في ديار الغربة بحلم
بي عيونك ياوطن
واحلم بي لقا الطيبين
مسافات بعيدة مابتتحد
وأشواق عتية مابتلين
فيك ياغربة كم قاسيت
كم عانيت وتهت سنين
أغالب ديمة في الأيام
عشان ألقاك ياحلوة
وتتفجر مشاعري حنين
كتير بشتاق واروح أسأل
وأفتش بين عيون حلوين
أتوه في زحمة الدنيا
وخطاي تضيع مع الوافدين
واعاين في صفا الأيام
أقول إمكن بتطلعي من فرح وحدين
وماصدقت يوم ألقاك
زي حلما
معاي في غربة برضو سجين
أتاريكي بتطلعي إنتي من جواي
ومن قلبا في داخلي حزين
ومن أمواج عيون طفلة
أنفاسها عبير ربى النيلين
رسالة شوق بتحمل البشرى
ندية معطرة بي شذى الياسمين
بتعلن بكرة ميلادنا
وأجيك في الحال مع العايدين
تنور بكرة حارتنا
وفيها يتم زفاف عاشقين
مابين طمبور ونقارة
وأغني الفال عديلة وزين
أضمك لي بلهفة وشوق وحنية
واشيلك فوق رموش العين
لأنك إنت لي وطن
وحلما فيك عشقته سنين
وبعدك تاني لاغربة
وحاتك ليها ماراجعين
تكون الغربة لي عينيك
أسافر فيها ماأرجع
وأعيش فيها العمر عمرين
