان في
عنكبة شنكبة عضلات تبش دورنا عربيتنا وتحركنا من القضارف الساعة التاسعة
والنصف صباحا وعلي بال مانصل اكتر من 600 مكالمة علي الطريق قلقين
ومتابعين00 الساعة حداشر ونص نحنا في مدني علي طول مشينا بيت ناس صديقة
البت اخخخخ انا من صديقتها وحاتكم شديدة شدة الحرامي السرق المحامي
استقبلونا استقبال حافل جدا ووجدنا والدها موجود وطلبت منه ان يذهب معنا
وفعلا مشينا 00 الليلة ياساتر قلبي ده مالو بيدق كدة ضربنا جرس الباب جانا
ابو البت اهلا اهلا اتفضلوا دخلنا لي جوة قعدنا في الصالون00 لقينا في
الصالون في اربعة اشخاص سلمنا عليهم وجلسنا00 من اشكلهم في اتنين يبدو من
اقربائهم والاثنين الباقيين شكلهم غرباء00 واحد منهم سأل قال وين البت قلت
ليهو في الحفظ والصون قال لي ياخي الكلام ده ماغلط منكم كيف تخطفوا البت
وترغموها علي الزواج من قريبكم قلت ليهو نحنا ماخطفناها البت جاتنا
بارادتها طايعة مختارة طالبة القرب مننا حلوة القرب مننا دي ههههه00 واحد
آخر قال لي طيب لو انتو جيتوا بالباب ماكان احسن قلت ليهو نحنا جينا قبل
كدة وفد من كبار رجالات القضارف وقابلنا ابوها وقال اسبوع وارد عليكم00
قام عمنا ابوالبت صديقه القبطية قال ياجماعة الحصل حصل خلاصة الموضوع شنو
قام ابو البت القبطية قال لينا نحنا اتشاورنا مع الاهل وحبينا ننهي
الموضوع وعشان يتم موضوعكم لازم تجيبوا لينا البت وبعدها نحدد موعد الزواج
ومبدئيا نحنا موافقين وماعندنا اي مانع وعشان تطمئنوا جيبوا معاكم الشبكة
وكل مستلزمات الزواج ويتم الزواج في بيتنا هنا زي باقي الناس حتى نحفظ ماء
وجهنا00 اذا انتو وافقتوا هسي يسافر معاكم واحد من الجماعة ديل يجيب البت
ويجي وبعدها نحدد ليكم موعد الزواج00 انا شخصيا غير مقتنع تماما بالفكرة
ولاحتى عمنا ابو صديفتها وكذلك خالد 00 حاسي بريحة غدر ومكر عجيب00 قمت
قلت ليهم اولا نحنا لايمكن ان نديكم قرارنا في الوقت الحالي ادونا فرصة
نرجع القضارف نتشاور مع الناس ونتصل عليكم نوريكم رأينا شنو00 واحد منهم
داير يشيل وش القباحة شاف عضلات خالد غير مجري كلامو كانوا مصرين يسافر
معانا واحد منهم يجيب البت ونحنا رفضنا رفض قاطع بان لايتم ذلك الا بعد
التشاور مع باقي ناسنا في القضارف جلسة كانت ساخنة جدا وحصل فيها مشادات
عجيبة والغاظني واحد منهم لئيم كلب بس لكن حجرتوا ليكم في محلوا قلت ليهو
ياخي انت الحشرك شنو خلي ابو البت يتكلم انت زول غريب اقعد بادبك اسمع
الكلام وبس وحاتكم زولكم تم سكت00 في النهاية اصرينا علي رأينا وهم رضخوا
له وقالوا خلاص امشوا واتشاوروا بس لازم البت تجي هنا ويتم العرس عندنا
هنا وجية البت مهمة عندنا شديد00 طلعنا منهم علي هذا الاساس ونحن في
الطريق قاصدين بيت صديقتها عشان نوصل ابوها حلف علينا كما اتغدينا مانتحرك
وبالفعل جبرنا بخاطره ونزلنا عمنا رأيو انو الناس ديل ناويين شر عشان كدة
لازم نعمل حسابنا شديد00 المهم اتغدينا وطقينا الحنك مع جكس عمنا الظريف
قربنا نغير رأينا من السفر لكن الناس ازعجونا بالتلفونات دايراين يعرفوا
الحاصل شنو تحركنا للقضارف وصلنا الساعة الثامنة مساءا ولقينا ليك بيتنا
ده بس استاد الهلال غايتوا الناس دي بتحب الشمارات كيف وتعالوا شوفوا
الحاصل00 ايوة نعم منو البناديني دقيقة بس اشوف ده منو واجيكم صادي بسرعة
عشان الموضوع الجاي عجيب وغريب

اها يالحبان جيتكم صادي
نرجع لموضوعنا اها ياسيدي اللمنتي ليك وصلنا القضارف الساعة الثامنة مساء
ولقينا خلق الله متكسرين منتظرننا وتعالوا شوفوا سلة الروح اها حصل شنو
وقعدنا نحكي بالتفصيل للحصل معانا في مدني 00 عم ابراهيم كان شفقان والعجب
حاجة التاية دايرة البت دي تتخارج عشان زوجها مكسر فيها00 فروجة منطط
عويناتو وبسمع في الكلام وبادية عليهو علامات الخوف 00 البت القبطية قاعدة
تسمع فينا بكل اهتمام وايضا متخوفة من المصير المجهول00 حاجة امنة قالت
لينا يارجال هووي خلو الشغل الني ده واعقدوا علي البنية وفكونا من امشي
وتعال دي00 المهم كلو واحد عندو راي مختلف والغالبية العظمي بيروا ان
ننتظر لنهاية الاسبوع ونشوف البحصل شنو00 نظرات ثاقبة نظرتها تلك البنية
لفروجة نظرة تحس من خلالها بالشفقة عليها يعني يافروجة بعد الحب ده كلو
مصيرنا شنو انا وانت هكذا تحكي تلك العيون00 انشاء الله هي عيون حبيبكم
نان هي ماعيون واسعة ماهلة تشبه عيون الريل في جمالها00 اخخخخ انا من عيون
فروجة فضحتني قدام تلك العيون الجميلة وحات الله عيون فروجة تقول كابين
فيها موية نار حممممممممراء وصغيرونه تشبه عيون الصينيون بس في صغرتها00
والغايظني عندو كتيل عيون لما يكون في حالة بتاعت حب وهيام وحاتكم الا
يفتوحها بي زردية دي عيون دي00 نقة ونضمي وحديث استمر حتى الساعة حداشر
ونص وعم ابراهيم بطبعة بنوم بدري اليوم داك حلف مايمشي بس قاعد ويعاين
للبت في ود عيونا00 وشابكنا ليك نان ابو البت دي كان ماوافق شن السوات00
هي لكن المفروض يديكم كلمة مايخليكم مجهجين كدي الله يجهجهو كان جهجهنا00
صباح اليوم التاني وحاتكم نحنا بنشرب في الشاي عم ابراهيم جانا داخل ياناس
هوووي سلام عليكم كيف اصبحتوا وين البنية النصبح عليها هو داير ليهو فرصة
يحضنا لكن ما اديتوا ليكم فرصة قلت ليهو البنية نايمة ياعم ابراهيم قال لي
النايمة ليها شنو اجري صحيها من النوم قلت ليهو ياعم ابراهيم البت امس
انتو ساهرتوا بيها ونامت متأخرة عشان كده هي تعبانة ونايمة قال لي خلاس
بمشي السوق وبجي وطلع فات00 اهـ انا من العذاب ده 00 حوالي الساعة تمانية
ونص جاني فروجة وقال لي يامنتصر انا لازم احسم الموضوع ده وبنتظر نهاية
الاسبوع ده اما ابيض او اسود خلاص انا ماقادر اتحمل تلتلة اكتر من كده00
قلت ليهو يافروجة هل انت عندك استعداد تمشي مدني تعمل العرس هناك زي ماقال
ابو البت قال لي مستحيل 00 انا متأكد انو الناس ديل عندهم خطة راسمنها
عشان العرس ده يطرشق لكن انا بعد ده بخليهم امام الامر الواقع واذا حسيت
باي ريحة حقة غدر لحدي نهاية الاسبوع ده حاتشوف انا اسوي شنو00 مشينا
السوق انا وفروجة والبلاقينا كلو داير يسأل عن الموضوع وصل وين مافضل لينا
شئ الا نعمل مؤتمر صحفي00 مشينا مركز الشرطة عشان نشوف صاحبنا ابو عمة
عملوا معاهو شنو00 صاحبنا ضابط الشرطة قال لي كتبتوا تعهد وهددتوا لو
اتعرض للبت دي تاني ماحايشوف خير وضابط الشرطة مسكني علي جنب وقال لي كلام
خطير جدا قال لي يامنتصر الزول ده حلف يمين انو دخل علي البت دي وجبت ليهو
الكتاب وقام اتوضأ وحلف بالله ثلاث مرات انو دخل عليها وانها ليست عذراء00
يالهوي ده كلام شنو يازول قال لي ده الحاصل قلت ليهو خلاص انت اكتم
الموضوع وفروجة مايعرف حاجة لحدي مانشوف الحاصل شنو00 طلعنا انا وفروجة
وسألني في السكة قال لي الضابط قال ليك شنو قلت ليهو كنا بنتكلم في موضوع
مختلف00 وانا الموضوع حايس لي في مخي ومجهج كياني كلوا ورغم يقيني التام
بان الكلام ده كذب وافتراء ولكن الشكوك لعبت دور كبير00 رجعنا البيت سريع
جدا وانا بسأل في نفسي كيف اتصرف هل ادخل اي بت من بناتنا في الموضوع ده
ام اصارحها بنفسي ام ماذا افعل يا الهي 00 لما رجعنا البيت كالعادة لمة
البنات والقهوة والفشار واللقيمات والونسة لزوم الكرم يعني00 دخلت في احدي
الغرف وندهت علي البت بطريقة ظريفة كده وتشجعت وقمت سألتها بكل صراحة قلت
ليها انا اعرفك كويس جدا واعرف اخلاقك تذكري الرجل ابوعمة الجانا هنا وقال
هو عاقد عليك قالت ايوه قلت ليها الزول ده قال كذا وكذا00 ياسلام علي
الزول لما يكون واثق من نفسو وقسما لازعلت ولا كشرت ولاحاجة قالت لي
يامونتي اخخخخ انا من مونتي دي بتجيب لي الحساسية00 عشان تطمئنوا انا علي
استعداد تام بان اعرض نفسي علي دكتور او دكتورة وتعرفوا اذا انا كنت عذراء
او خلاف ذلك لاني مهما اقسمت برب المسيح سيظل الشك موجود في جواكم 00 علي
طول قلت ليها لادكتور ولا دكتورة خلاص قومي وامشي للبنات وقامت بكل براءة
مشت للبنات وطلبت منها انو ماتجيب سيرة لفروجة ووعدتني بذلك 00 جيت لصاحبي
فروجة كان قاعد في الصالون ومعاهو صاحبنا ابوعاقلة وانا فرحان ومبسوط
التقول داير اعرسها انا والله ياجماعة فرحت من جوة قلبي لما تأكدت فعلا
انها بريئة00 وفي اثناء جلستنا دي جاني تلفون من البت صاحبة القبطية من
مدني قالت لي عندي ليكم خبر عجيب اهل البت بستعدوا لزواج بنتهم ومظاهر
الفرح باينة علي مظهر البيت والناس داخلة ومارقة وسمعت قالوا العرس يوم
الخميس الجاي وسألتني اذا كان جاني اتصال من ابو البت ولالا00 قلت ليها
مافي حد اتصل علينا حتى اللحظة ونحنا منتظرين حسب كلام ابو البت اذا كنا
موافقين علي اقامة الزواج في مدني ام لا وعلي حسب راي الجميع بان العرس
يتم في القضارف واذا اصروا علي اقامته في مدني حانمشي بدون العروس وده شرط
العروس نفسها00 في نفس اليوم الساعة ستة مساءا اتصل علي ابو البت ودار
بينا حديث عجيب جدا00 ونواااااااااصل احبتي وفتكم بعافية

انا كلمتك قلت ليك ما بقرأ ليك الا تقول انتهت ان شاء الله بعد مائة سنة راجيك.
وانا من الجزء الاول ماخشيت قريت ليك تانى بس اصبر لى الاجازة قربت
وفاااااااااااااااااااااضى ليك king

.
تحياتى لاسامة.

اه يا ود الخليفة مالك عملت نائم الموضوع ده مابرد خـــــــــــــــــلاص

ازيك ياعمنا ... انا غايب من الاربعاء وجيت لقيتك يادوووووووووووووب كاتب فصل واحد .... الحاصل شنو؟ لمن تتمها اضرب لى تلفون عشان خلاص انا زهجت من الانتظار.... بالمناسبة نحن حنعمل اضرااااااااب عن قراية قصة فروجة

محمد احمد راشد كتب:: انا كلمتك قلت ليك ما بقرأ ليك الا تقول انتهت ان شاء الله بعد مائة سنة راجيك.
وانا من الجزء الاول ماخشيت قريت ليك تانى بس اصبر لى الاجازة قربت
وفاااااااااااااااااااااضى ليك .
تحياتى لاسامة.

لاحول ولا قوة الا بالله
ياخ انتا حراااد شديييييد
صدق أنا زاتو الى الان ما تميت القصة برضو مشرور زيكم
اصلو المصدر الاصلي دا برضو مشحتفنا
عشان كدا قلت لازم نشحتفكم (نظام عساكر وكدي )
واسامة ببلغك تحياتو وكان ودو يقابلك حتى لو بالمسنجر
وبقرا كل ردودك يعني رسل تحاياك للبرنامج واسرة البرنامج كمان
اسف اتاخرت عليكم شدييييييد
تخريمة
قول لأحمد محمد بركات يجيب ابو عاقلة يحل المشكلة بتاعت انتحال الشخصية
تسلم ياراقي للمتابعة
واقول ليك تابع لان القصة شبه منتهية وحتى لو فيها تمو الباقي بخيالكم ممكن تنهي القصة بطريقة سعيدة
اها عجبك خليتنا نحرق الفلم

اسماعيل الريح بلال كتب:: اه يا ود الخليفة مالك عملت نائم الموضوع ده مابرد خـــــــــــــــــلاص

الباشمهندس اسماعيل الرائع والمتألق دوما
ناسف للتأخر نسبة للسفر وكدي
طبعا حتقول لي حمد الله على السلامة
بقول ليك الله يسلمك
وجاااايك

سعد مصطفى محمد سعد كتب:: ازيك ياعمنا ... انا غايب من الاربعاء وجيت لقيتك يادوووووووووووووب كاتب فصل واحد .... الحاصل شنو؟ لمن تتمها اضرب لى تلفون عشان خلاص انا زهجت من الانتظار.... بالمناسبة نحن حنعمل اضرااااااااب عن قراية قصة فروجة

لا لا لا كلو ولا الاضراب
بعدين ندفع لناس الدعايات كيف
عاوزنا نتورط مع ناس الحكاية في الكوباية وانس شاي ريتش
زي ما شداد اتورط مع ناس اي ار تي بعد انسحاب الهلال
اها حنتمها ليكم

بعد مكالمة البت صديقة القبطية من مدني القالت لي فيها انو في مظاهر عرس في بيت ناس القبطية والناس داخلة وخارجة وسألتني اذا كان ابو البت اتصل علي ولالا وانا قلت ليها لسه ما اتصل علي00 كنا جالسين انا وفروجة والقبطية واخونا ابوعاقلة ومعانا بت لذيذونة كده من بنات جيرانا00 بعد ماخلصت المكالمة سألتني القبطية عن الشئ الدار بيني وبين صديقتها قلت ليها قالت شايفه مظاهر فرح في بيتكم والظاهر اهلك خلاص اقتنعوا وقرروا يتم العرس بدل البهدلة الحاصلة دي00 البنية قالت لي ياموننننننننننتي اححححححي انا استغفرتك يامالك ياروحي اخونا القاهر حاسدني في قولة البنية لي يامونتي هههههه المهم قالت لي يامونتي اسمعني هنا دي ديل اهلي وانا بعرفهم كويس مهما عملوا وتظاهروا انهم موافقين دي ما الحقيقة حايكونوا بخططوا لي شئ نحنا ماعرفنوا شنو ولكني متأكدة انهم بدبروا في مكيدة عشان العرس ده مايتم00 قالت لي انت ماعارف انا عانيت كيف لما فتحت معاهم الموضوع في الاول لدرجة انهم هددوني بالقتل ولما يئست منهم قررت الهروب لاني متأكدة من مشاعر فروجة نحوي00 وصاحبكم فروجة وحاتكم مافضل ليهو شئ الا ياكل البت بس يعاين بي عيونوا الشينات ديل للبت جوه عيونا وكلوا ما البت تقول كلمة ينط ليها في حلقها ويقول ليها حبيبتي انا انتي كلامك صاح ياروحي فعلا ياحياتي ومابعرف شنو00 والبنية الساعة التقلب فيها عويناتا وتعاين لي فروجة اوووووووووووووب وووووووووووبين علي انا دي عيون شنو ياناس ده جمال شنو ياناس والمعاينة معاها بسمة وتظهر ليك وجنة ايوة وجنة عديل كده اححححححي انا لا اله الا الله محمد رسول الله شوفوا اجمل عيون شوفتوها في حياتكم واضربوها في مليون دي عيون البت دي حاجة خرافية شكيتك علي الله يافروجة كان بدور تودرنا وحاتكم لما البنية دي تقلب عويناتا ديل كدي انا حيلي كلو ببرد وبحس بي عضامي ديل اتكسروا عديل كده ونفسي اتخمة وماغايظاني حاجة الا عيون فروجة لما يحاول يقلب عيونو الله بسألني تقول عيون غوريلا المهم خلونا من عيون فروجة ديل اصلوا بجيبوا لي حساسية 00 بعد شوية الوالدة الله يديها طولة العمر ندهت للبنية وقالت كدي البنية قامت واتفدعت وبتصلح في التوب00 دقيقة النشرب لي موية اصلو ريقي نشف اهـ وثم اهـ وستماية اها الخصر التقول مبري ولا الصدر وقسما انبطق عليهو البيت البقول وفي صدرك قنبل كم اسلم كافر00 الحب الطاهر00 قادر الله في خلقوا ولله في خلقه شئون00 مشت البنية للوالدة وفروجة قال لي يامونتي سبحان الله فرق الليل مع النهار ناس تقولا كيف وناس تقولا كيف اللهم طولك ياروح اها يافروجة بالله اختصر مالك داير شنو00 اصلوا منظر البت وهي واقفة بتصلح في التوب لخبط علي كياني وخلاني عايش في عالم تاني معليش ياجماعة لكن انا متأكد لو واحد فيكم كان في محلي دا والله كان جن تعرفوا الجن بس ياهو زاتو000 هههههاي المهم فروجة قال لي هلا هلا علي الجد لابعرف ابو البت ولابعرف اهلها الخميس بعد الجاي ده عرسي وكفاية عذاب وده قرار لايمكن اتنازل منو تاني وبيني وبينكم معاهو حق وانا وافقت وكل المعانا رحبوا جدا وباركوا00 عند المغربية جاني تلفون من ابو البت قال لي خلاص نحنا عملنا كل الترتيبات لاقامة مراسم الزواج وبكرة بجيكم واحد من طرفنا الي هو خال البت عشان تجي معاهو ويوم الخميس الجاي تعالوا مع عريسكم قلت ليهو نحنا اتفاقنا غير كده نجيكم نحنا من غير العروس ويتم العقد ونرجع نكمل عرسنا في القضارف قاطعني علي طول وقال لي لايمكن يتم العرس ده الا اذا جات البت دي هنا في مدني تجي البت ونحنا نقوم بكامل تجهيزها وانتو تعالوا براحتكم يوم الخميس كملوا الباقي 00 بيني وبينكم الكلام ماوقع لي واصراره علي جية البت لوحدها خلاني اشك في الموضوع 00 جاتني فكرة اني اماطله وابدي موافقة مبدئية وبعد داك نعمل الشئ الفي راسنا نحن قلت ليهو خلاص مافي مشكلة بس الخميس الجاي غير مناسب لان العريس عندو اشياء كتيرة محتاج يعملها ادونا اسبوعين من الان وقبل الموعد بيومين نتصل عليكم عشان تجوا تاخدوا بتكم00 قال لي اسبوعين كتيرة قلت لا ماكتيرة عشان نحنا نجهز حالنا والعرس ماساهل قال لي خلاص انا برجع اشاور الاهل وبتصل عليك بكرة اوريك وصلنا لشنوا00 قفل الخط00 قمت ندهت علي البت فورا جات وحكيت ليها هي وفروجة كل الكلام الدار بيني وبين ابوها00 دار بينا انا وفروجة والبت وابوعاقلة وبت جيرانا نقاش طويل جدا خلصنا منه لامور هامة جدا ولقرار حاسم جدا كان للبت القبطية دور كبير جدا وتأثير قوي علينا كلنا نحن الحاضرين00 اححححي اصبعي وجعني دقيقة بس واجيكم صادي ياحلوين00

اها يالحبان جلسنا انا والبنية السمهرية وفروجه وبت جيرانا نتناقش في الموضوع القالوا ابو البت طبعا ابو البت قال لازم العرس يكون عندهم في مدني وانو حايرسلوا لينا واحد من اهلها لاخذها وبعدين نحنا نجي مع عريسنا عريس الهنا يايابا مكجم وخشموا معوج ونخرتوا عامله زي الشكمان طبعا ابو البت كان مصر انو العرس يكون يوم الخميس الجاي يعني بعد ستة ايام وانا اعترضت علي العجلة دي وقلت ليهو ادينا فرصة نفكر المهم بعد ماشرحت للبت القبطية كلام ابوها قالت لي يامونتي (استغفرتك يامالك روحي) احيييي انا من مونتي دي ... البت قالت لي انا عارفه في مكيدة مدبرة ولكن انا حااتعشي بيهم قبل مايتغدوا بي وقالت لي بكره الصباح حاامشي معاكم لاحد الشيوخ عشان اعلن اسلامي الله اكبر واليوم التاني نعمل العقد طبعا فروجه القبيح داير يطير من الفرح وقعد يبحلق في عويناتو ديل نظام الولد مكسر في البت يعني وانا مغيوظ من عيونو ديل جنس غيظ بس اسكتوا ساي والله ياجماعة نحنا من الفرح دايرين نطير والبت كانت في حاله تانية تحس بيها دايرة الواطه دي تصبح هسي شدة مامستعجله وفي اللحظة دي جا داخل علينا عم ابراهيم بعصايتو اصلوا هو لو ماشاف البنية دي مابنوم سلم علي البنية بالاحضان ازيك يابتي وكيف امسيتي وكيف قيلتي وهو لسه حاضن قام فروجه عشان يتدارك الموقف صاح باعلي صوتوا ايوه ياحاجة التاية حتى عمنا فك البت والله جنس كنكشه خلوها ساكت انا زاتي اتمنيتها هههههه انتظرنا كلنا متين يهل علينا الصباح وفعلا قمنا الصباح بدري جهزنا امورنا وسقنا معانا البنية ومشينا لمولانا ادريس يرحمه الله رحمة واسعة ويسكنه فسيح جناته مع الشهداء والصديقين ، امام وخطيب المسجد الكبير وقابلنا بحفاوته المعهوده وشرحنا ليهو الحاصل انو البت دي دايرة تسلم بارادتها وحقيقة انا قبل ماندخل علي مولانا سألتها هل هي دايرة تسلم عشان الزواج وبس ولا من قلبها وهي مقتنعة قالت لي والله من قلبي وعن قناعة شديدة بعد داك اطمئنيت وجبنا الشهود ودخلنا علي مولانا الذي انطقها الشهادة ثلاثة مرات معلنه اسلامها وسط تكبير وتهليل الحاضرين وكانت فرحه غامره بان منا الله علينا بهدايه هذه الانسانه الي الاسلام والحمدلله رب العالمين0 اها بعد ماخلاص اسلمت البنية تحس بيها بقت سمحه زياده علي الحلاوة العليها ولا دي غيره مننا علي اسلامنا ماعارف لكن البت بقت حلوه اكتر من اللازم رجعنا البيت وهنالك استقبلونا ناس الحله بالزغاريد والتهليل والتكبير ووزعوا التمر والشربات ولو شفتوا فروجه تقول هو الاسلم كلوا مره يصلي ركعتين لمن عقدني انا زاتي وطبعا كان فرحان فرح شديد مامصدق ده انو يحصل قام قال لي رايك شنو نعمل حفله بالمناسبة دي عليكم الله شوفوا فضيحة الزول الغبيان ده زول اسلم يعملوا ليهو حفله ولا يجيبوا ليهو ناس الذكر والحوليه غايتوا ضحكت جنس ضحك قطع مصاريني من جوه كنت بلاحظ للبت عن تعابير وجهها والناس بتهني فيها بالاسلام فكانت والحمدلله مبسوطه وفرحانه فرح شديد طبعا الناس كانت ملمومة عندنا في البيت والاعمى يشيل المكسر ولما هدأ الجو جلسنا انا والبت وفروجه ومعانا صاحبنا حيدر نتشاور في الخطوة الجاية شنو وكانت حكاية من الف ليله وليله 00 شوية كده اناخد لي نفس واجيكم صادي0

ود الخليفه ابوسويط صاحبي ده لو ما تم القصه ده وقعته سوده اسكت ساكت

هههههههههههههه

الحبيب عصام الحكاية شنو لينا كام يوم منتظرين ان تاخذ نفسك وتجينا صادي دا نفس شنو دا ؟