اخوانى واخواتى هذه بقولوا اكلات سودانيه انا اول مره اسمع بها ارجو افادتى هل هذا صحيح

أم تكشو
تتكون من ورق الخضرة المجفف ويضاف له البصل والزيت وقليل من اللوبيا ( طبعا بالاضافة للملح والشطة)

ملاح الانقارا
يتكون من ورق نبات الكركدي بالاضافة للفول السوداني وعطرون ودقيق وهو ملاح لذيذ الطعم

ملاح الكمبو
تحرق سيقان الذرة وعندما تتحول لرماد يؤخذ رمادها ويضاف له لوبيا ولبن

العفوص
وهو عبارة عن سلطة مثل الجرجير يتكون من ورق أشجار التبلدي وتضاف له الدكوة والبصل

سناكيلو
وهو ملاح يتكون من دقيق وسمك جاف

ملاح مطيعينة
ويعمل من اللبن وتضاف له الويكة الجافة

أم دفان
وهو طعام يتكون من دقيق مخلوط باللبن ويدفن تحت النار حتى ينضج

أم شيشة
وهو عصيدة تتكون من دقيق الدخن ويضاف لها السمسم وزيت ولا تحتاج لنار نؤكل هكذا دون قلي (أممممم)

ضوّاك
عصيدة تتكون من ذرة تطحن وتضاف اليها دكوة

أنتقق
وهي وجبة تتكون من حشرات الصراصير نحمر بالزيت وتؤكل كالتسالي

ولدول

هو نبات يقوم في الترع والخيران ويؤخذ ورقه ويضاف له لحم جاف وبصل

قاسيا

نوع من الشجر في ورقه يضاف له الفول السوداني ويضاف أيضا اللحم الجاف

الكراد
نبات من فصيلة الفاصوليا يضاف له لحم وطماطم ويسمى أيضا دونيب

ويرتق
تعمل من بذور نبات الكركدي تبل وتخمر وتضاف لها الويكة وكمبو وبصل

أم حليبين
هي دقيق يخلط باللبن ويعمل قراصة تؤكل باللبن أيضا

سد الحنك
دقيق ذرة أو قمح يغلى في النار و يضاف له السكر

سمرونا
وهي تحلية بعد الوجبات تتكون من دقيق وسكر و سمن وهي مثل البسبوسة

بجبجي
وهو عبارة عن مديدة تصنع من لب حب البطيخ

أم جقوقة
تتكون من السمسم الذي يعصر في العصارة قبل أن يتحول لامباز

الاخت ساره لك التحية اول شىء المسميات دى جبتيها من وين والله يمكن عرفته لى حاجتين او ثلاثة ولا فى الونسة ما سمعنا بيها والظاهر الاكلات دى كلها من غرب السودان وبالذات الصراصير المحمرة دى لاحوله ولاقوة الا بالله عافانا الله

لك التحية الاخ بركات واللة وجدها عند احدى الصديقات عرفت فيها بس ام تكشو والباقي يطرشني بيو .

الاخت سارة تحياتى انا بالمناسبة اكلت ملاح الانقارا اول ملاح مذكور واعرفه جيدا وهو لذيذ جدا وملاح ام تكشو معروف الملوخية الناشفة وخوانا المصريين الى الان ياكلو حيث اى واحد صعيدى مقيم هنا فى السعودية يرسلو له اهله الملوخية الناشفة والمش المعفن منذ 6 شهور اما الكمبو اظنه ملاح الويكاب واكلته قبل كدا مرة واحدة ولم استسيقه ام الباقى يطرشنى ما سمعت بيهم لكن يمكن اهلنا فى باقى السودان عندهم

اولا تحياتي لك اخت سارة انا زيك كان ام تكشو السمعت بيهو

كل التحايا للمساهمين
كل مازكر هى اكلات سودانية ولمناطق مختلفة ومعظمها من غرب السودان واحتمال كبير جدا تكونوا اكلتوا منها بس باسم مختلف -حسب المنطقة- واختلاف فى تركيبة الملاح

متعنا الله واياكم بالصحة والعافية---قولوا امين---

الاخ على المك لك تحياتى عشان كدى انت ما عاوز تمشى مصر احكى لك نكته بخصوص المش واحد صعيدى امه ارسلت له زلعه مش اوبرمه مش بلغتنا ومع المش وصيه ان يقول بسم الله الرحمن الرحيم عشان الشيطان ما ياكل معاه ويبارك له فيه ولكنه كان ينسى البسمله وبعد اسبوعين عاوز ياكل واذا بالشيطان يظهر له ويقول وحياه امك قول بسم الله هردت مصارينا الله يهرد مصارينك

باخوانا نحن فى محيط العسيلات الضيق قد لا نسمع بمثل هذه الاكلات ناهيك ان ناكلها وهذه اكلات سودانية بمختلف قبائله وهذه من ضمن الموروثات لكل قبيلة وقد تدخل فى شجار مع احدهم اذا نبذت ليهو اكلتو (اكل مايعجبك والبس مايعجب الناس).

عرفتك يا ود ابو ضينة عمر محمد احمد سعيد باعو وين انت وين اخبارك واولادكيا ابن العمة الغالى جدا جدا جدا

مشكورة علي المرور يا زينب كيف صحة الخالة العزيزة نعمات

الاخ علي المك لك التحية ومشكور علي المرور

مشكور الاخ ابوعبيدة وصدقت

فعلا الاخ محمد احمد راشد دي اكلات بعيدة كل البعد عن محيطنا في العسيلات وحتي مسمعها غريب علينا لكن عند اهلها اكيد ليها طعم

ام تكشو قاعد عندنا في عسيلاتنا ده والخضرة بتاعت ما بياخدوها من الخضرجي بل خضرة مطر صفقته عريضه كنا زمان بنلقطه لي اهلنا (جيل ناس ثامنه والحناكيش يمتنعون ماشافوا الكلام ده)

ملاح الانقارا من محبيه وهو موجود عند قبيلة التاما (مزارعين البحر ) تعتريه بعض الحموضه لكن ما عجيب بي لقمة ام اكيربه (لقمه شدة ماقويه امشي فوق ليها السوسيو)

ملاح الكمبو هذه بلغة اهلنا الغرابه لكنو عندنا برضو موجود وهو ملاح الويكاب حلاتو بي السمن الله ارحمه الحبوبه (ام حنا) كانت ماجستير ويكاب او من قصب الوادي تعزل لي ملاح الويكاب.

انتقق ده رطانه لكن الاكله هي عباره عن الجراد والله اجمل من التسالي كانوا اجدادنا زمان بشيلوه اقزقزوا بيه زمن السرحه تقبض الجراده ثم تقطع الاجنحه والارجل ويترك الرأس والبطن زي اكل الصير ياجماعه وحصل جربته مره واحده مع الجد المرحوم بلال حميده وزكر لي الله يرحمه اكان الجراد هاجم الزراعه مابفلت من طوة الحمير والقلي.

ام امجقوقه من اجمل الاكلات في منطقة ام روابه وهي عصر السمسم قبل استخراج الزيت وتستخدم ايضا في تشحيم جمل العصاره (قليل من الاهل كان بيجيبوها من عصاره في ام ضوابان في المنطقه قدام المسيد الجماعه البشتروا الزيت منهم بضوقوهم منها)

العفوص و سناكيلو وملاح مطيعينه وووو في الحجا ماحجونا بيهم .

والله اعلم لك التحيه الاخت ساره ميرغني

لك التحية اختى سارة اما اختك بتعرف ام تكشو وعلى قولك اطرشنا بالباقى كلو عرفناة الصراصير دى لزومها شنو كان شافتهم امى بتسوى شنو ههههه وتحياتى لعشة عمتى

لك التحية الاخ اسماعيل الريح ومشكور علي التوضيح والمرور

كيفنك يا رابعة غايتو كان امكوم سمعت بالكلام دة كان تقعد تلاتة ايام لااكل لاشراب

ابقي لي بأربعاء وعقاب شهر في أكلات ما سمعت بيها كلوكلو
وكان خليتيني في اسامي أكلات انا قايلها اسامي لعيبة في نيجيريا

والله تجيبى فى المحن ياخاله بقراء فى يعض الاسامى واضحك

ههههههه واللة ياها اسامي الفلاتة تشكر يا دعوب

صحي محن تضحك مشكور علي المرور يا ياسر

والله يا جماعه ماعرفنا الا ام تكشو [تاكله بعد المطره تقيف خطيره]وملاح الانقاره ده وجبه مفضله للتامه والباقي اطحني قطر الابيض واجي راددي فيني تاني ياقول ابراهيم علي ماسمعت بهم
مشكوره الاخت ساره

الاخت ساره تحياتي طيب الجراد المحمر البياكلوه ده اسمه الفني شنو

تحياتي ودالضيب

واللة يا ود الضيب انا ديل محتارة فيهم واللة تقول لي جراد
وزي ما قال النور نتوجة للابيض وهناك نلقي حل للطلاسم دي
تسلمو علي المرور