إلى رفقاء الطفولة وأيام الصبا

وبقيت بعيد .. خوف المحاذير البي تشعل نور رؤاك جوة القلوب

وبقيت بعيد أتحاشي لكل الدروب

وبقيت بعيد خوف الطفولة الكايسة عيد ماتنجرح

خوف العيون الشايلة ريد ماتنفضح

وفضلت من خلف الحزن انظم قصيد لي رقة البسمة
الحنين ..

ولحظة الشوق

الدفين ..
بي لهفة المشتاق

سنين ..
لي دارو في الزمن

القبيل ..
كانت حكاوي الجدة تحملنا لي نوماً أمين

السمحة كانت هي الفطين .. ود النمير أيامو وين .. والنوم تسرب في العيون

والجدة في سردها المليان حنين

وا شوقنا لي زمن الحنين ..

نلقاهو وين تاني الحنين ..

ورحلتِ منك يالجدة الحنين وفِضِل وراك الهم أنين

ومشيت أفتش في المتاهات حامل معاي شوق السنين ..

ما شليل حزين والرمة تسأل ... حبَاسها وين ..

و ليل الهواجس.. صدى المخاوف.. كذباً كاذب .. ماك أمين

حبوبة هي الرقم الرصين الغيرو ما بعرف ضمين ..!!

وكسبت بي الغالية الرهان ولقيت معها أيام زمان ..

لكني وين ألقي الرفاق ؟؟

طارق في التراب والشيخ بعيد من أهلو غاب

الصادق أخوي... الميس خراب

فاقد معاذ .. عثمان .. وهشام .. كرة الشراب ..

وإتشتت مني الحروف في ليلي داك ...

عثمان .. عزوز .. فياض البلبل كشب ..

تاهت ملامح الإلفة في الزمن البعيد

وأنشرَ في ليلي الحنين .. وصرخت هواجس الذكرى جواي في سكون

( وين الشباب .. ضاع الشباب ..)

وبقيت بعيد عايش وحيد في غربة مدفون في التراب .

ياسلااااااااااااااااااااااااااااااااام يا محمد تصدق انا عشت في ازقة الحلة وكرة الشراب والدافوري وميدان الشعلة وتذكرت عمك بلال ورابطة العسيلات زمان والتعصب الكروي وذكرتني المصباح ودبتول وقت يرقص شعلة شعلة وذكرتني شلتي واعدتنا لايام زمان الله يخليك يا محمد وعايزك تواصل وتسرد ايام الطفولة وذكريات الاحبه